Seli kwa mafelelezo a silimo sa 32 C.E., mi seibato ba lilimo zetaalu kuzwa fa kolobelezwa Jesu. Yena ni balutiwa bahae kihona basazo zwa kwa Mukiti wa Litabernakele mwa Jerusalema. Mwendi basali bukaufi ni Jerusalema. (Luka 10:38; Joani 11:1) Mane Jesu uina hahulu mwa Judea ili mwabuse bwa Nuka ya Jordani mwa sikiliti sa Perea, ka likweli ze 6 zesiyezi za bukombwa bwahae. Jesu utokwa kukutaza ni mwa libaka ze.

Kwa makalelo, hamulaho wa Paseka ya silimo sa 30 C.E., Jesu naakutalize mwa Judea ka likweli-nyana mi naafitile ni mwa Samaria. Ibato ba ka nako ya Paseka ya silimo sa 31 C.E., Majuda ba mwa Jerusalema hababata kumubulaya. Ka silimo ni likweli ze 6 kuzwafo, hañata Jesu naakutalezanga kwa mutulo, mwa Galilea. Ka nako yeo, batu babañata baba balateleli bahae. Mwa Galilea, Jesu naalutile baapositola bahae mwa kukutaleza mi kihona abafa taelo ni kubaluma, ali: “Mukutaze, muli: ‘Mubuso wa mahalimu usutelezi.’” (Mateu 10:5-7) Jesu cwale uonga-onga musebezi wakufa bupaki mwa Judea.

Kuli akalise musebezi wo, Jesu uketa balutiwa ba 70 mi ubaluma bababeli ka bababeli. Ka mukwa ocwalo, kunani likwata ze 35 za bakutazi ba Mubuso mwa sibaka se, ili mo “kutulo ki yetuna, kono babeleki ki babanyinyani.” (Luka 10:2) Banani kuitangeta mwa libaka mwaka yo kutaleza Jesu. Balutiwa ba 70 baka folisa bakuli ni kushaela lushango lwasweli kukutaza Jesu.

Balutiwa ba habaswaneli kukutaleza mwa masinagoge. Jesu ubabulelela kuli baye kwa mandu a batu. Ubalaela kuli: “Mwa ndu ni ndu yemukena ku yona, mubulele pili muli: ‘Kozo ibe mwa ndu ye.’ Mi haiba kunani mulikanaa kozo mwateñi, kozo yamina ikasiyala ku yena. Kono haiba haayo, kozo yamina ikakutela ku mina.” Baswanela kukutaza taba mañi? Jesu uli: “Mubabulelele, muli: ‘Mubuso wa Mulimu usutelezi fakaufi ni mina.’”—Luka 10:5-9.

Litaelo zafa Jesu kwa balutiwa ba 70 zaswana ni zanaafile baapositola ba 12 hanaabalumile kwa kukutaza ibato ba silimo kwamulaho. Ubalemusa kuli haki batu kaufela babaka baamuhela hande. Nihakulicwalo, buikatazo bwabona bukatusa batu babatabela kuli Jesu hakataha hasamulaho, abafumane kuli baitukiselize kubona Muluti ni kuituta ku yena.

Hamulaho wa nakonyana, likwata ze 35 za bakutazi ba Mubuso zakutela ku Jesu. Bamubulelela ka tabo kuli: “Mulena, nihaiba madimona aluutwa ka kuitusisa libizo lahao.” Kaniti, Jesu utabiswa ki piho yende yeo, kakuli uli: “Nibona  Satani awile kale sina lumonyi lwa pula kwa lihalimu. Hamubone! Nimifile maata a kuhatikela linoha ni tubanze.”—Luka 10:17-19.

Ka mukwa ocwalo, Jesu usepisa balutiwa bahae kuli baka kona kutiyela lika zemaswe, ili nto yeswana ni kuhatikela linoha ni tubanze. Hape bakona kuba ni buikolwiso bwakuli kwapili Satani uka wisiwa kwa lihalimu. Hape Jesu utusa balutiwa bahae ba 70 kuziba nto ya butokwa hahulu. Uli: “Musike mwataba kabakala kuli mioya yamiutwa, kono mutabe kabakala kuli mabizo amina añozwi mwa mahalimu.”—Luka 10:20.

Jesu wawabelwa mi ulumbeka Ndatahe fapilaa nyangela, ka kusebelisa batanga bahae babaikokobeza kueza misebezi yemaata yeo. Usikuluhela kwa balutiwa bahae ni kubabulelela kuli: “Tabo ki ya meeto abona lika zemubona. Kakuli nimibulelela nili, bapolofita ni malena babañata nebanyolezwi kubona lika zemubona, kono nebasika libona, ni kuutwa lika zemuutwa, kono nebasika liutwa.”—Luka 10:23, 24.