Jesusan bautisasitapat niya kimsa maraw pasjjäna, 32 marajj niya tukuyañampëjjänwa. Jichhakiw Jerusalenan Tabernáculo Fiestajj pasaskäna, Jesusampi discipulonakapampejj uka fiestankapjjarakïnwa. Ukhamasti jichhajj uka jakʼankir markankasipkpachänwa (Lucas 10:38; Juan 11:1). Jesusajj sojjta phajjsinakaw Judeana jan ukajj Jordán Jawirat khurkatankir Perea cheqan yatichpachäna. Uka cheqanakan Diosat yatiyañajj wakisirakïnwa.

Pascua pasatat 30 maranjja, Jesusajj Judeana ukhamarak viajkasajj Samarianwa mä qhawqha phajjsinak yatiyäna. 31 maran Pascuajj jakʼachasinkäna ukhajja, Jerusalenankir judionakajj Jesusar jiwayañwa munapjjäna. Ukatwa Jesusajj mä mara chikatanejj alay toqenkir Galilean yatichäna. Uka tiempon waljaniw Jesusan arkiripar tukupjjäna. Jesusajj Galileanwa apostolonakapar yatiyir sarapjjañapatak wakichäna, ukatjja akham sasaw yatiyir khitäna: “Sarkasasti akham sasaw yatiyapjjäta: ‘Alajjpachankir Reinojj jakʼankjjewa’ sasa” (Mateo 10:5-7). Jichhajja, Judean yatiyañatakiw mä campaña wakichaskäna.

Judean yatiyañatakejja, Jesusajj 70 discipulonakaruw ajllïna, panin panini yatiyir khitarakïna. Ukhamasti 35 parejanakaw yatiyir sarapjjäna, ukanjja ‘cosecha apthapiñajj waljänwa, trabajirinakasti jukʼanikïnwa’ (Lucas 10:2). Jupanakajj kawkjarutï Jesusajj uka qhepat sarañapäkäna uka cheqanakaruw sarapjjäna. 70 discipulonakajj usutanakaruw qollapjjäna, Jesusajj yatichkäna uka yatiyäwi parlapjjarakïna.

Uka discipulonakajj janiw yatiyirejj sinagoganakaruk sarapjjañapäkänti, jan ukasti jaqenakan utanakapar sarapjjañapatakiw Jesusajj ewjjtʼäna, akham sasa: “Kawkin mä utar mantasasa, nayraqatajj akham sapjjam: ‘Sumankañajj aka utan utjpan’ sasa. Sumankañ munir mä jaqetï ukan utjani ukhajja, jumanakan utjki uka sumankañajj jupjjankaniwa” sasa. ¿Kunsa yatiyapjjañapäna? Jesusajj sänwa: “Sapjjarakim: ‘Diosan Reinopajj jumanakar jakʼachasinjjewa’ sasa” (Lucas 10:5-9).

Jesusajj mä mara nayra 12 apostolonakar ewjjtʼkäna uka pachpwa uka 70 discipulonakar ewjjtʼäna. Janiw taqenejj sum katoqapkätamti sasaw jupanakar sarakïna. Ukampis jupanakan chʼamachasitapajja, suma chuymaninakaruw yanaptʼañapäna, ukhamat Jesusajj qhepat sarañapäkäna ukhajja jupar sum istʼapjjañapataki ukhamarak yateqapjjañapataki.

Diosan Reinopat 70 yatiyirinakajj kuttʼanjjapjjäna ukhajja, akham sasaw Jesusarojj wali kusisit sapjjäna: “Tata, sutim aytasipjjta ukhajja, demonionakas nanakar istʼapjjetuwa” sasa. Jesusajj ukhamarakiw kusispachäna. Jupajj sänwa: “Nayajj uñjtwa, Supayajj niyaw alajjpachat  lliju llijur uñtat jaqoqtanjje. Nayajj munañanïñwa jumanakar churapjjsma, ukhamat asirunakaru alacrananakaru takjjatapjjañamataki” sasa (Lucas 10:17-19).

Kunayman jan walinakaruw saykatapjjäta sasaw Jesusajj discipulonakaparojj säna, uka jan walinakarojja asirunakarjama jan ukajj alacrananakarjamaw takjjatapjjañapäna. Ukhamarus Supayajj alajjpachat jaqoqataw uñjasini sasaw sarakïna. Ukjjarojja, kunas wali wakiskirejja uk amuyapjjañapatakiw 70 discipulonakaparojj Jesusajj yanaptʼarakïna. Akham sänwa: “Jumanakajj janiw demonionakamp istʼayasisakejj kusisipjjañamäkiti. Jan ukasti sutinakamajj alajjpachan qellqatätap laykuw kusisipjjañamajja” sasa (Lucas 10:20).

Munañap lurapjjañapatakejj humilde jaqenakaruw Diosajj chʼam churäna, ukajj Jesusar wal kusisiyäna, Jehová Diosaruw jachʼañcharakïna. Discipulonakapar uñtasajj sänwa: “Kunanaktï jumanakajj uñjapkta ukanak uñjirinakajj kusisipjjpan. Nayajj sapjjsmawa, kunanaktï jumanakajj uñjapkta ukanakjja, walja profetanakampi reyinakampiw uñjañ munapjjäna, ukampis janiw uñjapkänti. Kuntï jumanakajj istʼapkta ukanak istʼañsa munapjjarakïnwa, ukampis janiw istʼapkänti” sasa (Lucas 10:23, 24).