Jesus odu ke ebiet emi ẹkotde “ufọk unịm okụk” ekpep mme owo n̄kpọ ke akpatre usen Usọrọ Mme Ataya. (John 8:20; Luke 21:1) Etie nte itie emi n̄ko ke ẹsikot Okụre Iban, ndien do ke mme owo ẹsisịn etịbe mmọ.

Ke ini usọrọ, ikan̄ esinen̄ede ayama ke itie emi ke okoneyo. Ẹsibon ikpọ utuenikan̄ inan̄ do, emi ẹnyenede ikpọ besịn inan̄ emi ẹdọn̄de aranikan̄. Un̄wana utuenikan̄ emi esiyama esịm ata anyan ebiet. Se Jesus etịn̄de idahaemi eti mme owo aban̄a utuenikan̄ emi. Enye ọdọhọ ete: “Ami ndi un̄wana ererimbot. Owo eke etienede mi idisan̄ake ke ekịm tutu amama, edi eyenyene un̄wana uwem.”—John 8:12.

Mme Pharisee imaha ikọ Jesus emi, ndien mmọ ẹdọhọ enye ẹte: “Afo etie ntiense aban̄a idemfo; ntiense fo idịghe akpanikọ.” Jesus ọbọrọ mmọ ete: “Idem ọkpọkọm ntie ntiense mban̄a idemmi, ntiense mi edi akpanikọ, koro mmọfiọk ebiet emi n̄kotode ndi ye ebiet emi n̄kade. Edi mbufo ifiọkke ebiet emi n̄kotode ndi ye ebiet emi n̄kade.” Enye ọdọhọ mmọ n̄ko ete: “Ẹwet ke Ibet mbufo ẹte, ‘Ikọ ntiense owo iba edi akpanikọ.’ Ami ntie ntiense mban̄a idemmi, ndien Ete emi ọkọdọn̄de mi etie ntiense aban̄a mi.”—John 8:13-18.

Sia mme Pharisee mînyịmeke ndinịm se Jesus etịn̄de emi, mmọ ẹbụp enye ẹte: “Ete fo odu m̀mọ̀n̄?” Jesus ọbọrọ mmọ ete: “Mbufo ifiọkke mi inyụn̄ ifiọkke Ete mi. Edieke mbufo ẹkpefiọkde mi, mbufo ẹkpefiọk Ete mi n̄ko.” (John 8:19) Kpa ye oro mme Pharisee ẹsụk ẹyomde ẹmụm Jesus, owo ndomokiet itụkke enye ubọk idahaoro.

Jesus afiak etịn̄ se enye ama eketetịn̄ ete: “Ami mmọn̄ nnyọn̄, ndien mbufo ẹyeyom mi, edi mbufo ẹyekpan̄a ke idiọkn̄kpọ mbufo. Ebiet eke ami n̄kade mbufo ikemeke ndidi.” Sia mme Jew  mîdiọn̄ọke se ikọ Jesus ọwọrọde, mmọ ẹdọhọ ẹte: “Nte enye ediwot idem? Koro enye ọdọhọde ete, ‘Ebiet eke ami n̄kade mbufo ikemeke ndidi.’” Sia mmọ mîdiọn̄ọke ebiet emi Jesus otode, ikọ Jesus in̄wan̄ake mmọ. Ntre enye ọdọhọ mmọ ete: “Mbufo ẹto isọn̄; ami nto enyọn̄. Mbufo ẹto ererimbot emi; ami ntoho ererimbot emi.”—John 8:21-23.

Jesus etịn̄ aban̄a ini emi enye okodude ke heaven mbemiso enye edi isọn̄, ikọ esie onyụn̄ owụt ke imọ idi Messiah, m̀mê Christ emi mme adaiso ido ukpono emi ẹdoride enyịn ke ke edi. Mmọ ẹbụp enye emiom emiom ẹte: “Afo edi anie?”—John 8:25.

Kpa ye oro mmọ ẹsuade enye, mînyụn̄ inyịmeke ndida enye nte Eyen Abasi, Jesus osụk ọbọrọ mmọ ete: “Nso inam ami n̄kam ntetịn̄ ikọ ye mbufo?” Ekem enye ọtọn̄ọ nditịn̄ n̄kpọ mban̄a Ete esie onyụn̄ etịn̄ ntak emi anade mme Jew ẹkpan̄ utọn̄ ẹnọ Eyen Abasi. Enye ọdọhọ ete: “Enye emi ọkọdọn̄de mi edi etịn̄ akpanikọ, ndien kpa mme n̄kpọ emi n̄kokopde nto enye ke ntịn̄ ke ererimbot.”—John 8:25, 26.

Ekem Jesus etịn̄ ikọ emi owụtde ke imọ imọbuọt idem ke Ete imọ, edi mme Jew ibuọtke. Enye ete: “Ke ini mbufo ẹdimenerede Eyen owo ke enyọn̄, do ke mbufo ẹdifiọk ẹte ke ami ndi enye, ye nte ke ami nnamke baba n̄kpọ kiet ke odudu idemmi; edi kpa nte Ete ekekpepde mi kpa ntre ke ntịn̄ mme n̄kpọ emi. Ndien enye emi ọkọdọn̄de mi odu ye ami; enye ikọkpọn̄ke mi ikpọn̄, koro nnamde n̄kpọ eke enemde enye esịt kpukpru ini.”—John 8:28, 29.

Edi ndusụk mme Jew ẹbuọt idem ke Jesus, ndien enye ọdọhọ mmọ ete: “Edieke ikọ mi odude ye mbufo, mbufo ẹdi mbet mi ke akpanikọ, ndien mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.”—John 8:31, 32.

Jesus nditịn̄ mban̄a ediwọrọ ufụn akpa ndusụk owo idem. Mmọ ẹdọhọ enye ẹte: “Nnyịn idi nditọ Abraham ndien akananam nnyịn idụkke ufụn inọ owo ekededi. Nso inam afo ọdọhọde, ‘Mbufo ẹyewọrọ ufụn’?” Mme Jew ẹdiọn̄ọ ke mbon idụt en̄wen ẹsikara mmimọ ndusụk ini, edi mmọ imaha ẹkot mmimọ ifịn. Edi se Jesus afiakde etịn̄ owụt ke mmọ ẹsụk ẹdi ifịn. Enye ọdọhọ mmọ ete: “Ke ata akpanikọ ke ndọhọ mbufo, Owo ekededi eke anamde idiọkn̄kpọ edi ofụn idiọkn̄kpọ.”—John 8:33, 34.

Mme Jew emi nditre ndinyịme ke idi ifịn idiọkn̄kpọ iyakke mmọ ẹkụt ke imoyom un̄wam. Jesus ọdọhọ mmọ ete: “Ofụn idụn̄ke ke ufọk ke nsinsi; eyen odụn̄ ke nsinsi.” (John 8:35) Owo isinọhọ ofụn n̄kpọ-akpa, ndien ẹkeme ndisio enye unyọn̄ ini ekededi. Eyen emi ẹmande m̀mê enye emi ẹdade-da ẹnyene ikpọn̄ ekeme ndidu ke ufọk “ke nsinsi,” oro edi, adan̄a nte enye odude uwem.

Ntem, akpanikọ emi aban̄ade Eyen anam owo ọwọrọ ufụn idiọkn̄kpọ ye n̄kpa ke nsinsi. Jesus ọdọhọ ete: “Edieke Eyen anamde mbufo ẹwọrọ ufụn, mbufo ẹyenen̄ede ẹwọrọ ufụn.”—John 8:36.