Maya udah datai ba ujung taun 32 M., kira-kira tiga taun pengudah Jesus dibaptisa. Jesus enggau bala murid iya baru abis ngintu Pengerami Belangkau ba Jerusalem. Sida engka agi ba endur ke semak enggau Jerusalem. (Luke 10:38; John 11:1) Jesus agi bisi enam bulan da agi kena nembuka pengawa nginjil iya. Maya nya, Jesus nginjil ba Judea tauka ba Perea ke bisi ba seberai Sungai Jordan. Tu ketegal, pengawa nginjil patut digaga ba semua endur nya.

Sebedau nya, pengudah Pengerami Paska kena taun 30 M., Jesus udah ngena beberapa bulan nginjil ba Judea sereta bejalai ba serata Samaria. Udah nya maya Pengerami Paska 31 M., orang Judah ba Jerusalem nguji deka munuh iya. Lalu dalam setaun setengah udah nya, Jesus suah agi nginjil ba Galili. Dalam timpuh nya, mayuh orang nyadi murid iya. Ba Galili, Jesus ngelatih bala rasul iya lalu ngasuh sida nginjil sereta meri iring tu: “Padahka ngagai orang: ‘Perintah serega nyau semak.’” (Matthew 10:5-7) Diatu, Jesus ngatur kimpin pengawa nginjil ti besai ba Judea.

Lebuh kimpin nya berengkah, Jesus milih 70 iku murid iya lalu ngasuh sida bejalai dua iku dua iku. Nya alai, bisi 35 pasangan murid Jesus ke nginjil pasal Perintah Petara ba endur alai “utai ti diketau endang mayuh, tang orang ke ngetau mimit.” (Luke 10:2) Sida deka bejalai dulu agi ari Jesus, lalu iya deka nitihka sida pengudah nya. Sida deka ngeraika orang ke sakit lalu nusui pesan ti sama baka ke ditusui Jesus.

Kati bala murid Jesus patut nginjil ba balai gempuru? Enda. Jesus ngasuh sida nginjil ngagai rumah orang. Ku iya: “Lebuh kita tama ngagai siti rumah, sebut dulu: ‘Awakka kita lantang senang.’ Enti orang ke rinduka pengelantang bisi dalam rumah nya, pengelantang kita deka mengkang ba orang nya.” Nama pesan ke patut ditusui sida? Jesus madah: “Padahka ngagai sida: ‘Perintah Petara nyau semak.’”—Luke 10:5-9.

Iring ke diberi Jesus ngagai 70 iku murid nya sama enggau iring ke diberi iya ngagai 12 iku rasul setaun sebedau nya. Jesus madah ngagai sida, enda semua orang deka nerima sida enggau manah. Tang, usaha bala murid ti bebendar ulih nulung orang ke deka nerima pesan Jesus. Nya alai maya Jesus datai, orang ke deka nerima udah besedia deka belajar ari iya.

Enda lama udah nya, 70 iku murid Jesus pulai baru ngagai iya. Sida amat gaga ati lalu madah: “Tuan, indah bala melikat ti jai pan ngasika kami lebuh kami ngena nama nuan.” Utai tu  tentu ngasuh Jesus gaga ati, laban iya madah: “Aku meda Sitan udah labuh ari langit baka kilat. Dinga kita! Aku udah meri kita kuasa kena ngindik ular enggau kala.”—Luke 10:17-19.

Jaku Jesus ke nyebut pasal ngindik ular enggau kala, ngasuh bala murid iya yakin sida deka mujur taja pan napi penanggul. Kelimpah ari nya, sida pan ulih yakin Sitan deka dibuai ari serega. Jesus mega nulung sida nemu utai ke penting agi. Iya madah: “Anang gaga ati ketegal bala melikat ti jai ngasika kita. Tang kita patut gaga ati ketegal nama kita udah ditulis ba serega.”—Luke 10:20.

Jesus balat gaga ati lalu ngemuliaka Apai iya ba mua orang mayuh, laban Iya udah ngena bala nembiak Iya ke baruh ati ngereja pengawa ti luar biasa. Lalu ku iya madah ngagai bala murid iya: “Gaga ati meh orang ke meda utai ke dipeda kita. Laban aku madah ngagai kita: Mayuh nabi enggau raja ingin meda utai ti dipeda kita, tang sida enda ulih meda utai nya. Sida ingin deka mendingka utai ti dipendingka kita, tang sida enda ulih ninga utai nya.”—Luke 10:23, 24.