Hilo hi nsôk hi ngand Bilap, hilo hi yônôs isaambok, Yésu a yé niiga i “homa minkuu mi makébla.” (Yôhanes 8:20; Lukas 21:1) I homa nu a nlama ba homa bibégés nu bôda het litén li ntine makébla.

I ngéda ngand i ntagbe juu, i homa témpel nu a yé a bana mapubi ma tôbôtôbô. Bilambe bikeñi bi-na bi mbéyés homa nu, hiki lambe i gwé mbôm bihél bi-na nyonok ni môô. Mapubi ma bilambe bi ma mbai homa nyensôna. I jam Yésu a nkal bôt li nla nhôñlaha bo mapubi ma, a nkal le: “Me yé mapubi ma nkoñ isi, nu ni nu a noñ me, a’ kil yaga bé ikété jiibe, ndi a’ bana mapubi ma niñ.”​—Yôhanes 8:12.

Farisai i mpééna bibuk bi Yésu bi, i nkal le: “U mbok mbôgi inyu wemede; mbôgi yoñ i ta bé maliga.” Yésu a timbhe bo le: “To ibale me mbok yaga mbôgi inyu memede, mbôgi yem i yé maliga inyule me nyi hee me bi lôl, ni hee me yé i ke. Ndi bé ni nyi bé hee me bi lôl, to hee me yé i ke.” A nke ni bisu i kal le: “I yé ki ntilga ikété Mbén Môsi nan le: ‘Mbôgi i bôt iba i yé maliga.’ Men me mbok mbôgi inyu memede, yak Tata nu a bi ep me a mbok mbôgi inyu yem.”​—Yôhanes 8:13-18.

Farisai i ntjél neebe bibañga bi, i mbat le: “Isoñ a yé hee?” Yésu a timbhe le: “Ni nyi bé me, ni nyi bé to Tata wem. Ibale ni yik me, ki ni nyi yak Tata wem.” (Yôhanes 8:19) To hala kiki Farisai i gwé ngôñ i gwel Yésu, mut to wada a nla bé tihba nye.

Yésu a ntiimba bibañga a bi bôk a pot: “Me yé i ke, n’a yéñ ki me, ndi n’a wél ikété béba nan. Ni nla bé lo i homa me yé i ke.”  Lôk Yuda i ntehe le bibañga bi Yésu bi nôga bé, ba mbôdôl badba le: “Baa a nsômbôl nidba? Inyule a nkal le: ‘Ni nla bé lo i homa me yé i ke.’” Ba nok bé jam Yésu a nsômbôl kal, inyule ba nyi bé het a nlôl. A ntoñol le: “Bé ni yé ba hisi, me me yé nu ngii. Bé ni yé bôt ba nkoñ isi unu, ndi me me ta bé mut nkoñ isi unu.”​—Yôhanes 8:21-23.

Yésu a yé pôdôl niñ yé i ngii ni libak le a nyila Mésia tole Kristô, nu baéga bibase ba nlama bem. Ndi ni ngandak diyana, ba mbat nye le: “We u yé njee?”​—Yôhanes 8:25

Mu kiki ba yé pééna, Yésu a ntimbhe bo le: “Inyuki me ngi pôdhak bé?” A ñôt mahoñol map yak Isañ, a ntoñle bo inyuki Lôk Yuda i nlama emble Man: “Nu a bi ep me a yé maliga, yak i mam me bi nôgôl i nyeni, mon me yé i pot hana nkoñ isi.”​—Yôhanes 8:25, 26.

I mbus, Yésu a ñunda le, maselna ni Lôk Yuda ini, a gwéne Isañ botñem, a nkal le: “I ngéda n’a mal péni Man mut, ha nyen n’a yi le a yé nu a bé lama lo, ni le me mboñ bé jam jo ki jo ni memede, ndi me mpot ndik mam mana kiki Tata a bi niiga me. Ndi Nu a bi ep me a yé lôñni me; a bi tjôô bé me metama inyule me mboñ i mam ma nlémél nye ngéda yosôna.”​—Yôhanes 8:28, 29.

Inyu Lôk Yuda ihogi i i nhémle nye, Yésu a nkal bo le: “Ibale ni ntééda bibañga gwem, ni yé toi banigil bem, n’a yi maliga, yak maliga m’a kobol bé.”​—Yôhanes 8:31, 32.

Inyu bape, bipôdôl bini bi nhélhana. Ba nkal le: “Di yé mbôda i Abraham, di ma ba bé minkol mi mut nye ki nye. Lelaa ni u nkal le: ‘B’a kobol bé’?” Lôk Yuda i nyi le ha ngéda i bakén bon ba bé énél bo, jon ba ntjél neebe le ba yé minkol. Ndi Yésu a ñunda bo le ba ngi yii minkol, a nkal bo le: “Me nkal yaga bé maliga le: Hiki mut a mboñ béba, a yé nkol u béba.”​—Yôhanes 8:33, 34.

Hala a yé ndutu inyu Lôk Yuda kiki ba ntjél neebe le ba yé minkol mi béba. Yésu a ntoñol le: “Nkol u nla bé yégle i ndap nwet wé i boga ni boga; ndi man nwet ndap a nyégle mu i boga ni boga.” (Yôhanes 8:35) Nkol u gwé bé kunde i kôdôl bum, ba nla ki pémés nye to imbe ngéda. Ndi man nu a yé ngwalakbel a nyén ndap niñ yé yosôna, “mba ni mba.”

Jon maliga inyu Man ma yé maliga ma ma mpémés bôt i béba i nkena i nyemb. Yésu a nkal le: “Ibale Man a nkobol bé, wee ni maliga, ni ta ha bé minkol.”​—Yôhanes 8:36.