Afuɛ 32 su wa wie. Be yoli Zezi i batɛmun w’a di afuɛ nsan. Zezi nin i sɔnnzɔnfuɛ’m b’a wie kpata bo tranlɛ cɛn’n i di. Ɔ maan atrɛkpa’n, be te o Zerizalɛmun klɔ’n i wun lɛ. (Liki 10:38; Zan 11:1) Anglo nsiɛn kasiɛn nga Zezi dili i asiɛ’n su wa’n, ɔ fɛli i blɛ’n i dan lika dili Ɲanmiɛn junman’n Zide mɛn’n nin Pere mɛn’n nun. Pere mɛn’n wo Zurdɛn nzue ba’n i sin lɔ. Zezi yoli sɔ afin ɔ fata kɛ ɔ kan Ɲanmiɛn ndɛ kle lɔfuɛ mun wie.

Kɛ afuɛ 30 nun’n Zezi wieli Delɛ cɛn’n i di’n, ɔ kannin Ɲanmiɛn ndɛ’n Zide mɛn’n nun cɛli kan. Kpɛkun ɔ sinnin Samari mɛn’n nun ɔli Galile mɛn’n nun lɔ. Kɛ afuɛ 31 i Delɛ cɛn’n nun’n ɔ sɛli i sin Zerizalɛmun lɔ’n, Zuifu’m be kunndɛli kɛ bé kún i. I sin’n, ɔ ko kannin Ɲanmiɛn ndɛ’n Izraɛli i nglo lɔ lika’n nun, Galile mɛn’n nun lɔ. Ɔ dili afuɛ kun nin sin lɔ. Blɛ sɔ nun’n, sran kpanngban be kacili i sɔnnzɔnfuɛ. Kpɛkun ɔ kleli i akoto mun wafa ng’ɔ fata kɛ be kan Ɲanmiɛn ndɛ’n kle sran mun’n. I sin’n, ɔ sunmannin be. Ɔ seli be kɛ: “Amun bo ndolo se kɛ: ‘Ɲanmiɛn su lɔ Famiɛn dilɛ’n w’a mantan koko.’” (Matie 10:5-7) Ɔ maan siɛn’n, ɔ su siesie i sɔnnzɔnfuɛ mun naan be di junman kunngba sɔ’n wie Zide mɛn’n nun lɛ.

Zezi kpɛli i sɔnnzɔnfuɛ’m be nun ableso (70). I sin’n, ɔ sunmannin be nɲɔnnɲɔn naan be ko di junman sɔ’n wie Zide mɛn’n nun. Lɔ’n, “fie’n i su ninnge’m be kpɛlɛ junman’n ti dan. Sanngɛ junman difuɛ’m b’a sɔnman.” (Liki 10:2) Lika kwlaa nga Zezi wá kɔ́’n, be sran ableso’n (70) bé dún mmua kɔ́ lɔ. Bé yó tukpacifuɛ’m be juejue, yɛ bé bó jasin kunngba nga Zezi bo’n wie.

Nán Ɲanmiɛn sulɛ sua’m be nun yɛ ɔ fata kɛ Ɲanmiɛn ndɛ’n i kanlɛ’n yo be cinnjin-ɔn. Sanngɛ ɔ fata kɛ be wɔ awloawlo’m be nun kɛ nga Zezi waan be yo’n sa. Ɔ seli be kɛ: “Lika kwlaa nga amun kɔ’n, sɛ amun wlu awlo kun nun’n, amun dun mmua se kɛ: ‘Maan aunjuɛ’n tran awlo nga nun.’ Sɛ sran kun o lɛ naan ɔ klo aunjuɛ’n, aunjuɛ nga amun bo mɛnnin i’n, ɔ nin i trán.” ?Yɛ jasin benin yɛ bé bó klé sran mun-ɔn? Zezi waan: “Amun se sran mun kɛ: ‘Ɲanmiɛn i Famiɛn dilɛ’n w’a mantan amun koko.’”​—Liki 10:5-9.

Ndɛ nga Zezi kan kleli i akoto blu-nin-nɲɔn (12) mun i afuɛ kun yɛ’n, i kunngba’n yɛ ɔ kan kleli i sɔnnzɔnfuɛ ableso (70) mun-ɔn. Ɔ seli be kɛ sran ngba su sɔman be nun klanman. Sanngɛ kɛ mɔ bé dún mmua sín lika sɔ’m be nun ti’n, sran wie’m bé kúnndɛ kɛ bé síe be su Zezi m’ɔ sunmannin be’n i nuan bo naan ɔ kle be like.

Kɛ Zezi i sɔnnzɔnfuɛ ableso (70) mun be wieli junman’n i di’n, be ko wunnin i wun. Kɛ bé kɔ́’n, nn aklunjuɛ’n w’a kun be kpo. Be seli i kɛ: “E Min, kɛ e bo ɔ dunman sa’n, mmusu mun bɔbɔ be lo be wun be man e.” Ndɛ sɔ’n yoli Zezi i fɛ dan. Ɔ maan ɔ tɛli be su kɛ: “N wunnin kɛ Satan w’a fin ɲanmiɛn su lɔ w’a tɔ kɛ ɲanmiɛn m’ɔ kpa sin’n sa. Amun nian!  N mannin amun kwlalɛ kɛ amun fa tiatia wuo mun nin ɲannglan’m be su.”​—Liki 10:17-19.

Zezi kannin ndɛ sɔ’n fa wlɛli i sɔnnzɔnfuɛ’m be fanngan naan be wun i wlɛ kɛ ninnge tɛtɛ wie’m be su kleman be yalɛ. Ɔ maan ɔ ti kɛ be su tiatia wuo mun nin ɲannglan’m be su sa. Asa ekun’n, be kwla lafi su kɛ Satan fín ɲanmiɛn su lɔ ɔ́ tɔ́. Asa kusu’n, ɔ fɛli i sɔnnzɔnfuɛ ableso (70) mun be ɲin sieli like ng’ɔ ti cinnjin kpa’n su. Ɔ seli be kɛ: “Nán amun di aklunjuɛ mmusu mɔ amun kwla be’n ti. Sanngɛ amun di aklunjuɛ, afin b’a klɛ amun dunman ɲanmiɛn su lɔ.”​—Liki 10:20.

Aklunjuɛ’n kunnin Zezi i kpo. I sɔ’n ti’n, ɔ mɛnmɛnnin i Si i sɔnnzɔnfuɛ’m be ɲrun lɛ. Afin i Si fɛli i sufuɛ mɔ be ti wun ase kanfuɛ’n naan be di junman dan sɔ’n. I sin’n, ɔ kpɛli i ɲin i sɔnnzɔnfuɛ’m be wun lɔ. Ɔ seli be kɛ: “Be nga be wun ninnge nga amun su wun be yɛ’n, be liɛ su ti ye. Afin ń kán klé amun kɛ Ɲanmiɛn nuan ijɔfuɛ kpanngban nin famiɛn kpanngban, be kloli kɛ bé wún ninnge nga amun su wun be yɛ’n, sanngɛ b’a wunman be. Yɛ be kloli kɛ bé tí ndɛ nga amun su ti be yɛ’n, sanngɛ b’a timan.”​—Liki 10:23, 24.