Bjale ke go ya bofelong bja ngwaga wa 32 C.E., mo e ka bago nywaga e meraro ga e sa le go tloga ge Jesu a kolobetšwa. Morago bjale, yena le barutiwa ba gagwe ba be ba le Monyanyeng wa Ditaberenakele kua Jerusalema. Go ka direga gore ba sa dutše ba le kgauswi le moo. (Luka 10:38; Johane 11:1) Ge e le gabotse, Jesu o diriša nako e ntši ya dikgwedi tše tshelelago tše di šetšego tša bodiredi bja gagwe a le Judea goba ka mošola wa Noka ya Jorodane seleteng sa Perea. Le mafelong ao ka moka boboledi bo swanetše go dirwa.

Pejana, ka morago ga Paseka ya 30 C.E., Jesu o ile a fetša dikgwedi tše sego kae a dira boboledi kua Judea gomme a sepela go phatša Samaria. Ke moka mo e ka bago ka Paseka ya 31 C.E., Bajuda ba Jerusalema ba ile ba leka go mmolaya. Ngwageng o latelago le seripa, Jesu o ile a ruta kudu karolong ya ka leboa kua Galilea. Batho ba bantši ba ile ba fetoga balatedi ba gagwe ka yona nako yeo. Kua Galilea, Jesu o ile a tlwaetša baapostola ba gagwe ke moka a ba roma ka taelo e rego: “Le bolele le re: ‘Mmušo wa magodimo o batametše.’” (Mateo 10:5-7) Bjale o rulaganya lesolo la go nea bohlatse kua Judea.

Jesu o thoma lesolo le ka go kgetha barutiwa ba 70 le go ba roma ka babedi ka babedi. Ka go re’alo, go na le dihlopha tše 35 tša batho bao ba bolelago ka Mmušo lefelong leo, moo ‘puno e lego e kgolo eupša bašomi e le ba sego kae.’ (Luka 10:2) Batho ba ba tla eta Jesu pele ka go ya mafelong ao ka morago a ka yago go ona. Barutiwa ba ba 70 ba swanetše go fodiša balwetši le go tsebatša molaetša woo Jesu a bego a dutše a o tsebatša.

Barutiwa ba ga se ba swanela go ruta disinagogeng. Jesu o ba botša gore ba ye magaeng a batho. O ba laela gore: “Kae le kae mo le tsenago gona ka ntlong le thome ka gore: ‘Eka ntlo ye e ka ba le khutšo.’ Ge e ba mogwera wa khutšo a le gona, khutšo ya lena e tla ba go yena.” Molaetša wa bona e tla ba ofe? Jesu o re: “Le ba [botše] gore: ‘Mmušo wa Modimo o le batametše.’”—Luka 10:5-9.

Ditaelo tšeo Jesu a di neago ba 70 di swana le tšeo a di filego ge a be a roma baapostola ba 12 mo e ka bago ngwaga pejana ga moo. O ba lemoša ka gore ga se bohle bao ba tlago go ba amogela gabotse. Lega go le bjalo, maiteko a bona a tla lokišeletša bao ba ba amogelago gabotse gore ge Jesu a fihla ka moragonyana, ba bantši ba fagahlele go kopana le Mong wa bona le go ithuta go yena.

Go se go ye kae, dihlopha tše 35 tša bao ba bolelago ka Mmušo di boela go Jesu. Ka lethabo di mmotša gore: “Morena, re laola gaešita le batemona ka go diriša leina la gago.” Ruri pego ye e botse e thabiša Jesu, ka ge a arabela ka gore: “Ke thomile go bona Sathane a šetše a wele legodimong ka lebelo la go swana le la legadima. Bonang! Ke le neile matla a go gatakela dinoga le diphepheng ka dinao.”—Luka 10:17-19.

Ka go re’alo Jesu o kgodiša balatedi ba gagwe gore ba tla kgona go fenya dilo tše kotsi, ka tsela ya seswantšhetšo ba tla gatakela dinoga le diphepheng. Go oketša moo, ba ka kgodišega gore nakong e tlago Sathane o tla wa a etšwa legodimong. Le gona Jesu o thuša barutiwa ba 70 go bona seo ruri e lego sa bohlokwa ge nako e dutše e eya. O re: “Le se ke la thabišwa ke gore le laola meoya e mebe, eupša thabang gobane maina a lena a ngwadilwe magodimong.”—Luka 10:20.

Jesu o thabile kudu gomme o tumiša Tatagwe phatlalatša bakeng sa go diriša bahlanka ba ba gagwe bao ba ikokobeditšego ka tsela e matla gakaalo. Ge a retologela go barutiwa ba gagwe, o ba botša gore: “Go thaba mahlo a bonago dilo tšeo le di bonago. Gobane ke re go lena: Baporofeta ba bantši le dikgoši tše dintši ba be ba dumile go bona dilo tše le di bonago eupša ga se ba ka ba di bona, le go kwa dilo tše le di kwago eupša ga se ba ka ba di kwa.”—Luka 10:23, 24.