Pa zuŵa la 7 lo lenga zuŵa lakumaliya la Phwandu la Mahema, Yesu wasambizanga ŵanthu kumalu ko kwenga “vakusungiyamu ndalama.” (Yohane 8:20; Luka 21:1) Kwenuku, kwadanikanga ku Balaza la Anthukazi, ko ŵanthu aperekiyanga vakupereka.

Ndi usiku pa nyengu ya phwandu, kumalu yanga aŵikangaku nyali. Nyali zenizi zajangapu zinayi ndipu nyali yeyosi yajanga ndi mabeseni nganayi ngo aŵikangamu mafuta. Nyali zenizi zaŵalanga ukongwa ndipu ukweru waki wafikanga patali. Vo Yesu wangukamba pa nyengu iyi, panyaki vinguchitiska ŵanthu wo amuvwisiyanga kuti akumbuki nyali zenizi. Iyu wanguti: “Ini ndini ukweru wa charu. Ndipu weyosi yo watindilondo wazamukwenda mu mdima cha, kweni wazamukuŵa ndi ukweru wa umoyu.”—Yohane 8:12.

Afarisi angususka vo Yesu wangukamba ndipu angukamba kuti: “Utijipereke wija ukaboni, ndipu ukaboni waku ngwauneneska cha.” Yesu wanguŵamuka kuti: “Chinanga kuti nditijipereke ndija ukaboni, ukaboni wangu ngwauneneska, chifukwa ko ndikutuliya ndipuso ko ndiluta ndiziŵaku. Kweni yimwi muziŵaku cha ko ndikutuliya ndipuso ko ndiluta.” Iyu wangulutirizga kukamba kuti: “Mu Dangu linu mukulembeka kuti: ‘Ukaboni wa ŵanthu ŵaŵi, ngwauneneska.’ Ini nditijipereke ukaboni wakukwaskana ndi ndamweni, ndipu Ada wo akundituma, nawu apereka ukaboni wakukwaskana ndi ini.”—Yohane 8:13-18.

Pakususka vo Yesu wangukamba, Afarisi angumufumba kuti: “Kumbi Awusu ŵe pani?” Yesu wangumuka mwambula kubisa kuti: “Ini mutindiziŵa cha, Ada nawu mutiŵaziŵa cha. Mukaziŵengi ini, mwatingi muziŵengi so Ada.” (Yohane 8:19) Chinanga kuti Afarisi akhumbanga mbwenu kuti Yesu wamangiki, kweni pengavi yo wangumukwaska.

Yesu wanguwereza so vo wangukambapu kali kuti: “Ini ndiluta, ndipu mwazakundipenja, kweni yimwi mufwiyengi mu ubudi winu. Ko ndiluta mungazaku cha.” Yapa, Ayuda angutimbanyizgikiya limu ndi vo Yesu wangukamba. Mwaviyo, angwamba kufumbana kuti: “Kumbi wajibayengi cha mwenuyu? Chifukwa wakamba kuti, ‘Ko ndiluta mungazaku cha.’” Yiwu anguvwisa  cha vo Yesu wang’anamuwanga chifukwa aziŵanga cha kuti iyu wakutuwa pani. Yesu wangulutirizga kuŵakambiya kuti: “Yimwi mutuliya panu pasi, kweni ini ndituliya kuchanya. Yimwi mutuliya mucharu ichi, kweni ini ndituliya mucharu ichi cha.”—Yohane 8:21-23.

Yesu wachikamba mazu ngenanga, wang’anamuwanga umoyu wo wenga nawu kuchanya wechendazi pacharu chapasi nge Mesiya wakulayizgika, pamwenga kuti Khristu, yo alongozgi achisopa alindizganga. Kweni alongozgi ŵenaŵa angufumba Yesu mwambula ulemu kuti: “Kumbi ndiwi yani?”—Yohane 8:25.

Pakumuka ŵanthu wo amususkanga ukongwa ŵenaŵa, Yesu wangukamba kuti: “Kumbi ndisuzgikiyanji kulongoro namwi?” Chinanga kuti wangufumba fumbu lenili, iyu wangwamba kukonkhoska vakukwaskana ndi Awisi ndipuso chifukwa cho Ayuda akhumbikiyanga kuvwiya Mwana waku Chiuta. Iyu wanguti: “Yo wakundituma ndimuneneska ndipu vinthu vo ndikuvwa kwaku iyu ndivu ndilongoro mucharu.”—Yohane 8:25, 26.

Pavuli paki, Yesu wangulongo kuti waŵagomezganga ukongwa Awisi, kweni Ayuda angutondeka kuchita venivi. Yesu wangukamba kuti: “Asani mwazisoska Mwana wa munthu, mwazamuziŵa kuti ini ndiyu, ndipuso kuti ndichita cha chechosi cha mumaŵanaŵanu mwangu, kweni ndilongoro vinthu ivi nge mo Ada akundisambiziya. Ndipu Yo wakundituma we nani. Iyu wakundilekapu cha ndija, chifukwa nyengu zosi ndichita vinthu vakumukondwesa.”—Yohane 8:28, 29.

Kweni Ayuda anyaki ŵenga ndi chivwanu mwaku Yesu ndipu iyu wanguŵakambiya kuti: “Asani mulutirizga kusunga mazu ngangu, ndikuti ndimwi akusambira ŵangu nadi. Muziŵengi uneneska ndipu uneneska wo ukufwatuweningi.”—Yohane 8:31, 32.

Mazu ngenanga ngo Yesu wangukamba ngenga ngachilendu kwa Ayuda anyaki. Mwaviyo, yiwu angumususka ndipu angukamba kuti: “Isi te mbewu yaku Abrahamu ndipu techendajepu kapolu wa munthu weyosi. Sonu ukamba wuli kuti, ‘Mufwatulikengi’?” Ayuda ŵenaŵa, aziŵanga kuti nyengu zinyaki ŵanthu amitundu yinyaki ndiwu aŵalamuliyanga kweni angukana kuti ŵenga akapolu. Chinanga kuti angukana, Yesu wangukamba kuti ŵenga mbwenu akapolu. Iyu wanguti: “Nditikuneneskiyani, munthu weyosi yo wachita ubudi, ndi kapolu wa ubudi.”—Yohane 8:33, 34.

Ayuda angutaya mwaŵi ukulu chifukwa chakuti angukana kuzomereza kuti ŵenga akapolu a ubudi. Yesu wangukamba kuti: “Kapolu walutirizga cha kuja munyumba ya mbuyaki, mwana ndiyu walutirizga kujamu kwamuyaya.” (Yohane 8:35) Kapolu waŵavi mwaŵi wakulonde chihara ndipu nyengu yeyosi angamukambiya kuti wakengi kwaki. Kweni mwana yo wabalika pamwenga yo atimulera ndiyu waja munyumba yo “kwamuyaya,” pamwenga kuti kwa umoyu waki wosi.

Kuziŵa uneneska wakukwaskana ndi mwana waku Chiuta ndiku kutovya ŵanthu kuti afwatuliki ku ubudi ndi nyifwa. Yesu wangukamba kuti: “Asani Mwana watikufwatuwani, mufwatulikengi nadi.”—Yohane 8:36.