Tabata kasi na final di aña 32 di promé siglo, un tres aña desde ku Hesus a batisá. Un poko promé, é i su disipelnan tabata na Herúsalèm pa e Fiesta di Tabernakel. Probablemente, ainda nan tabata den serkania di Herúsalèm. (Lukas 10:38; Huan 11:1) De echo, mayor parti di Hesus su último seis lunanan di sirbishi aki riba tera, el a pasa na Hudea òf den e distrito di Perea, ku tabata keda na e otro banda di Riu Yordan. Mester a prediká den e áreanan akí tambe.

Mas promé, despues di e Pasku Hudiu di aña 30 di promé siglo, Hesus a pasa vários luna predikando na Hudea. Despues, el a biaha via Samaria pa bai Galilea. Alrededor di e temporada di e Pasku Hudiu di aña 31 tambe Hesus tabata na Herúsalèm kaminda e hudiunan tabata busk’é pa mata. Despues, Hesus a prediká kasi ún aña i mei na Galilea, ku tabata keda den nort. Durante e tempu ei, hopi hende a bira su siguidó. Ta na Galilea Hesus a entrená su apòstelnan i a manda nan bai prediká. El a bisa nan: “Prediká i bisa: ‘E Reino di shelu a yega serka.’” (Mateo 10:5-7) Awor, kasi na final di aña 32, el a organisá un gira di predikashon na Hudea.

El a skohe 70 disipel i a manda nan dos dos bai prediká. Pues, tabatin 35 tim di predikadó di Reino den e teritorio, kaminda ‘e kosecha en bèrdat tabata grandi, ma trahadó tabata poko.’ (Lukas 10:2) Nan mester a bai promé, i Hesus lo a bini despues. E 70 disipelnan mester a kura hende i prediká e mesun mensahe ku Hesus tabata proklamá.

Nan meta prinsipal no mester tabata pa siña hende solamente den e snoanan. Nan a haña instrukshon pa bai siña e hendenan na nan kas tambe. Hesus a bisa nan: “Unda ku boso drenta un kas, bisa promé: ‘Pas sea ku e kas akí.’ I si tin un amigu di pas einan, boso pas lo keda riba dje.” Ki mensahe nan mester a prediká? Hesus a bisa su disipelnan: “Bisa nan: ‘E Reino di Dios a yega serka boso.’”—Lukas 10:5-9.

E instrukshonnan ku Hesus a duna e 70 disipelnan akí tabata similar na esnan ku el a duna e 12 apòstelnan mas o ménos un aña promé. Anto el a bisa nan di antemano ku no ta tur hende lo a risibí nan bon. No opstante, nan esfuerso lo a yuda prepará kurason di personanan sinsero di manera ku nan lo por tabata ansioso pa topa Señor Hesus i siña di dje ora e bini.

No a tarda mashá ku e 35 timnan di predikadó di Reino a bolbe ku bon informe pa Hesus. Kontentu nan a bis’é: “Señor, asta e demoñonan ta obedesé nos ora nos usa bo nòmber.” E informe akí a hasi Hesus kontentu pasobra el a bisa nan: “Mi a mira kaba kon Satanas a  kai for di shelu manera werlek. Wak! Mi a duna boso outoridat pa trapa riba kolebra i skòrpion.”—Lukas 10:17-19.

Di e manera ei, Hesus a sigurá su siguidónan ku nan por a vense opstákulonan ku por kousa daño, ku na moda di papia lo tabata manera kolebra i skòrpion. I nan por tabata sigur ku den futuro Satanas lo a kai for di shelu. Hesus a yuda e 70 disipelnan mira tambe kiko tabata realmente importante. El a bisa nan: “No alegrá pasobra e spiritunan ta obedesé boso, ma alegrá pasobra boso nòmber a ser skirbí den shelu.”—Lukas 10:20.

Anto yen di goso, Hesus a gradisí su Tata públikamente ku El a usa e humilde sirbidónan akí na un manera asina poderoso. Despues, el a bisa su disipelnan: “Felis ta e wowonan ku ta mira loke boso ta mira. Pasobra mi ta bisa boso: Hopi profeta i rei a deseá di mira loke boso ta mirando, ma nan no a mira nan, i di tende loke boso ta tendiendo, ma nan no a tende nan.”—Lukas 10:23, 24.