Manampot lay 32 C.E., manga taloy taon lay apalabas nen abautismoan si Jesus. Diad agano ni et kaiba to ray disipulo to diad Piesta na Saray Tabernakulo ed Jerusalem. Tan nayarin asingger ni ra ditan. (Lucas 10:38; Juan 11:1) Diad tua, say sampot ya anem bulan na ministeryo nen Jesus et balanglan diad Judea odino diad distrito na Perea ya walad biek na Ilog Jordan. Kaukolan met ya napulongan iray totoo ed sarayan lugar.

Nen kayari na Paskua na 30 C.E., pigay bulan ya nampulong si Jesus diad Judea tan dinmalan ed Samaria. Insan nen ngalngali la Paskua na 31 C.E., sinali na saray Judio ed Jerusalem ya pateyen si Jesus. Kanian diad sinmublay ya sakey taon tan kapaldua, say kaslakan ya nambangatan nen Jesus et diad norte, ed Galilea. Dakel so nagmaliw ya patumbok to ed saman. Diad Galilea, impasal nen Jesus iray apostol to insan imbaki to ra, ya imbilin tod sikara: “Onla kayon manpulong, ibaga yo: ‘Asingger lay Panarian na tawen.’” (Mateo 10:5-7) Natan balet et inorganisa toy pampulong ed Judea.

Pian nagawaan iya, amili si Jesus na 70 disipulo tan imbaki to ran sanderwa. Kanian, 35 a paris so onlan mangipulong ed Panarian diad lugar ya “dakel so aanien, balet daiset so mankikimey.” (Lucas 10:2) Pinauna la ra nen Jesus ed saray lugar ya nayarin laen to. Kaukolan ya paabigen na 70 iray mansasakit tan ipaamta da imay mensahen ipupulong nen Jesus.

Aliwan diad saray sinagoga so manunan pambangatan na sarayan disipulo. Binilin ira nen Jesus ya onla rad kaabungan na totoo: “Inerman so looban yon abung,” so kuan to, “ibaga yo nin unona: ‘Niwala komon so kareenan ed sayan abung.’ No wala ditan so mangaaro ed kareenan, manayam ed sikato so kareenan yo.” Antoy nepeg ya ibaga ra? Imbilin nen Jesus ya ibaga ran: “Say Panarian na Dios et asingsingger la.”​—Lucas 10:5-9.

Say instruksion nen Jesus ed 70 et miparad samay imbaga tod 12 apostol to nen imbaki to ra manga sakey taon lay apalabas. Pinasakbayan to ra ya aliwan amin et mangawat ed sikara. Balet aliwan sayang so pansagpot da ta niparaan iray interesadon totoo ed magano lan isabi nen Jesus, diad ontan et dakel so malabay ya ondengel tan makaaral ed Katawan.

Ag-abayag, pinmawil ed si Jesus iray 35 paris na manangipulong ed Panarian. Malikeliket dan imbagad sikato: “Katawan, anggan saray demonyo et apatulok mi ra diad impangusar mid ngaran mo.” Seguradon manliket si Jesus ed sarayan balibalin balita, ta oniay imbaga to: “Anengneng koy Satanas a naplag la a singa kirmat a nanlapud tawen. Inikdan ta kayo na pakauley a mangigatin-gatin ed saray uleg tan alakdan.”​—Lucas 10:17-19.

On, pinaseguroan dia nen Jesus iray patumbok to ya nasarag da ray mauges a nagawa, aliling to  et singa da igatin-gatin iray uleg tan alakdan. Tan segurado la ran diad arapen et napelag si Satanas manlapud tawen. Tinulongan met nen Jesus iray 70 ya natalosan no anton talagay importante. Imbaga to: “Agyo panliliketan a napapatulok yo iray espiritu, noagta manliket kayo lapud nisulat lad tawen so kangaranan yo.”​—Lucas 10:20.

Manlikliket si Jesus tan indayew toy Ama to diad arap da ta inusar na Dios irayan mapaabeban lingkor to pian manggaway makapanyari iran kimey. Insan to imbagad saray disipulo to: “Maliket iray kamataan a makakanengneng ed saray nanenengneng yo. Ta ibagak ed sikayo, nampirawatan na dakel a propeta tan arari a nanengneng iray nanenengneng yo balet agda iratan anengneng, tan nampirawatan dan narengel iray narerengel yo balet agda iratan nadngel.”​—Lucas 10:23, 24.