Halikumbi lyamakumishilo lyakusokesa 7 lyaChiwanyino chaJitavanaku, Yesu apwile nakunangula vatu mukapete kamutembele muze “vahakilenga vikasha vyamawana.” (Yowano 8:20; Luka 21:1) Chasoloka nge muchihela kana mwapwile muChipango chaMapwevo muze vatu vahakilenga wana wavo uze vanehelenga.

Hachiwanyino kanechi naufuku, muchihela kana vamunyikilengamo. Vahakilengamo vitumbikilo vyamanongo amanene viwana, kaha chitumbikilo hichitumbikilo chapwile nambashiya yato yamaji. Manongo ahashile kumunyikila chihela chosena. Ngocho vyuma ahanjikile Yesu vyanukishile vatu vapwile nakumwivwilila, kaha ambile ngwenyi: “Ami yami mumunyi wakaye. Weshowo mwangukavangizanga ami, chikupu vene keshi kukatambuka mumilimako, oloze mwapwanga namumunyi wakuyoya.”—Yowano 8:12.

VaFwaliseu valumbilishile mazu ahanjikile Yesu nakwamba ngwavo: “Uli nakuhana unjiho hali ove ivene. Unjiho wove kaweshi wamuchanoko.” Yesu akumbulwile ngwenyi: “Numba tuhu nguli nakuhana unjiho hali ami ivene, oloze unjiho wami unapu wamuchano, mwomwo ngwatachikiza oku ngwafumine, noku nguli nakuya. Oloze enu kamwatachikiza oku ngwafumine noku nguli nakuyako.” Ambile nawa ngwenyi: “MuJishimbi jenu vasonekamo ngwavo: ‘Unjiho wavatu vavali unapu wamuchano.’ Ami ngweji kuhananga unjiho hali ami ivene, kaha Tata nawa uze angutumine eji kuhananga unjiho hali ami.”—Yowano 8:13-18.

Chakuzeneka kwitavila vyuma ahanjikile, vaFwaliseu vamuhulishile ngwavo: “Iso ali kulihi?” Yesu avakumbulwile chakuhona kuhita mutenga ngwenyi: “Enu kamwangutachikizako, naTata nawa kamwamutachikizako. Kachi mwangutachikizanga ami, kachi munamutachikiza naTata nawa.” (Yowano 8:19) Numba tuhu vaFwaliseu vasakile kukwata Yesu, oloze naumwe amukwachile wauchi.

Yesu ahanjikile cheka mazu wowamwe ngwenyi: “Ami nanguya, kaha namukangutonda, oloze namukafwa nashili yenu. Okwo nguli nakuya ami, enu  kamweshi kuhasa kwizakoko.” Chikupu vene, vaYuleya kavatachikijile mwalumbunukilile mazu aYesuko, ngocho vaputukile kuhuhwasana nakwamba ngwavo: “Uno mwaya nakulijiha tahi? Mwomwo nambe ngwenyi, ‘Okwo nguli nakuya ami, enu kamweshi kuhasa kwizakoko.’” Vyuma ahanjikile Yesu kavyavalumbunukilileko mwomwo kavatachikijile okwo afumineko. Alumbunwine ngwenyi: “Enu muvahano hamavu, ami nguwamwilu. Enu muvahano hakaye, ami kangweshi nguwahano hakayeko.”—Yowano 8:21-23.

Mazu ahanjikile Yesu atalikishile kukuyoya chenyi chamwilu shimbu kanda ezenga hano hamavu, nahakupwa Meshiya, chipwe Kulishitu uze vashikile, uze vapwile nakutalilila vaze vatwamina vamukwitava. Chipwe ngocho, vamuhulishile nakasautu ngwavo: “Yove iya?”—Yowano 8:25.

Numba tuhu vaFwaliseu vamukanyine nakumuhunga, oloze Yesu ambile ngwenyi: “Ikaze nangulishina kuhanjika nayenu?” Chipwe ngocho avumbikile Ise nakulweza vaYuleya ovyo vatela kwivwilila vyuma mwahanjika Mwana. Ambile ngwenyi: “Uze angutumine apwa wamuchano, kaha vyuma vize ngwevwile kuli ikiye, vikiko vene nguli nakuhanjika mukaye.”—Yowano 8:25, 26.

Kaha Yesu apwile nalufwelelo muli Ise luze kavapwile nalwo vaYuleyako. Ambile ngwenyi: “Omu namukasukika Mwanamutu numbanyi mukatachikize ngwenu, ami yami ikiye, ngwenu kangweshi nakulilingila tuhu vyuma uka wamiko, oloze ngweji kuhanjikanga vyumevi nganomu vene angunangwile Tata. Kaha Uze angutumine ali nayami. Kangusezele uka wamiko, mwomwo shimbu yosena ngweji kulinganga vyuma vyakumwivwisa kuwaha.”—Yowano 8:28, 29.

Oloze vaYuleya vamwe vafwelelele muli Yesu, ngocho avalwezele ngwenyi: “Kachi nge namutwamanga mumazu ami, kaha chikupu vene munapu mutumbaji twami. Namutachikiza muchano, kaha muchano naumilingisa kupwa vakulihehwa.”—Yowano 8:31, 32.

Echi chihande chavatu kupwa vakulihehwa chapwile chaungeji kuli vatu vamwe. Ngocho vambile ngwavo: “Etu tuvana vaApalahama, kaha kanda tuchipwengaho lyehi tuvandungo jamutuko. Nyi mwamba ngachilihi ngwove, ‘Namupwa vakulihehwa’?” Numba tuhu vaYuleya vatachikijile ngwavo lwola lumwe vavayulilenga kuli vaka-lifuchi lyeka, oloze vakanyine kuvavuluka ngwavo vandungo. Yesu avalwezele hatoma ngwenyi nahalwola kana vapwile lika vandungo. Ambile ngwenyi: “Chamuchano vene nangwamba kuli enu ngwami, weshowo eji kulinganga shili apwa ndungo yashili.”—Yowano 8:33, 34.

VaYuleya vapwile muponde hakukana ngwavo kavapwile vandungo kushiliko. Yesu alumbunwine ngwenyi: “Ndungo keshi kutwama navaze vakuzuvo yakaka yenyi haya myaka yosenako, oloze mwana mwatwamanga haya myaka yosena.” (Yowano 8:35) Ndungo keshi kuhasa kuswana uswana wakaka yenyiko, mwomwo vanahase kumuhanga kala lwola. Mwana wakulisemena chipwe wakuswana ikiye kaha mwatwamanga navaze vakuzuvo “haya myaka yosena.”

Ngocho muchano wakuvuluka Mwana himuchano uze weji kulingisanga vatu kupwa vakulihehwa kushili haya myaka yosena. Yesu ambile ngwenyi: “Kachi nge Mwana mwamilingisa kupwa vakulihehwa, kaha namupwanga vakulihehwa chikupu.”—Yowano 8:36.