Pahe enima 32 P.K., ankho lihungi kokupwa iya kuakamba katutu opo Sesusi atuukise omanima etatu okutuka apa ambatisalwa. Ankho palamba omuvo uhehi tunde etyi Sesusi novalongwa vae vaile Kotyipito Tyomakaka mo Selusalei. Mahi nkhele ankho kavaile kokule. (Luka 10:38; Suau 11:1) Monohanyi epandu ankho mbesala-ko, Sesusi aivisa mo Sundeya, ine aivisa alo konthele onkhuavo Yondongi Solondau, mo Peleya. Povilongo opo ankho nkhele pesukisa okuiviswa.

Konyima yotyipito tyo Pasikwa mo 30 P.K., Sesusi akala onohanyi mbumwe mo Sundeya nokuivisa iya akuate mo Samaliya aende ko Ngalileya. Pahe tyina Opasikwa mo 31 P.K., ikahi popepi, ova Sundeu mo Selusalei avahande okumuipaa. Etyi palamba enima notyihupe, Sesusi haunene alongesa mo Ngalileya. Mokueenda kuomuvo oo, ovanyingi avakala ovalanduli vae. Ko Ngalileya, Sesusi alongesa ono apositolu mbae iya evetumu vakaivise, ati: “Popiei okuti: ‘Ouhamba wo keulu ukahi popepi.’” (Mateusi 10:5-7) Pahe eveonganeka opo vaundapa otyema okuivisa mo Sundeya.

Opo vahimbike okuundapa otyema okuivisa, Sesusi aholovona ovalanduli 70, evetumu vevali-vevali vakaivise. Moluotyo, avaivisa Ouhamba motyilongo tyo Ngalileya, muna ankho “ovilinga viokuteya ovinyingi, mahi ovaundapi kavehi.” (Luka 10:2) Ankho vena okuenda vali kovilongo ovikuavo oku ankho Sesusi maende. Iya ovalongwa 70 ankho mavahakula ovavei, avayandyanesa onondaka ankho Sesusi ekahi nokuivisa.

Ovalongwa ovo, ankho kavapondola vala okulongesila monondyuo mbokufendela. Sesusi wevepopila okuti, endei momaumbo ovanthu. Ankho wevelongesa okuti: “Meumbo muamanyingila tetekelei okupopia okuti: ‘Meumbo muno mukale ombembwa.’ Inkha muna ovanthu vombembwa, ombembwa yenyi maikala navo.” Oityi ankho mavapopi? Sesusi wati: “Vepopilei okuti: ‘Ouhamba wa Huku ukahi popepi.’” — Luka 10:5-9.

Ovipuka Sesusi alongesa ovalanduli vae 70 ankho vielifwa nevi alongesile potete ono apositolu mbae 12. Ankho wevelondola okuti ha aveho mavevetambula nawa. Mahi ononkhono mavalingi, ankho mambukuatesako ovanthu okulipongiya opo vatambule Sesusi tyina ameya, iya ovanyingi ankho mavahande okulivasa na Tatekulu, opo valongeswe.

Ovalongwa 70 avakondoka ku Sesusi etyi vaivisa Ouhamba wa Huku. Avemupopila nehambu okuti: “Tatekulu, alo umwe ovilulu vitutavela tyina tuundapesa enyina liove.” Ovipuka oviwa vapopia avihambukiswa Sesusi, evepopila okuti: “Ame ndyiete Satanasi watoka-le keulu ngomuliakulo. Talei! Ame nemuavela epondolo liokuliata ononyoka nononge.” — Luka 10:17-19.

Sesusi wapopia onondaka mbaavela ovalongwa vae onthumbi yokuti mavetyivili okulambela movitateka, vikahi ngatyina ononyoka nononge. Tupu ankho vapondola okukala nonthumbi yokuti komutwe wandyila Satanasi keulu makatoka-ko. Sesusi tupu akuatesako ovalongwa vae vanoñgonoke etyi tyihambukiswa vali unene. Evepopila okuti: “Muhahambukwei mokonda ovilulu viemutavela, mahi hambukwei mokonda omanyina enyi ahonekwa keulu.” — Luka 10:20.

Sesusi ahambukwa, ankhimaneka Tate yae, mokonda uundapesa ovaundapi vae veliola omutima, mokuvepa epondolo enene. Pahe apopila ovalongwa vae ati: “Vena ehambu ovo vana veete ovipuka onwe mueete. Mokonda ame ndyimupopila otyili okuti, ovauli ovanyingi no nohamba vahandele okutala ovipuka onwe mueete, mahi kavevimuene, vahandele okuiva ovipuka onwe muiivite mahi kaveviivile.” — Luka 10:23, 24.