Xliʼakgtujun kilhtamaku chu xaʼawatiya kilhtamaku xla Fiesta xla Laktsu Chiki, Jesús tsuku masiya ktemplo anta niku wi “niku mujukan tumin” (Juan 8:20; Lucas 21:1). Uma wi kʼatrio niku tlan tanukgo lakpuskatin, niku latamanin ankgo mujukgo xtuminkan.

Akxni tlawakan fiesta, kʼuma atrio lu makaxkgakgekan katsisni. Anta wi akgtati laklanka candelabros chu akgtati laklanka tazones niku mujukan aceite. Umakgolh candelabros lu makgat makaxkgakgenankgo. Tuku Jesús wan uma kilhtamaku max kamalakapastaka tiku kgaxmatnimakgo uma makgskgot: «Akit xmakgskgot kakilhtamaku. Putum tiku nakistalani, ni katilatapulilh niku kapukswa, wata nakgalhi makgskgot xla latamat» (Juan 8:12).

Fariseos wanikgo pi nitlan tuku lichuwinama: «Wix miʼakstu lichuwinana mimpalakata; chu tuku wana ni xaxlikana». Pero Jesús kakgalhti: «Maski kiʼakstu klichuwinan kimpalakata, tuku klichuwinan xaxlikana, xlakata kkatsi niku kminitancha chu niku kama. Pero wixin ni katsiyatit niku kminitancha chu niku kama». Chu kawanipara: «Klimapakgsin nema kgalhiyatit, tatsokgnit: “Komo chatiy lakchixkuwin lakxtum tuku wankgo, xaxlikana tuku wankgo”. Akit kiʼakstu klichuwinan kimpalakata, chu xaTlat tiku kimalakgachalh lichuwinan kimpalakata» (Juan 8:13-18).

Pero fariseos ni lakgatikgo tuku kakgalhti Jesús, chu kgalhskinkgo: «¿Niku wi minTlat?». Jesús lakatitum kawani: «Wixin ni kilakgapasatit, nipara kinTlat. Komo xkilakgapastit, na xlakgapastit kinTlat» (Juan 8:19). Maski fariseos chuntiya chipaputunkgo Jesús, niti chuna tlawa.

Wa xlakata, Jesús wampara tuku xwanita: «Akit kama, chu wixin nakimputsayatit, pero naniyatit kmintalakgalhinkan. Niku akit kama, wixin nila tanatit». Pero judíos ni liwana akgatekgskgo  tuku kawani chu atanu tuku lakpuwankgo chu tsukukgo kgalhskininankgo: «¿Pi kawa xʼakstu amaka makgnikan? Xlakata wan: “Niku akit kama, wixin nila tanatit”». Ni akgatekgsnikgo Jesús xlakata ni katsikgo niku minitancha. Xla kawani: «Wixin xalak katutsu; akit xalak katalhman. Wixin xalak uma kakilhtamaku; akit ni xalak uma kakilhtamaku» (Juan 8:21-23).

Jesús kalitachuwinama latamat nema xkgalhi kʼakgapun akxni nina xmin kKatiyatni chu pi wa Mesías o Cristo nema xwankanit pi namin. Umakgolh xpulalinanin takanajla xlilakgapasatkan xwanit. Pero xlakan lakgmakgankgo chu kgalhskinkgo: «¿Tiku wix?» (Juan 8:25).

Xlakata lakgmakgankgo chu ni akxilhputunkgo, kawani: «¡Kaj kmakgapalama kkatachuwinaman!». Chu tsuku lichuwinan xTlat chu wan tuku xlakata judíos xlikgalhakgaxmatatkan xaKgawasa: «Tiku kimalakgachanit, wan tuku xaxlikana, chu tuku kkgaxmatli pi xwan, na watiya klichuwinama kkakilhtamaku» (Juan 8:25, 26).

Tuku Jesús kawani alistalh liwana masiya la lipawan xTlat, ni xtachuna judíos. Kawani: «Akxni mawakakanita xKgawasa chixku kkiwi, nakatsiyatit pi akit ama, chu nitu ktlawa kaj xlakata kintapuwan; wa tuku klichuwinan putum uma chuna la xaTlat kimasiyaninit. Chu Tiku kimalakgachanit akxtum kintawi; ni kiʼakstu kimakgxtakgnit, xlakata akit putum kilhtamaku ktlawa tuku makgapaxuwa» (Juan 8:28, 29).

Pero makgapitsi judíos kanajlanikgo Jesús chu xla kawani: «Komo kgalhakgaxpatatit kintachuwin, xlikana kistalaninanin litaxtuyatit, chu nalakgapasatit xaxlikana, chu xaxlikana nakalakgmaxtuyan» (Juan 8:31, 32).

Makgapitsi lisitsikgo pi Jesús kawani pi tlan nalakgtaxtukgo. Wa xlakata wanikgo: «Akinin xkamanan Abrahán chu niti xlakskujnin klitaxtunitaw. ¿Tuku xlakata wix wana: “Nalakgtaxtuyatit”?». Judíos katsikgo pi minit kilhtamaku makgapitsi kachikinin kaʼakgchipakgonit, pero ni lakgatikgo nakawanikan pi skujnin litaxtukgo. Pero Jesús kawani pi chuna: «Lu xlikana kkawaniyan pi putum tiku tlawa talakgalhin, kskujni talakgalhin litaxtu» (Juan 8:33, 34).

Umakgolh judíos katuwa wilikgo xlatamatkan akxni wankgo pi ni kskujni talakgalhin litaxtukgo. Jesús kawani: «Skujni ni putum kilhtamaku tamakgxtakga kchiki; xakgawasa tamakgxtakga putum kilhtamaku» (Juan 8:35). Skujni ni lakgchan namaxkikan herencia chu tlan namakglhtikan xtaskujut kaxatukawa kilhtamaku. Kajwatiya xakgawasa (o tiku xakgawasa liʼakxilhkan) tamakgxtakga kchiki putum kilhtamaku, uma wamputun, putum kilhtamaku nema latama.

Wa xlakata, xaxlikana xlakata xKgawasa Dios wa tuku kalakgmaxtu latamanin ktalakgalhin chu kkalinin putum kilhtamaku. Xaʼawatiya Jesús kawani: «Komo xaKgawasa kalakgmaxtuyan, nialh skujnin katilitaxtutit» (Juan 8:36).