An be saan 32 laban na, saan saba ɲɔgɔn Yezu batizenin kɔ. A ma mɛɛn, ale n’a ka kalandenw tagara Gwatakɔrɔsigi seli la Zeruzalɛmu. N’a sɔrɔ u bele be a gɛrɛfɛduguw la (Luka 10:38; Zan 11:1). Kalo wɔɔrɔ minw tora, Yezu b’u fanba kɛ cidenya baara la Zude ani Pere maraw la, o minw be Zurudɛn baji kɔfɛ. Mɔgɔw mako b’a la ka kibaro diiman lamɛn o maraw la fana.

Saan damanin ka kɔn o ɲɛ, o kɔrɔ saan 30 ka Tɛmɛnkan seli tɛmɛnin kɔ, Yezu ye waajuli kɛ Zude mara la kalo caaman kɔnɔ ka sɔrɔ ka Samari cɛtigɛ. O kɔ, saan 31 ka Tɛmɛnkan seli surunya tuma na, Yahutu dɔw y’a ɲini k’a faga Zeruzalɛmu. Saan kelen ani kalo wɔɔrɔ o kɔ, Yezu ye jijaliba kɛ ka mɔgɔw kalan Galile mara la, saheli fan fɛ. Mɔgɔ caaman kɛra a ka kalandenw ye o yɔrɔ la. A ye fɔrɔmasɔn di a ka cidenw ma Galile ani a y’u ci. A ye cikan di u ma ko: “Aw ye waajuli kɛ ko sankolo masaya waati surunyana.” (Matiyo 10:5-7). O kɔ, a ye waajuli baara kanpaɲi dɔ labɛn Zude mara la.

Walisa k’o kanpaɲi daminɛ, Yezu ye kalanden 70 sugandi ani a y’u ci ka taga mɔgɔ fila fila. Mɔgɔ grupu 35 lo bena Masaya kibaro diiman waajuli kɛ yɔrɔ min na “suman tigɛta ka ca, nga baarakɛlaw man ca.” (Luka 10:2). Yezu y’a latigɛ ka taga yɔrɔ minw na, olu be kɔn a ɲɛɛ. O mɔgɔ 70 nunu ka cii ye ka banabagatɔw kɛnɛya ani Yezu be kibaro diiman min fɔra, u k’o jɛnsɛn yɔrɔ bɛɛ.

O kalandenw ka laɲinita fɔlɔ tɛ ka waajuli kɛ batosow kɔnɔ. Yezu y’a fɔ u ye k’u ka taga mɔgɔw fɛ u ka soo. A ko: “Ni aw donna so min kɔnɔ, aw k’a fɔ fɔlɔ ko: ‘Hɛrɛ ka kɛ nin so kɔnɔ.’ Ni hɛrɛden dɔ sɔrɔla yen, aw ka hɛrɛ na to a kan.” U ka ɲi ka waajuli kɛ mun lo koo la? Yezu ko: ‘A’ y’a fɔ o dugu mɔgɔw ye ko Ala ka masaya surunyalen bɛ u la.’—Luka 10:5-9, ABM.

Yezu tun y’o cikan ɲɔgɔnw lo di a ka ciden 12 nunu ma saan tɛmɛnin na. A ye kalandenw lasɔmi ko mɔgɔw bɛɛ tɛna u bisimila. Nka u ka jijaliw bena sira labɛn Yezu ye. N’a nana na kɔfɛ, mɔgɔ caaman bena kɔrɔtɔ k’u ka Matigi ye ani ka kalan sɔrɔ a fɛ.

Wagati damanin tɛmɛnin kɔ, o kalanden 70 kɔsegira Yezu fɛ. U ninsɔndiyanin y’a fɔ a ye ko: “Matigi, i tɔgɔ barika la, hali jinaw tun te se ka ban an ka fɔta ma.” O kumaw ye Yezu ninsɔndiya fɔɔ a y’a fɔ ko: “Ne ye Sutana bentɔ ye ka bɔ sankolo la i ko sanmanamana. N kɔni ye see d’aw ma ka taama saaw ni bunteniw kan.”—Luka 10:17-19.

Yezu y’u jigi sigi k’u bena see sɔrɔ fɛɛn juguw kan. A bena kɛ i n’a fɔ u be saaw ni bunteniw ɲɔɲɔna. Ka fara o kan, u be se ka la a  la ko sinima, Sutana bena fili ka jigi dugukolo kan. Yezu y’u dɛmɛ k’a faamu fana fɛɛn min kɔrɔtanin lo ka tɛmɛ o kan. A ko: “Aw kana nisɔndiya bari jinaw tun te se ka ban aw ka fɔta ma. Nga aw ka nisɔndiya bari Ala y’aw tɔgɔ sɛbɛn a fɛ sankolo la.”—Luka 10:20.

Yezu ninsɔndiyara kosɔbɛ ani a ye a Faa tando sabu a be baara kɛra n’a sagokɛla majiginin nunu ye cogo kabakoman na. A yɛlɛmana k’a ɲɛsin a ka kalandenw ma k’a fɔ u ye ko: “Koo minw be kɛra nin ye, aw minw be olu yera, aw dagamunin lo. Bari aw be koo minw yera, ne b’a fɔ aw ye ko kira caaman ni masacɛ caaman tun b’a fɛ k’o ye, nga u ma se k’o ye. Aw be min mɛnna, u tun b’a fɛ k’o mɛn, nga u m’o mɛn.”—Luka 10:23, 24.