72-تاراۋ
يسا 70 شاكىرتىن ۋاعىزداۋعا جىبەردى
-
يسا تاڭداپ العان 70 شاكىرتىن ۋاعىزعا جىبەردى
ب.ز. 32-جىلىنىڭ كۇزى. يسانىڭ شومىلدىرۋ راسىمنەن وتكەنىنە ٷش جىلداي ۋاقىت ٶتتى. ول شاكىرتتەرىمەن جاقىندا عانا يەرۋساليمگە بارىپ، كۇركەلەر مەيرامىن تويلاعان. قازىر ولار يەرۋساليمنىڭ توڭىرەگىندە جۇرسە كەرەك (لۇقا 10:38؛ جوحان 11:1). يسا قىزمەتىنىڭ سوڭعى التى ايىن كوبىنەسە ياھۋدەيادا جانە يورداننىڭ ارعى بەتىندەگى پەرەيادا وتكىزدى. بۇل ايماقتاردا دا ۋاعىزداۋ كەرەك بولدى.
بۇرىنىراقتا، ب.ز. 30-جىلىنىڭ قۇتقارىلۋ مەيرامىنان كەيىن، يسا ياھۋدەيادا بىرنەشە اي ۋاعىزداعان جانە ساماريا ارقىلى جول جۇرگەن. ال ب.ز. 31-جىلى يەرۋساليمدە قۇتقارىلۋ مەيرامى كەزىندە ونى ياھۋديلەر ولتىرمەك بولعان. سودان كەيىن يسا ٴبىر جارىم جىل بويى كوبىنە عاليلەيادا ۋاعىزدادى. سول ۋاقىت ارالىعىندا ٸزباسارلارىنىڭ قاتارىنا كوپ ادام قوسىلدى. عاليلەيادا جۇرگەندە، يسا ەلشىلەرىن دايىنداپ، ۋاعىزداۋعا جىبەرگەن. سوندا ولارعا: «كوك پاتشالىعى تاياپ قالدى!»— دەپ ۋاعىزداۋعا نۇسقاۋ بەرگەن (ماتاي 10:5—7). قازىر ول ياھۋدەيادا ٴدال وسىنداي ۋاعىزداۋ ناۋقانىن ۇيىمداستىرۋدا.
يسا شاكىرتتەرىنىڭ اراسىنان 70 ٸن تاڭداپ الىپ، ەكى-ەكىدەن ٴبولدى. ٴسويتىپ، 35 جۇپتى «جينايتىن ەگىن كوپ، ٴبىراق جۇمىسشىلار از» ايماققا پاتشالىق حابارىن ۋاعىزداۋعا جىبەردى (لۇقا 10:2). 70 شاكىرت يسا باراتىن جەرلەرگە الدىن الا بارىپ، اۋرۋلاردى ساۋىقتىرۋى جانە يسا جاريالاپ جۇرگەن حاباردى تاراتۋى كەرەك ەدى.
شاكىرتتەردىڭ باستى نازارى ٴماجىلىسحانادا ٴتالىم بەرۋ بولماۋ كەرەك. يسا ولارعا ۇيمە-ٷي جۇرۋگە نۇسقاۋ بەرىپ: «ٴبىر ۇيگە كىرگەندە اۋەلى: — وسى ۇيدە تاتۋلىق بولسىن!— دەپ تىلەڭدەر. ەگەر سول جەردە تاتۋلىقتى سۇيەتىن ادام بار بولسا، وعان تىلەگەندەرىڭ ورىندالادى»،— دەدى. شاكىرتتەر قانداي حاباردى ايتۋلارى كەرەك؟ يسا ولارعا «قۇداي پاتشالىعى تاياپ قالدى!» دەۋدى تاپسىردى (لۇقا 10:5—9).
يسا 70 شاكىرتىنە شامامەن ٴبىر جىل بۇرىن 12 ەلشىسىنە بەرگەن نۇسقاۋلاردى قايتالادى. ولارعا ادامنىڭ ٴبارى بىردەي حاباردى جىلى شىرايمەن قابىلدامايتىنىن ەسكەرتتى. ٴبىراق شاكىرتتەردىڭ ۋاعىزى بەكەر بولمايدى، ويتكەنى ىزگى نيەتتى ادامداردى يسانىڭ ٶزىن تىڭداۋعا دايىندادى. كوپ ۇزاماي سول ايماقتارعا يسانىڭ ٶزى باراتىن بولعاندىقتان، كوبى «ەگىننىڭ يەسىنەن» ٴتالىم الۋدى اسىعا كۇتەتىن بولادى.
كوپ ۇزاماي-اق پاتشالىق جايلى ۋاعىزداعان 35 جۇپ يساعا قايتىپ ورالدى. ولار قۋانا: «يەم، ٴسىزدىڭ اتىڭىزدان بۇيىرعاندا، ٴتىپتى جىندار دا باعىندى»،— دەستى. مۇنداي حابارعا يسانىڭ ريزا بولعانى ٴسوزسىز. سوندىقتان ول: «شايتاننىڭ لۇقا 10:17—19).
كوكتەن نايزاعايشا قۇلاپ تۇسكەنىن كوردىم. مىنە، مەن سەندەرگە جىلاندار مەن شايانداردى تاپتايتىن... بيلىك بەردىم»،— دەدى (يسانىڭ بۇل سوزدەرى شاكىرتتەرىنە زيان تيگىزەتىن نارسەلەرگە ۇستەمدىك ەتە الاتىنىنا، بەينەلى ماعىنادا جىلاندار مەن شايانداردى تاپتايتىنىنا سەنىمدىلىك بەردى. بۇعان قوسا، ولار شايتاننىڭ بولاشاقتا كوكتەن قۋىلاتىنىن ٴبىلدى. سوسىن يسا 70 شاكىرتىنە نەنىڭ شىن مانىندە ماڭىزدى ەكەنىن كورسەتىپ: «ٴبىراق جىنداردىڭ وزدەرىڭە باعىنعانىنا ەمەس، ەسىمدەرىڭنىڭ كوكتە جازىلعانىنا قۋانىڭدار»،— دەدى (لۇقا 10:20).
قاتتى قۋانعان يسا قاراپايىم قىزمەتشىلەرى ارقىلى قۇدىرەتتى ىستەر جاساعانى ٷشىن اكەسىن ماداقتادى. سوسىن شاكىرتتەرىنە بۇرىلىپ: «سەندەر كورىپ جۇرگەن نارسەلەردى كورگەندەر باقىتتى. سەندەرگە مىنانى ايتامىن: كوپتەگەن پايعامبارلار مەن پاتشالار سەندەر كورىپ جاتقانداردى كورگىسى كەلگەن، ٴبىراق كورگەن جوق. سەندەر ەستىپ جاتقانداردى ەستىگىسى كەلگەن، ٴبىراق ەستىگەن جوق»،— دەدى (لۇقا 10:23، 24).