Éyoñe ji bi nto amane ya mbu 32 É.J.; den, a nga ke éko éziñe mimbu milal nté ane Yésus a nga duban. Ba beyé’é bé be ndôme tabe Abô’ô ya Tabernacle e Jérusalem. Be ngenan be yiane bo bebé a vôm ate. (Luc 10:38; Jean 11:1) Yésus a lôte ngon ésaman ja su’ulane na a bo ésaé jé e Judée nge e Pérée, Ôsôé Jourdain yat. Ésaé nkañete é ne fe mfi mefôla mete.

Ôsusua, éyoñe Paque ya mbu 30 É.J. a nga lôt, Yésus a nga nyoñ abim bengon éziñ na a kañete e Judée ôsusua na a ke mefôla ya Samarie. Mvuse ya valé, e Paque ya mbu 31 É.J., Bejuif ya Jérusalem be nga jeñe na be wôé nye. Mvuse ngume mbu a étun, Yésus a nga dañe ye’ele e nord, e Galilée, vôm abui bôt e nga su’ulane bo beyé’é bé. Yésus a nga yañele fe minlômane mié e Galilée, a lôme be na be ke a abendé di: “Katane mejô me Zambe, a jô na, [Éjôé] ya yôp é nto bebé.” (Matthieu 10:5-7) Éyoñe ji, a kômesan ôbane nkañete e Judée.

Asu na ô taté, Yésus a tobe beyé’é 70 a lôme be bebaé bebaé. Nde ñhe, a ne bekañete mbamba foé tañe mengap 35 be ne abôta’a nkañete, vôme “nkôane bidi ô ne abui, ve bebo bisaé be ne tyôtyoé.” (Luc 10:2, Mfefé Nkôñelan) Ba yiane ke vôme Yésus é tôñe be. Beyé’é 70 ba yiane saé minkôkon a kañete foé Yésus a jaéya zu a kañete.

Beyé’é be nji yiane su’u ve na ba kañete be synagogue. Yésus a kate be na, be ke vôme bôte be to. A ve be abendé di: “E nda éziñ mi ne nyiin, tata’a jôane na: mvo’é é tabe’e e nda nyô! Nge mona mvo’é a ne valé, e mvo’é jenan ja ye tabe be nye.” Foé fé ba yiane kañete? Yésus a jô na: “Jô’ane [be] na, Éjôé Zambe é subuya mia bebé.”​—Luc 10:5-9, Mfefé Nkôñelan.

Melebe Yésus a ve bôte 70 ma, me ne ane ma a nge ve minlômane 12 bebé mbu wua mvus. A nga kate be na, bôte bese ba ye ke be nyoñe mvo’é. Ve, ngule ba ve ja ye kômesane bôte be bili mbamba minlem asu ya na, éyoñe Yésus a ye so, abui e bo ôjeja’a ya yene Masa a yé’é abui mame be nye.

Mvuse ya valé, angôse bekañete mbamba foé 35 ba bulane be Yésus. Ba kate nye a meva’a mese na: “A Nti, ja’ane mimbia minsisim mia wô’ô bia a jôé dôé.” Foé éte ja yiane ve Yésus ava’a nlem amu a yalan a jô’ô na: “Me mbe me yenek Satan a so’o yôp, a kpwa’a si ane felefes. Mi lôô, me nga ve mia ngule ya wulu benyo yôp a alé.”​—Luc 10:17-19, Mfefé Nkôñelan.

Yésus a ve beyé’é bé ngule nyul a jô’ô na, ba  ye bo ngule ya dañe mam me ne ndeñele be fo’o ve ane ba fite benyo a alé. A fe na, be ne tabe ndi na, e melu ma zu, Satan a ye kpwébane si a so’o yôp. Yésus a volô fe beyé’é 70 na be tu’a yeme jame da dañe mfi éyoñ ése. A jô be na: “Te mia vak amu minsisim mia wô’ô mia, ve va’an amu môé menan me ntoo ntilan yôp.”​—Luc 10:20, Mfefé Nkôñelan.

Yésus a wô’ô abui mevak, nde a ye’elan Ésa wé e bôt été amu a belan e bôte ba sili bebiene si asu ya na be bo beta ésaé nyu. Éyoñ éte a fombô beyé’é bé a jô be na: “Ébotan a mis me ayene mam mi ayen: amu me ajô mia na bekulu mejô abui a bejô bôt be nga kômbô yene mam mi ayen, ve be nji yene me; be nga kômbô wô’ô mam mi awôk, ve be nji wô’ô me.”​—Luc 10:23, 24.