Fiesta tukukuy p’unchaytan Jesusqa “qolqe churanakunaq kasqan partepi” yachachisharan (Juan 8:20; Lucas 21:1). Chayqa “warmikunaq juñukunan” nisqa partepin kanman karan.

Fiesta p’unchaykunapiqa chay partepin churaqku mechero churana tawa jatunkaray candelerokunata, chaymi tutapiqa chaymanta mecherokuna fuerteta k’anchaq. Chaypichá runakunaqa piensaranku: “Noqan kay pachapaq k’anchayqa kani. Pipas qatikamuwaqqa manapunin tutayaqpi purinqachu, aswanmi kausayman apaq k’anchayta chaskinqa”, nispa Jesús niqtin (Juan 8:12).

Fariseokunan ichaqa payta niranku: “Qanqa qanllamantamá rimashanki, ¿chaychu rimasqayki cheqaq kanman?”, nispa. Jinan Jesusqa niran: ‘Noqallamantaña rimani chaypas, rimasqayqa cheqaqmi, noqaqa yachanin maymantachus jamuni chayta maymanchus rishani chaytapas. Qankunan ichaqa mana yachankichischu maymantachus jamuni chayta ni maymanchus rishani chaytapas [...]. Kamachikuy simi chaskisqaykichispipas: “Iskay testigokunachus willanku chayqa, cheqaqmi chay willasqankuqa”, nishanmi ¿riki? Manan noqallachu noqamantaqa willani, kachamuwaqniy Yayapas willallantaqmi noqamantaqa’, nispa (Juan 8:13-18).

Paykunataq niranku: “¿Maypitaq kashan Yayaykiri?”, nispa. Jinan Jesusqa niran: “Qankunaqa manan reqsiwankichischu, manallataqmi Yayaytapas reqsinkichischu. Reqsiwankichismanchus chayqa, reqsiwaqchischá Yayaytapas”, nispa (Juan 8:19). Jinan fariseokunaqa Jesusta jap’iyta munaranku, ichaqa manan jap’irankuchu.

Jinan Jesusqa juj kutipi nisqanta wajmanta niran: “Noqaqa ripusaqmi, qankunataq maskhawankichis, chaywanpas juchaykichispin wañunkichis.  Maymanchus risaq chaymanqa manan jamuyta atiwaqchischu”, nispa. Jinan judiokunaqa niranku: “Kay runaqa wañuchikunqachu imaynataqri. ¿Imaraykutaq nishan: ‘Maymanchus risaq chaymanqa manan jamuyta atiwaqchischu’, nispari?”, nispa. Paykunaqa chayta niranku maymantachus Jesús kasqanta mana yachasqankuraykun; chaymi Jesusqa niran: “Qankunaqa kay pachamantan kankichis, noqan ichaqa mana kay pachamantachu kani”, nispa (Juan 8:21-23).

Chaywanmi Jesusqa rikuchisharan cielomanta kasqanta, pitachus judío umallikuna suyasharanku chay prometesqa Mesías, Cristo kasqantawan. Chaywanpas chay umallikunaqa nirankun: “¿Pitaq kankiri?”, nispa (Juan 8:25).

Jinan Jesusqa paykunata niran: “Imapaqñas qankunataqa rimapayaykichispas”, nispa. Chaymantataq yachachisqanpi creenankupaq niran: “Kachamuwaqniyqa cheqaq rimaqpunin, imakunatachus paymanta uyarisqaytataqmi kay pachapiqa rimani”, nispa (Juan 8:25, 26).

Jinaspa niran: ‘Maypachachus runaq Churinta warkunkichis chaypachañan yachankichis noqaqa jamunan karan chaypuni kasqayta, manataq imatapas noqallamantachu ruwasqayta, aswanpas Yayaq yachachiwasqanman jinapuni kaykunataqa rimasqayta. Kachamuwaqniyqa noqawanmi kashan, manan sapallaytachu payqa saqerpariwan, imatapas sonqonpaq jinapuni ruwasqayrayku’, nispa (Juan 8:28, 29).

Chaymantan Jesusqa paypi iñiqkunata niran: ‘Yachachisqayta waqaychallankichispuni chayqa, discipuloykunan kankichis, reqsinkichistaqmi imachus cheqaq kasqantapas, chay cheqaq kaqtaqmi kacharichisunkichis’, nispa (Juan 8:31, 32).

Jinan wakin judiokunaqa niranku: “Noqaykuqa Abrahanpa wawankunan kayku, manataqmi jayk’aqpas noqaykuqa piqpa kamachinpaschu karayku. Chhaynaqa, ¿imaraykutaq qanri: ‘Kacharichisqan kankichis’, nishanki?”, nispa. Judiokunaqa waj nacionpa kamachinpiña kasharanku chaypas, manan “kamachi” ninata munarankuchu. Jesusmi ichaqa niran: “Pipas juchata ruwaqqa juchaq kamachinmi”, nispa (Juan 8:33, 34).

Chay judiokunaqa manapunin allintachu ruwasharanku juchaq kamachin kasqankuta mana reconocespankuqa. Chaymi Jesusqa niran: “Kamachiqa manan wiñaypaqchu wasipi qhepakun, churin ichaqa wiñaypaq qhepakun”, nispa (Juan 8:35). Kamachiqa manan herenciata chaskinmanchu, aswanmi qonqaylla qarqosqa kapunman; dueñoq wawanmi ichaqa “wiñaypaq” otaq wañupunankama wasipi qhepakun.

Chhaynaqa, Diospa Churinmanta cheqaq kaqta yachayllan runataqa juchamanta wañuymantawan wiñaypaq kacharichinman. Chaymi Jesusqa niran: “Sichus Churi kacharichisunkichis chayqa, cheqaqtapunin kacharichisqa kankichis”, nispa (Juan 8:36).