Natulande pa fyacitike ku kupwa kwa mwaka wa 32 C.E., pa numa ya myaka itatu ukufuma apo Yesu abatishiwilwe. Tapakokwele ukufuma apo Yesu na basambi bakwe bafumiine ku Mutebo wa Nsakwe ku Yerusalemu. Kanshi bafwile bali lwa mupepi. (Luka 10:38; Yohane 11:1) Mu myeshi 6 iyasheleko, Yesu alibombele sana mu Yudea nelyo kwi shilya lya Mumana wa Yordani, mu citungu ca Perea. Abantu abaali muli ilya ncende baalingile ukumfwa imbila nsuma.

Pa numa ya Ca Kucilila icaliko mu 30 C.E., Yesu alibilile imbila nsuma pa myeshi iingi mu Yudea kabili alyendele sana mu Samaria. Lyena ilyo kwali Ica Kucilila mu 31 C.E., abaYuda mu Yerusalemu bafwaile ukumwipaya. Mu mwaka umo na hafu uwakonkelepo Yesu alesambilisha abantu ku kapinda ka ku kuso mu Galili. Pali ilya inshita, abantu abengi batendeke ukumukonka. Ilyo Yesu ali mu Galili, alisambilishe abatumwa bakwe no kubatuma mu kushimikila. Abebele ati: “Mulebila amuti, ‘Ubufumu bwa mu muulu nabupalama.’” (Mateo 10:5-7) Yesu alefwaya abasambi bakwe babile sana imbila nsuma mu Yudea.

Pa kuti bashimikile sana, Yesu asalile abasambi 70 no kubatuma babili babili. Kanshi aba bonse abasambi balebila imbila nsuma pa Bufumu muli iyi ncende, umwali ‘ukulobolola ukukalamba, lelo umo ababomfi bacepele.’ (Luka 10:2) Baile mu fifulo umo Yesu na o nalimo ali no kuya pa numa. Abasambi 70 balingile ukundapa abalwele no kubila imbila nsuma iyo na Yesu alebila.

Abasambi tabaalingile ukushimikila mu masunagoge. Yesu abebele ukuyashimikila abantu mu mayanda yabo. Atile: “Mu ng’anda yonse umo mwaingila, mubale musose amuti, ‘Umutende ube muli ino ng’anda.’ Kabili ngo muntu uulefwaya umutende e mo ali, umutende wenu ukaba pali ena.” Finshi balingile ukulandapo? Yesu abebele ati: “Mulebeba amuti: ‘Ubufumu bwa kwa Lesa nabupalama kuli imwe.’”—Luka 10:5-9.

Yesu aebele abasambi bakwe 70 ifyebo fimo fine nga filya aebele abatumwa 12 umwaka wafumineko. Abasokele ukuti te bonse abaali no kubapokelela. Lelo filya baleshimikila fyalengele abantu abengi abatemenwe icine ukufwaisha ukumona Shikulu Yesu e lyo no kasambililako kuli ena.

Balya 70 abaile babili babili mu kubila mbila nsuma pa Bufuma babweleele kuli Yesu ninshi balesekelela. Bamwebele abati: “Mwe Shikulu, ne fibanda na fyo filetunakila ilyo twalumbula ishina lyenu.” Yesu alitemenwe ilyo aumfwile aya mashiwi pantu abebele ati: “Namwene Satana  alepona nga filya fipona inkuba mu muulu. Moneni! namupeela amaka ya kunyanta pa nsoka na pali bakaling’ongo.”—Luka 10:17-19.

Yesu aebele abasambi ukuti bakacimfya ifya kwesha ifikabaponena, na mu mampalanya cikaba kwati balenyantaula pa nsoka na pali ba kaling’ongo. Kabili baalingile ukulaibukisha ukuti ku ntanshi, Satana akapona ukufuma ku muulu. Yesu alyafwile basambi bakwe 70 ukwishiba icacindeme sana. Abebele ukuti: “Mwisekelela pali ici, ukuti imipashi ilemunakila, lelo sekeleleni pa kuti amashina yenu nayalembwa mu muulu.”—Luka 10:20.

Yesu alitemenwe sana kabili atashishe Wishi pa cintubwingi pali filya abomfeshe ababomfi bakwe abalemoneka kwati ba pa nshi ku kucita ifya maka. Lyena aebele abasambi bakwe ati: “Yalishuka amenso ayamona ifyo mulemona. Pantu ndemweba, nati, bakasesema abengi ne shamfumu balefwaisha ukumona ifintu ifyo mulemona lelo tabafimwene, no kumfwa ifyo muleumfwa lelo tabafyumfwile.”—Luka 10:23, 24.