Tudi ku ndekelu kua tshidimu tshia 32 B.B., bidimu bitue ku bisatu katshia Yezu wabatijibua. Yeye ne bayidi bende bavua bafuma ku dienza Tshibilu tshia Nzubu ya ntenta mu Yelushalema. Badi pamuapa mua kuikala batshidi pabuipi apu. (Luka 10:38; Yone 11:1) Mu bulelela, Yezu uvua mupitshishe ngondo ya bungi ya ku isambombo ya mudimu ivua mimushadile mu Yudaya anyi dia muamua dia Musulu wa Yadene mu distrike dia Peleya. Bivua bikengela kuyisha kabidi mu miaba eyi.

Matuku makese bobu bamane kuenza Pasaka wa mu 30 B.B., Yezu wakapitshisha imue ngondo uyisha mu Yudaya ne wenza ngendu mu Samalea. Pashishe, pabuipi ne Pasaka wa mu 31 B.B., bena Yuda ba mu Yelushalema bakateta bua kumushipa. Tshidimu tshijima ne tshitupa tshivua tshilonda, Yezu wakayisha nangananga ku nord mu Galela. Tshikondo atshi, bantu ba bungi bakalua bayidi bende. Mu Galela, Yezu wakalongesha bapostolo bende ne pashishe kubatumaye ubapesha dîyi dia kulonda edi: “Nuyishe, nuamba ne: ‘Bukalenge bua mu diulu mbusemene pabuipi.’” (Matayi 10:5-7) Mpindieu udi ulongolola kampanye ka kuyisha mu Yudaya.

Bua kutuadija kampanye aka, Yezu wakasungula bayidi 70, kubatumaye babidi babidi. Nunku, kuvua tusumbu 35 tua bamanyishi ba Bukalenge mu teritware muvua ‘bia kunowa bia bungi, kadi bena mudimu bakese.’ (Luka 10:2) Bavua ne bua kudianjila mu muaba uvua Yezu ne bua kulonda pashishe. Bantu 70 aba bavua ne bua kuondopa babedi, ne kumuangalaja mukenji uvua Yezu uyisha.

Bayidi aba kabavua ne bua kuyisha anu mu nsunagoga to. Yezu wakabambila bua kuya ku nzubu ya bantu. Wakabambila ne: “Muaba wonso unudi nubuela mu nzubu, nuanji kuamba ne: ‘Nzubu eu ikale ne ditalala.’ Nunku, bikalamu mulunda wa ditalala, ditalala dienu nedishale kudiye.” Mmukenji kayi uvuabu ne bua kuyisha? Yezu wakamba ne: “Nubambile ne: ‘Bukalenge bua Nzambi mbusemene pabuipi nenu.’”​—Luka 10:5-9.

Mêyi a kulonda adi Yezu muambile bantu 70 aba mmafuanangane ne avuaye muambe pavuaye mutume bapostolo bende 12 bu tshidimu tshijima kumpala. Udi ubadimuija ne: ki mbantu bonso bikala ne bua kubakidila to. Kadi malu enzabu neambuluishe bantu ba muoyo muimpe bua ne: padi Yezu ulua matuku makese pashishe, ba bungi bikale ne dijinga dikole dia kuakidila Mukalenge ne kulonga malu kudiye.

Matuku makese, tusumbu 35 tua bamanyishi ba Bukalenge etu tudi tupingana kudi Yezu. Badi bamuambila ne disanka dionso ne: “Mukalenge, too ne bademon badi bakokeshibua kutudi patudi tutela dîna diebe.” Kakuyi mpata luapolo luimpe elu luakasankisha Yezu, bualu wakabambila ne: “Ndi mumone Satana mumane kukuluka ufuma mu diulu bu mupenyi wa mvula. Monayi! Ndi munupeshe bukokeshi bua kudiata nyoka ne tuminyiminyi mu makasa.”​—Luka 10:17-19.

 Nunku Yezu wakajadikila bayidi bende ne: bavua ne bua kutshimuna bintu bivua mua kukeba njiwu, bienze anu bu ne: bavua badiata nyoka ne tuminyiminyi. Bualu bukuabu, bavua ne bua kuikala bashindike ne: Satana uvua ne bua kuedibua panshi. Yezu wakambuluisha bantu 70 abu bua kumona tshivua bushuwa ne mushinga mu mudimu wa matuku a bungi eu. Wakamba ne: “Kanusanki bua mudi nyuma ikokeshibua kunudi, kadi nusanke bua mudi mêna enu mafunda mu diulu.”​—Luka 10:20.

Yezu uvua ne disanka dia bungi ne wakatumbisha Tatuende patoke bua muvuaye mukuate mudimu ne bantu bende bena budipuekeshi abu mu mushindu wa pa buawu eu. Wakambila bayidi bende ne: “Mêsu adi amona malu anudi numona aa nga diakalenga. Bualu ndi nnuambila ne: Baprofete ba bungi ne bakalenge bavua bajinga kumona malu anudi numona aa, kadi kabakaamona to, ne bavua bajinga kumvua malu anudi numvua aa, kadi kabakaumvua to.”​—Luka 10:23, 24.