Nakadto pa gihapon hi Jesus ha Jerusalem para ha Piyesta han mga Tabernakulo (o, mga Payag). Nalipay hiya nga “damu an tinoo ha iya.” Pero, waray malipay hito an mga lider han relihiyon. Nagsugo hira hin mga kalalakin-an basi arestuhon hiya. (Juan 7:31, 32) Pero, waray tumago hi Jesus.

Lugod, padayon nga nagtutdo hiya ha publiko ha Jerusalem, ngan nagsiring: “Halipot na la an panahon nga makakaupod ko kamo antes ako kumadto ha nagsugo ha akon. Bibilngon ako niyo, pero diri niyo ako hiaagian, ngan diri kamo makakakadto ha akon kakadtoan.” (Juan 7:33, 34) Waray ito masabti han mga Judio, salit nag-uroistorya hira: “Mapakain ini nga tawo, nga diri naton hiya hiaagian? Makadto ba hiya ha mga Judio nga kaupod han mga Griego ngan magtututdo ha mga Griego? Ano an iya karuyag sidngon hini: ‘Bibilngon ako niyo, pero diri niyo ako hiaagian, ngan diri kamo makakakadto ha akon kakadtoan’?” (Juan 7:35, 36) Kondi, an ginhihisgotan ni Jesus amo an iya kamatayon ngan pagkabanhaw ngadto ha langit, ngan diri hiya masusundan didto han iya mga kaaway.

Ikapito ka adlaw na han piyesta. Kada aga durante han piyesta, usa nga saserdote an nagbubuhos hin tubig nga tikang ha Karigoan ha Siloam, basi umawas ito ngadto ha ubos han altar ha templo. Posible nga basi ipahinumdom ini ha mga tawo, hi Jesus nagyakan ha daku nga tingog: “An bisan hin-o nga nauuhaw, pakadi, ngan paiinumon ko hiya. An natoo ha akon, sumala ha ginsisiring han Kasuratan, ‘Maawas tikang ha iya kasingkasing an mga salog han tubig nga naghahatag hin kinabuhi.’”—Juan 7:37, 38.

An ginhihisgotan ni Jesus amo an mahitatabo kon dihogan na an iya mga disipulo pinaagi han baraan nga espiritu ngan tawagon para ha kinabuhi ha langit. Ini nga pagdihog nahitabo katapos mamatay ni Jesus. Tikang ha adlaw han Pentekostes han sumunod nga tuig, inawas an tubig nga naghahatag hin kinabuhi han nagsangyaw an mga disipulo nga dinihogan pinaagi han baraan nga espiritu.

Sugad nga reaksyon ha igintutdo ni Jesus, an iba nagsiring: “Hiya gud An Propeta,” matin-aw nga nagtutudlok ha igintagna nga propeta nga labaw pa kan Moises. An iba liwat nasiring: “Hiya an Kristo.” Pero may mga nakontra: “Ha Galilea gud ba magtitikang an Kristo? Diri ba an Kasuratan nasiring nga an Kristo magtitikang ha tulin ni David, ngan ha baryo han Betlehem nga gin-ukyan hadto ni David?”—Juan 7:40-42.

Salit nagkabahinbahin an mga tawo. Bisan kon karuyag han iba nga arestuhon hi Jesus, waray nag-aresto ha iya. Han an mga opisyal binalik ngadto ha mga lider han relihiyon nga diri upod hi Jesus, an punoan nga mga saserdote ngan mga Pariseo nagpakiana: “Kay ano nga waray niyo hiya dad-a nganhi?” An mga opisyal binaton: “Waray pa gud iba nga tawo nga nagyakan ha sugad nga paagi.” Nasina an mga lider han relihiyon ngan nagyakan hin nakakatamay ngan nakakainsulto: “Nalimbongan ba liwat kamo? Waray tinoo ha iya nga mga lider o mga Pariseo, diri ba? Pero ini nga mga tawo nga diri nasabot han Balaud mga ginpanhimaraot.”—Juan 7:45-49.

Hini nga takna, hi Nicodemo, nga Pariseo ngan membro han Sanhedrin, waray kahadlok nga nagyakan basi depensahan hi Jesus. Mga duha ngan tunga ka tuig na an naglabay, hi Nicodemo kumadto kan Jesus ha gab-i ngan nagpahayag hin pagtoo ha iya. Yana hi Nicodemo nagsiring: “Diri uyon ha aton Balaud nga hukman an tawo kon waray pa hiya mapamatii basi hibaroan kon ano an iya ginbubuhat, diri ba?” Ano an ira baton? “Taga-Galilea ka ba liwat? Usisaha ngan hibabaroan mo nga waray propeta nga magtitikang ha Galilea.”—Juan 7:51, 52.

An Kasuratan waray direkta nga magsiring nga may propeta nga magtitikang ha Galilea. Pero an Pulong han Dios nag-unabi nga an Kristo magtitikang didto; ito nagtagna nga usa nga “duro nga lamrag” an makikita han “mga tawo ha Galilea.” (Isaias 9:1, 2; Mateo 4:13-17) Dugang pa, sugad han igintagna, hi Jesus natawo ha Betlehem, ngan nagtikang hiya ha tulin ni David. Bisan kon maaram hini an mga Pariseo, posible nga hira an nagpasarang han damu nga sayop nga panhunahuna han mga tawo mahitungod kan Jesus.