Sa oti toka e tolu na yabaki na papitaiso i Jisu, qo sa icavacava ni 32 G.V. E se qai oti ga na Soqo ni Valevakacevaceva e Jerusalemi, ratou se rairai toka voleka ga e kea o Jisu kei na nona tisaipeli. (Luke 10:38; Joni 11:1) E vakayagataka na vo ni ono na vula o Jisu ena nona cakacaka vakaitalatala e Jutia se yasayasa vakaPeria ena taikadua ni Uciwai na Joritani ni vinakati me caka tale ga e keri na vunau.

Ni oti na Lakosivia ni 30 G.V., e vunau voli me vica na vula o Jisu e Jutia qai lakova na veivanua e Samaria. Ia era via vakamatei koya na Jiu e Jerusalemi ena Lakosivia ni 31 G.V. E dua gona veimama na yabaki nona veivakavulici voli o Jisu mai Kalili ena vualiku ra qai muri koya e levu ena gauna qori. Ni tiko voli mai Kalili o Jisu, e vakavulici ratou nona yapositolo qai vakarota: “Dou vunau, dou kaya, ‘Sa voleka na Matanitu vakalomalagi.’” (Maciu 10:5-7) Oti sa qai tuvanaka o Jisu na cakacaka vakavunau e Jutia.

E digitaki ira e liu na 70 na tisaipeli o Jisu, qai talai ira mera lako yarua. Era na cakacaka ena yalava ‘e levu kina na ka me tamusuki, ia era le lailai na tamata cakacaka.’ (Luke 10:2) Era na vakabulai ira na tauvimate na le 70, era na kacivaka tale ga na itukutuku e dau wewenigusui Jisu.

Era na sega ni vunau ga ena valenilotu na tisaipeli, e vakaroti ira tale ga o Jisu mera lako e veivale: “Ni oni curu ina dua na vale, moni kaya mada, ‘Me yaco na vakacegu ena vale qo.’ Ke tiko ena vale ya e dua e guta na bula vakacegu, ni vakacegui koya.” Na itukutuku cava mera kacivaka? E tukuna o Jisu: “Ni tukuna tale ga vei ira: ‘Sa voleka sara vei kemuni na Matanitu ni Kalou.’”—Luke 10:5-9.

E tautauvata na ivakaro i Jisu vei ira na le 70 kei ratou na 12 na yapositolo ena yabaki yani e liu. E veivakasalataki nira na sega ni veivakacegui kece na lewenivanua. Ia nodratou cakacaka era na vakarautaki kina o ira era vakarorogo, mera nanamaki ina nona sa vakarau yaco mai na Turaga o Jisu ra qai vuli vua.

Dua na ka nodra marau na le 70 nira lesu mai na cakacaka vakavunau, era kaya vei Jisu: “Turaga, era bau talairawarawa mada ga vei keimami na timoni ni keimami cavuta na yacamuni.” E marau tale ga o Jisu ni rogoca qori, e kaya: “Au raica ni sa lutu mai o Setani me vaka na tibi ni liva mai lomalagi. Raica! Au sa solia vei kemuni na kaukaua moni buturaka na gata kei na batibasaga.”—Luke 10:17-19.

E vakadeitaka o Jisu vei ira nona imuri ni na sega ni vakaleqai ira e dua na ka, qori na vakasama e tiko ena nodra buturaka vakaivakatakarakara  na gata kei na batibasaga. Mera nuidei nona imuri ni na lutu dina mai lomalagi o Setani. E vukei ira tale ga na le 70 o Jisu ena veika mera vakabibitaka. E kaya: “Me kua ni vu ni nomuni marau na nomuni vakamalumalumutaki ira na timoni, moni marau ga ni sa volai na yacamuni mai lomalagi.”—Luke 10:20.

Dua na ka nona marau o Jisu qai vakacaucautaki Tamana e matanalevu ni vakayagataki ira na nona dauveiqaravi yalomalumalumu mera cakava na itavi vakasakiti qori. Sa qai tukuna vei ira nona tisaipeli: “E kalougata na mata e raica na ka dou raica tiko. Au tukuna vei kemudou, era diva tu e levu na parofita kei na tui mera raica na ka dou raica, kena seva nira sega ni raica, mera rogoca tale ga na ka dou rogoca tiko, kena seva nira sega ni rogoca.”—Luke 10:23, 24.