Mwajinga mu mwaka wa 32 C.E., Yesu mo afikizhe myaka isatu kufuma kimye kyo abatizhiwe. Aye ne baana banji ba bwanga popo bafuminetu na kutaanwa ku Kijiilo kya Matente kyajinga mu Yelusalema. Kabiji pa kikye kimye kampe bakijinga kwipi na Yelusalema. (Luka 10:38; Yoano 11:1) Yesu waingijile mwingilo wanji pa bañondo batanu na umo bashajileko mu Yudea nangwa ku bushiya bwa Mukola wa Yodano mu kibunji kya Pelia. Ino nyaunda nayo bafwainwe kwingijilamo.

Panyuma ya Kijiilo kya Lupitailo mu 30 C.E., Yesu waikele bañondo bamo na kusapwila mu Yudea monse ne mu Samaliya. Kijiilo kya Lupitailo mu 31 C.E byo kyafwenyenyenga pepi, Bayudea ba mu Yelusalema bakebelenga kumwipaya. Byo papichile mwaka umo ne kichika, Yesu wafunjishenga mu Ngalilea ku kabeta ka buyeke. Pa kyokya kimye, bavula baikele baana banji ba bwanga. Mu Ngalilea, Yesu wafunjishe batumwa banji kabiji wibatumine ne kwibapa ino mikambizho amba: “Musapwilenga amba: ‘Bufumu bwa mwiulu bwafwenya pepi.’” (Mateo 10:5-7) Pa kyokya kimye, watatwile mukwekele wapeleleko wa kusapwila mu Yudea.

Yesu watatwile uno mukwekele kupichila mu kusala baana ba bwanga 70 ne kwibatuma babiji babiji. Onkao mambo, mabumba onse ajinga 35 a basapwishi ba Bufumu a kwingijila mu nyaunda mwajinga ‘mwingilo wa kunowa wabaya mwakepele bamwingilo.’ (Luka 10:2) Ano mabumba atangijileko kuya mu mizhi yonse ne mpunzha mwakebelenga kuya Yesu. Bano 70 bafwainwe kubuka bakolwa ne kusapwila mambo asapwijilengapo Yesu.

Bano baana ba bwanga 70 kechi bafwainwe kutatu muchima pa kusapwila mu mashinagoga ne. Yesu wibabuujile kuya mu mazubo a bantu ne kwibambila’mba: “Mu nzubo monse mo mukatwela, patanshi mukambe’mba: ‘Mutende ekale mu ino nzubo.’ Kabiji umvwe mulunda wa mutende mo aji, mutende wenu ukekala pe aye.” Ñanyi byambo byo basapwijilenga? Yesu wibabuujile kusapwila’mba: “Bufumu bwa Lesa bwafwenya pepi ne anweba.”—Luka 10:5-9.

Mikambizho Yesu yo apele baana ba bwanga 70 yajingatu pamo na yoya yo apele batumwa banji 12 kimye kyo ebatumine na kusapwila mwaka umo wapichilepo. Wibajimwineko’mba kechi bonse bantu bakebatambwila bulongo ne. Kabiji mwingilo wabo wakwashishe bingi bantu bajinga na muchima wa kukeba kufunda, kya kuba kimye Yesu kyo aishile bakebeshe bingi kumonañana nanji ne kufunda kwi aye.

Ponkapotu aba basapwishi ba Bufumu 70 bayile babiji babiji babwelele kwi Yesu ne kwamba na lusekelo amba: “Nkambo, ne bandemona babena kwitukookela na mambo a kwingijisha jizhina jenu.” Uno sawakya wawama wa mwingilo wasangajikile bingi Yesu, mambo waambile’mba: “Namona Satana wapona kala mwiulu nobe kubesha kwa mvula. Nemupa luusa lwa kunyanta pa miloolo ne tuminye.”—Luka 10:17-19.

Onkao mambo, Yesu walayile baana banji ba bwanga amba bakashinda bintu byatama, ko kuba’mba  bakanyatanga pa miloolo ne tuminye mu bukifwanyikizho. Kabiji bafwainwe kuketekela’mba Satana ukapona kufuma mwiulu. Yesu wakwashishe ne baana ba bwanga 70 kuyuka kintu kyanema kikobiwa kulutwe. Wibambijile’mba: “Kange musekele na mambo a kuba’mba mipashi ibena kwimukookela ne, bino sekelai mambo mazhina enu anembwa mwiulu.”—Luka 10:20.

Yesu wasangalele bingi ne kutota Shanji na mambo a kwingijisha bakalume bepelula kwingila ino mingilo ya kukumya. Byo aalulukijile ku baana banji ba bwanga wibambijile’mba: “Bo ba lusekelo aba bamona bintu byo mubena kumona. Mambo nemwambila namba, bangauzhi ne bamfumu bavula bakebelenga kumona bintu byo mubena kumona, pano bino, kechi bebimwene ne, ne kumvwa bintu byo mubena kumvwa, bino kechi bebyumvwine ne.”—Luka 10:23, 24.