Gore ro 32 N.V.Y. roda kupera zve Jesu waana makore matatu naabhabhatijwa. Iyena no vajiji sasambi uno vaenga ku Dhiri ro Tabherinake ku Jerusarema. Zvinovoneka inga kuti vaciri phedopo. (Luka 10:38; Johani 11:1) Jesu anopeja mukuvo wakakura wo mweji mutandhatu jasara wari jo mushando wake, ari mu Judheya. Kana mwombera kumweni ko Murambo wa Jordhani, dhistritu yo Pereya. Ndharaundha iji jinodavo kucumaihwa.

Pakandopera Phasika yo mu gore ro 30 N.V.Y., Jesu wakapeja mweji munganani acicumaira mu Judheya acikhirira ngo Samaria. Perepo, pa mukuvo wo Phasika yo mu gore ro 31  N.V.Y., vaJudha vakapsaka kumuuraya mu Jerusarema. Pa gore rakatevera no meya, Jesu wakajijisa maningi-ningi mu Garireya, ngo divi ro kanjikazi. Vandhu vakawanda vakava vateveri va Jesu pa mukuvo wondhowo. Jesu wakaroveja vajiji vake mu Garireya no kuvatumira vano ndhungamiriro yokuti, “tokotesanyi kuti Umambo hwo mugore huri phedo.” (Mateu 10:5-7) Jesu wari ari kuronga fafanya yo kuita ucapupu mu Judheya.

Kuti atange fafanya iyi, Jesu anosana 70 o vajiji, wovatumira vaviri vaviri. Ngokudaro, mundima muno zvikwata 35 zvo vacumairi vo Umambo vari mu “munda wakakura, varanda vaxoma.” (Luka 10:2) Ivona vangazotevera mundau jaanozoenda Jesu. 70 o vajiji ava vanodikana kurapa vanohwaja no kucumaira masoko ari kutokoteswari ndi Jesu.

Vajiji ava avadikani kubatikana pa kujijisa mu masinagoga. Jesu anovabvunja kuti vacumaire mu nyumba jo vandhu. Ivona vanopuwa ndhungamiriro iji: “Pa muzi uriwese wo munonghwina, nanganyi kudari: ‘Kunyarara ku nyumba ii!’ Kudari mu nyumbemo muno mundhu wo kunyarara, kunyarara kwenyu kunozogara nayena.” Vanozocumairenyi? Jesu anoti: ‘Bvunjanyi vese kuti: Umambo hwa Mwari huri kuguma komuri.’—Luka 10:5-9.

Ndhungamiriro jinopuwa 70 o vajiji ava ndi Jesu jakaezana no jaakapa vapostori 12 gore rakapera. Iyena anovaruma jeve kuti asipi vese vanozovaashira ushoni. Asi, kuvangisira kwavo kunozonasirira vanoda kupurukira kuitira kuti vave no cido co kuzwa no kujija ndi Jesu inga Tenji wavo, paanozoviya pa mukuvo munganani unozari.

Azvizivi kutora mukuvo wakareba kuti 35 o zvikwata izvi zviviye kuna Jesu. Ivona vanosumurira Jesu no mudakaro veciti: “Tenji! Ngo zina renyu, na iwona mabjoka anotizwira.” Jesu anodakara maningi ngo masoko aushoni aya zve anoti: “Inini ndakavona Sathana eciwa kubva mugore, inga mbheni. Ndamupa simba kuti mufambe panyezuru po bzinyavada.”—Luka 10:17-19.

Ngo masoko aya, Jesu anothembesa vateveri vake kuti vanozokwanisa kunyisa zviro zvinokhuvaza inga kuti vari kucika nyoka no zvinyavada.  Kusiyapo izvo, vanodikana kunyinda kuti Sathana anozowa kubva kumatenga, kumbejiyo. Jesu anobeserazve 70 o vajiji kuvona kuti ngocapi cinosisira maningi. Iyena anoti: “Mucadakara ngokuti mabjoka anomuzwira, kaveta dakaranyi ngokuti mazina enyu akatahwa mugore.”—Luka 10:20.

Jesu anodakara maningi no kusimba Babake pambhene ngo kushandisa kwavo vabatiri vavo vanojidodokesa ngo njira ino simba. Perepo anobvunja vajiji vake kudari: “Ano mucena majiso anovona bzomunovonari. Ndinomubvunja kuti: Vaporofeti vazinji no majimambo vaida kuvona bzomunovonari, avazivi kubzivona; no kuzwa bzomunozwari, avazivi kubzizwa.”—Luka 10:23, 24.