Panjiku yo kupejisira yo mabuso kana kuti dhiri ro Mucaca, pa njiku yo cinomwe, Jesu ari kujijisa mu themberi, pa ndau inodaninjwa kuti “bokiso ro kuvigira mare.” (Johani 8:20; Luka 21:1) Zvinoita inga kuti ndau iyi inogara ngodivi ro Paruvanje po Vanakaji, vandhu pavanoitira mupiro javo.

Pa usiku hwo mabuso, mbuto iyi yo themberi, inova yakabvenekehwa ushoni. Zvibani zvirongomuna zvinodihwa kodhono. Zve cimwe nga cimwe cazvo cino mabhasia marongomuna akazara ngo mafuta. Rubveneko hwo zvibani zvondhozvo zvinokwanisa kubvenekera mbuto ya kakura. Zvinonanga Jesu kangaije zvingaita kuti vapurukiri vake varangarire zvibani zvondhozvo paanoti: “Inini ndiri ruveneko hwo nyika. Ndiani anonditevera aazofambi mu cidima, kaveta anozova no ruveneko hwo uhomi.”—Johani 8:12.

VaFarisi vanoramba zvinonanga Jesu veciti: “Iwewe unojiitira ufakazi: ufakazi hwako nghwa biresi!” Jesu anovapingura kuti: “Nokunyati ndinojiitira ufakazi, ufakazi hwangu nghwa kadikadi, ngokuti ndinoziva kondinobva no kondinoenda. Kaveta imwimwi amuzivi kondinobva no kondinoenda. Imwimwi munotonga meciteveja muviri. Inini anditongi mundhu. Kudari ndikatonga mundhu, kutonga kwangu kunorungama ngokuti andiripi ndega. Baba vakandituma vaneni. Mu Mupango menyu makatahwa kuti ufakazi hwo vandhu vaviri huno simba. Waro inini ndinojiitira ufakazi, na Baba vakandituma vanondiitiravo ufakazi.”—Johani 8: 13-18.

VaFarisi avazivi kutendera murangariro wa Jesu perepo vanomubvujisa kuti: “Vari kwapi Baba wako?” Jesu anovadavira zvakajeka kuti: “Imwimwi amutizivi, inini na Baba wangu. Nomaindiziva, maizozivavo Baba wangu.” (Johani 8:19) VaFarisi vanoda kuti Jesu asungwe asi apana anokwanisa kumupsasa.

 Jesu anovabvunjazve kuti: “Inini ndinoenda hangu. Munozondipsanga biresi; munozofira mu uxaixi hwenyu. Kondinoenda amukwanisi kugumeyo.” VaJudha avacainasa kuzwa ushoni zvainanga Jesu ngo kudaro vanozvibvunjisa kuti “dangani anoda kujiuraya, ngokuti anoti: ‘Kondinoenda inini, amukwanisi kugumeyo.’” Ivona avacaizwisisa zvainanga Jesu, ngo kuti avacaikuziva kwaaibva. Asi iyena anovadurujira kuti: “Imwimwi muri vo pasi, inini ndiri wo mugore: Muri wo nyika ino; inini andiripi wo nyika ino.”—Johani 8:21-23.

Jesu ari kunanga ngo pamusoro po upenyu hwake mu gore acito aviya pasi pano, zve ngo pamusoro pokuva Mesiya wakagondeswa, kana Kristu, mundhu hwo kuti vaJudha vaidikana kumuziva. Asi vacimurerusa, vanomubvujisa kuti: “Iwewe ndiwe ani?”—Johani 8:25.

Pakati po kurambhwa kwake no kuzondwa, Jesu anoti: “Ndibzona bzo ndamubvunja!” Ngo kudaro Jesu anoita kuti vandhu vazive Babake zve wodurujira kuti ngenyi vaJudha vaidikana kuzwira Mwana eciti: “Wiya wakandituma nghwa kadi-kadi; ininivo ndinotokotesa ku vandhu bzo ndakazwa ndiyena.”—Johani 8:25, 26.

Tevere, Jesu anotatija kuti anothemba Babake, zviro zvokuti vaJudha vainga vacina, eciti: “Ngari yo munozopakaika Mwana wo mundhu, munozoziva kuti ndiri ‘Wiya aripo’ no kuti apana condinoita ndega, kaveta ndinojijisa bzondakajijiswa ndi Baba wangu. Wiya wakandituma ana inini: aandiregeri ndega, ngokuti ngari jese ndinoita bzokumudakajisa.”—Johani 8:28, 29.

Asi vaJudha vamweni vanova no gonda kuna Jesu, zve anovabvunja kuti: “Kudari mukavangirira meciteveja mazwi angu, munozoita vajiji vangu vokadi, munozoziva bzokadi, no bzokadi bzinozomusujunura.”—Johani 8:31, 32.

Vamweni vanovona inga zvicina shwiro, Jesu paanobhuya ngo pamusoro po kusujunuhwa. Ngo kudaro vanoti: “Itisu tiri bvumbo [kana mubarihwana wa] Abrahama, atizivi kumboita varanda vo mundhu ariwese. Munonangisa kudini kuti: ‘Munozosujunuhwa’?” VaJudha vanozviziva kuti nguva jimweni vaitongwa ngo vonyikanja, asi vanoramba kuti vadaninjwe kuti i varanda. Ngo kudaro, Jesu anovatatija kuti ivona vaciri varanda eciti: “Bzokadi ndinomubvunja kuti: Ndiani anoita uxaixi, ndiyena muranda wo uxaixi.”—Johani 8:33, 34.

VaJudha vanoramba kutendera kuti i varanda vo zvishaishi. Zvondozvo zvinovadira pa ngonzi. Jesu anovadurunjira kuti: “Waro muranda aagari kanyi mukuvo wese. Mwana ngaanogara kanyi mukuvo wese.” (Johani 8:35) Muranda aatendehwi kuwana ndhaka, asi angambiribijwa panguva iri yese. Mwana basi, ndiyena anontendehwa kuashira ndhaka pa “mukuvo wese” waanonga acipona.

Ngokudaro, zvokadi ngo pamusana po Mwana i zvokadi zvinosujunura vandhu, ku zvishaishi zvinobara rufu. Jesu anoti: “Ngokudaro kudari Mwana akazomusujunura, munozoita vasujunuhwi vo kadi-kadi.”—Johani 8:36.