KAPITE 67
“Neʼe Heʼeki ʼi Ai He Tagata Kua Palalau Feia”
-
ʼE FEKAUʼI HE KAU TAGATA LEʼO KE NATOU PUKE IA SESU
-
ʼE PALALAU IA NIKOTEMO MOʼO HAOFAKI IA SESU
Neʼe kei nofo ia Sesu ʼi Selusalemi ki te ʼAho Lahi ʼo Te ʼu Tapenakulo (peʼe ʼo Te ʼu Pola). Neʼe fiafia he neʼe “tokolahi te hahaʼi neʼe natou tui kia te ia.” Kaʼe neʼe mole fiafia ia te kau takitaki lotu. Neʼe natou fekauʼi he kau tagata leʼo ke natou puke ia ia. (Soane 7:31, 32) Kaʼe neʼe mole nono ia Sesu.
Neʼe hoko atu pe te faiakonaki ʼa Sesu ʼi Selusalemi, ia muʼa ʼo te hahaʼi, ʼo ina ui fenei: “ ʼE au nofo anai mo koutou ʼi he kiʼi temi nounou ʼi muʼa ʼo taku alu kia Ia ʼae neʼe ina fekauʼi mai au. ʼE kotou kumi anai au, kaʼe ʼe mole kotou maʼu anai au, pea ko te potu ʼae ʼe au alu anai ki ai ʼe mole feala ke kotou ʼomai ki ai.” (Soane 7:33, 34) Neʼe mole mahino te kau Sutea ki ʼana palalau, koia neʼe natou feuiʼaki fenei: “Ko te potu fea ʼae ʼe ʼamanaki alu ki ai te tagata ʼaeni ke mole feala ai hatatou maʼu ia ia? ʼE ʼamanaki alu koa ki te kau Sutea ʼae ʼe mavetevete ʼi te kau Keleka pea mo akoʼi te kau Keleka? Pea kotea te fakaʼuhiga ʼo tana ui fenei: ‘ ʼE kotou kumi anai au, kaʼe ʼe mole kotou maʼu anai au, pea ko te potu ʼae ʼe au alu anai ki ai ʼe mole feala ke kotou ʼomai ki ai’?” (Soane 7:35, 36) Kaʼe neʼe palalau ia Sesu ʼo ʼuhiga mo tona mate pea mo tona fakatuʼuake ki selo, ʼae ʼe mole feala ke olo ki ai ʼona fili.
Neʼe hoko mai leva te fitu ʼaho ʼo te lafeti. ʼI te ʼu ʼaho ʼae neʼe fai ai te lafeti, ʼi te ʼu uhu fuli, neʼe ohu e he pelepitelo he moʼi vai mai te Maʼanuʼaga ʼo Siloame, pea neʼe ina huaʼi leva ki te tafitoʼaga ʼo te ʼaletale ʼae neʼe ʼi te fale lotu. Neʼe lagi fakamanatuʼi age e Sesu ki te hahaʼi te meʼa ʼaia neʼe fai, ʼi tana kalaga fenei: “Kapau ʼe fia inu he tahi, ke haʼu kia te au pea ke inu. Ko ʼae ʼe tui kia te au, ohage ko tona ui fenei ʼi te folafola: ‘ ʼE tafe anai mai ia ia te ʼu vai tafe ʼo te vai maʼuli.’ ”—Soane 7:37, 38.
Neʼe talanoa ia Sesu ʼo ʼuhiga mo te meʼa ʼae neʼe hoko ʼi te temi ʼae neʼe fakanofo ai ʼana tisipulo ʼaki te laumalie maʼoniʼoni pea mo pauʼi natou ki te maʼuli ʼi selo. Neʼe hoko tonatou fakanofo, ʼi te ʼaho ʼo te Penikosite ʼo te taʼu ʼae neʼe hoa mai, hili te mate ʼo Sesu. ʼI te Penikosite, neʼe kamata tala e te ʼu tisipulo
ʼae neʼe fakanofo ʼaki te laumalie ia te moʼoni ki te hahaʼi, ʼo kamata tafe ai te vai ʼae ʼe ina foaki ia te maʼuli.ʼI te logo ʼa ʼihi ki te faiakonaki ʼa Sesu, neʼe natou ui fenei: “ ʼE ko ia moʼoni te Polofeta.” ʼE mahino ia neʼe natou talanoa ʼo ʼuhiga mo te polofeta ʼae neʼe fakakikite ʼe tonu ke haʼu pea ʼe lahi age ia ia Moisese. Pea neʼe ui fenei e ʼihi: “ ʼE ko ia ia Kilisito.” Kaʼe neʼe ui fenei e ʼihi age: “ ʼE feala koa ke haʼu ia Kilisito mai Kalilea? ʼE mole ui koa la ʼi te folafola ʼe haʼu ia Kilisito mai te hakoga ʼo Tavite pea mo te kolo ko Petelehemi, ʼae neʼe nofo ai ia Tavite?”—Soane 7:40-42.
Koia neʼe hoko ai te fihi ʼi te hahaʼi. Logo la neʼe fia puke e ʼihi ia Sesu, kaʼe neʼe mole lavaʼi e he tahi. ʼI te toe liliu ʼa te ʼu tagata leʼo ki te kau takitaki lotu kaʼe neʼe mole natou ʼaumai ia Sesu, neʼe fehuʼi fenei e te ʼu pelepitelo pule mo te kau Faliseo kia natou: “He koʼe neʼe mole kotou ʼaumai ia ia?” Neʼe tali fenei age e te ʼu tagata leʼo: “Neʼe heʼeki ʼi ai he tagata kua palalau feia.” Neʼe iita te kau takitaki lotu, ʼo natou laukoviʼi te ʼu tagata leʼo pea mo nukinukiʼi fenei natou: “Kua toe fakaheʼi koa ia mo koutou? ʼE mole he tahi ʼi te kau pule peʼe ko te kau Faliseo ʼe tui kia te ia. Kaʼe ko te hahaʼi ʼaena, ʼae ʼe mole natou iloʼi te Lao, ʼe ko te kau malaʼia.”—Soane 7:45-49.
ʼI tana logo ki ʼanatou palalau ʼaia, ko Nikotemo, he Faliseo neʼe kau ʼi te Sanetualio, neʼe lototoʼa ʼo palalau moʼo haofaki ia Sesu. ʼI he ʼu taʼu ʼe lua vaelua ki muʼa atu, neʼe haʼu ia Nikotemo kia Sesu ʼi te poʼuli ʼo ina fakaha age tana tui kia te ia. ʼI te lakaga leva ʼaeni, neʼe ui fenei e Nikotemo: “ ʼO mulimuli ki tatatou Lao, ʼe mole tonu muʼa koa la ke tou fakalogo ki he tagata ke tou iloʼi pe kotea ʼae neʼe ina fai, pea hoki tou fakamauʼi leva ia ia?” Neʼe kotea tanatou tali? Neʼe natou ui fenei ki ai: “Pe ʼe ke Kalilea koa mo koe? Kumi pea ʼe ke iloʼi ai ʼe mole he polofeta ʼe haʼu anai mai Kalilea.”—Soane 7:51, 52.
ʼE moʼoni ʼe mole ui fakahagatonu ʼi te Tohi-Tapu ʼe haʼu anai he polofeta mai Kalilea. Kaʼe neʼe fakaha ʼi te Folafola ʼa te ʼAtua, ʼe haʼu anai ia Kilisito mai ai. Neʼe fakakikite ai ʼe sisio anai te hahaʼi ki “he malama lahi” ʼi te koga fenua ʼaia. (Esaia 8:23; 9:1; Mateo 4:13-17) Tahi ʼae meʼa, ohage ko tona fakakikite, neʼe tupu ia Sesu ʼi Petelehemi pea neʼe haʼu ia mai te hakoga ʼo Tavite. Logo la neʼe lagi iloʼi e te kau Faliseo ia te faʼahi ʼaia, kaʼe neʼe lagi mafola te mahino hala ʼa te hahaʼi ʼo ʼuhiga mo Sesu ʼuhi ko natou.