Áño 32 opa potáma, ha ojapóma tres áñorupi Jesús ojevautisa hague. Haʼe ha idisipulokuéra ramoiténte oho kuri Jerusalénpe pe Enrramáda Guýpe Jeiko Areterã. Amalisia oĩ gueteri hikuái upépe (Lucas 10:38; Juan 11:1). Ofalta seis mésentema Jesús omano hag̃ua, ha haʼe opyta opredika Judéare ha pe sóna héravare Perea, opytáva ojehasávo rrío Jordán. Jesús ohechakuaa upérupi ojepredika vaʼerãha avei.

Áño 30-pe, pe Páskua rire Jesús opredika kuri unos kuánto mése Judéape ha ohasa Samáriarupi. Péro ojefestehárõ guare pe Páskua áño 31-pe, umi hudío oĩva Jerusalénpe ojukase kuri chupe. Upémarõ un áño imédiore Jesús opredika meme nórte gotyo, Galiléape. Upe tiémpope, heta persónagui oiko idisípulo. Galiléape Jesús ombokatupyry ha ohekomboʼe ijapostolkuérape opredika hag̃ua. Upéi heʼi chupekuéra: “Pepredika pehóvo ha peje: ‘Pe Rréino yvagapegua hiʼag̃uimbaitéma’” (Mateo 10:5-7). Upéi oorganisa chupekuéra ikatu hag̃uáicha ojepredika Judéare.

Oñepyrũ hag̃ua ko predikasión, Jesús oiporavo 70 disípulo ha omondo chupekuéra de a dos opredika hag̃ua Ñandejára Rréino pe território tuichakuére. Hiʼarive “hetaiterei oĩ pe kóga oñemonoʼõ vaʼerã, umi omonoʼõva katu saʼi” (Lucas 10:2). Haʼekuéra oho vaʼerã Jesús renonderã umi lugár haʼe ohotahárupi. Umi 70 disípulo omonguera hasýva ha opredika pe mensáhe Jesús opredikáva.

Koʼã 70 disípulo ndopytái opredika umi sinagógarupi. Jesús heʼi kuri chupekuéra oho vaʼerãha umi hénte rógape. Haʼe heʼi: “Peg̃uahẽvo peteĩ ógape peje raẽ: ‘Toĩ pyʼaguapy pende rógape’. Ha oĩramo upépe peteĩ ohayhúva pyʼaguapy, pende pyʼaguapy opytáta hendive”. ¿Mbaʼe mensáhepa omeʼẽta hikuái umi ogajárape? Jesús heʼi: “Peje [...] chupekuéra: ‘Ñandejára Rréino hiʼag̃uimbaitéma’” (Lucas 10:5-9).

Un áño upe mboyve, Jesús omondo kuri umi 12 apóstolpe opredika hag̃ua, ha omeʼẽ chupekuéra instruksión. Koʼág̃a Jesús omeʼẽ avei instruksión umi 70 disípulope, ha oavisa chupekuéra oĩtaha nohenduséiva pe mensáhe. Upéicharõ jepe, haʼekuéra oñehaʼã vaʼerã ojapo Jesús heʼi hagueichaite. Upéicha, ág̃a Jesús og̃uahẽvo opredika umi lugár rupi, umi hénte oikuaasejoatáma mávapa pe omondóva umi disípulope ha ohenduséta chupe.

Umi 70 disípulo pyaʼe ojapopa ipredikasión ha ou jeýma Jesús rendápe. Haʼekuéra ovyʼaiterei oúvo, ha heʼi: “Ore Ruvicha, umi demónio jepe opyta ore poguýpe roiporúvo nde réra”. Katuete ningo Jesús ovyʼaiterei avei ohendúvo koʼã notísia porãite. Upévare heʼi: “Ahecháma voi Satanás hoʼamaha yvágagui aratirícha. ¡Péina!, ameʼẽ peẽme autorida pepyrũ hag̃ua mbói ha alakrán rehe” (Lucas 10:17-19).

 Péicha Jesús oaseguráma idisipulokuérape ikatutaha ombohovái hikuái oimeraẽ mbaʼe ivaíva, ku opyrũrõguáicha “mbói ha alakrán rehe”. Avei haʼekuéra ikatu ojerovia oñemosẽtaha yvágagui Satanáspe. Jesús oipytyvõ umi 70 disípulope ohechakuaa hag̃ua mbaʼépa añetehápe pe iñimportantevéva. Haʼe heʼi: “Ani pevyʼa umi demónio opyta haguére pende poguýpe, pevyʼa guei pende réra ojehai haguére yvágape” (Lucas 10:20).

Jesús ovyʼaiterei Itúva ojevale haguére umi isiérvo iñumíldevare ojapo hag̃ua umi mbaʼe tuicháva. Upévare omombaʼeguasu Ñandejárape opavave renondépe. Ha ojere heʼi umi disípulope: “Ovyʼa umi ohecháva koʼã mbaʼe peẽ pehecháva. Che haʼe peẽme: Heta proféta ha rréi ohechase vaʼekue umi mbaʼe peẽ pehecháva péro ndohechái. Avei ohenduse vaʼekue umi mbaʼe peẽ pehendúva péro nohendúi” (Lucas 10:23, 24).