Jesus bautizakunqampitaqa kima watanönam pasarishqa y 32 wata ushënam karqan. Pëwan qateqninkunaqa Jerusalenchömi Ramäda fiestata celebrashqa kayarqan, y itsa tsë markapa amänunkunallachöraq këkäyarqan (Lücas 10:38; Juan 11:1). Wanunampaq joqta killa pishikaptinmi, Judëa y Perëa provinciakunachö sagrädu rurëninta rurarnin Jesus karqan, porqui tsëkunachöpis yachatsikunanmi karqan.

30 wata Pascua fiesta pasariptinmi, Jesusqa Judëachö atska killakunapa yachatsikurnin quedakurqan, y tsëpitanam Samariata ëwakurqan. Tiempuwannam, 31 wata Pascua fiesta witsanchö judïukuna wanutsita munayarqan. Tsëpitanam, Jesusqa Galilëapa uma kaq lädunchö juk wata pullan yachatsikurqan. Tsëchöqa mëtsikaqmi qateqninkuna tikrariyarqan. Galilëachö këkarninnam Jesusqa apostolninkunata alleq yacharatsir kënö nirqan: “Ëwarnin, kënö nir willakuyanki: ‘Ciëluchö Gobiernuqa këllachönam këkan’” (Mateu 10:5-7). Tsëpitanam, entëru Judëachö yachatsikuyänampaq patsätsirqan.

Tsëpaqqa 70 qateqninkunatam akrarqan y ishkëpayanmi mandarqan. Peru tsë markachö Diospa Gobiernumpita yachatsikuyänampaq “peonkunaqa wallkaqllam” kayarqan, y “ëllïpaq cosëchaqa mëtsikam” karqan (Lücas 10:2). Jesus ëwëta pensëkanqan markakunaman ëwayänampaqmi nirqan. Y qeshyëkaqkunatam kachakätsiyänan karqan y Jesus yachatsikïkanqan yachatsikïtam willakuyänan karqan.

Jesusqa manam Diosta adorayänan wayikunachö yachatsikuyänampaqtsu nirqan. Tsëpa rantinqa, wayin wayin yachatsikuyänampaqmi kënö nirqan: “Mëchö karpis juk wayiman yëkurqa, puntata kënö niyanki: ‘Kë wayichö yamë kë katsun’. Y tsëchö pitapis yamë këta kuyaqta tariyaptikiqa, qamkunapa yamë kënikikunam pëchö jamarinqa”. Y “Diospa Gobiernunmi qamkunaman chëkämunna” nirmi yachatsikuyänan karqan (Lücas 10:5-9).

Juk wata qepatanöna 12 apostolninkunata yachatsikoq ëwayänampaq ninqannöllam tsë junaq ninqanqa karqan. Jina Jesusqa llapan nunakuna allilla mana chaskiyänampaq kaqtapis entienditsirqanmi. Peru willakuyanqanqa yanapakunan karqan, Jesus ichikllachöna chäriptin pëta reqita y wiyëta munayänampaqmi.

Diospa Gobiernumpita yachatsikoq 70 qateqninkunam Jesus kaqman kutiriyarqan. Y alläpa kushishqam kënö niyarqan: “Teytë, hasta supëkunapis cäsuyämanmi jutikichö mandayaptï”. Tsënö willayanqampita alläpa kushikurmi Jesusqa kënö nirqan: “Satanastam rikëkä imëka räyunö ciëlupita ishkimushqatana. ¡Rikäyë!  Noqam autoridäta qoyarqoq culebrakunata y atoq kurukunata chakikikunawan jalukacharkuyänëkipaq” (Lücas 10:17-19).

Tsënö nirqa, imapa pasarpis qateqninkuna alli tsarakuyänampaq kaqtam nikarqan, imëka ‘culebrakunata y atoq kurukunata chakikikunawan jalukacharkoq’ cuenta. Jina shamoq tiempuchö ciëlupita Satanas ishkimunampaq kaqtapis clärum nirqan. Jina Jesusqa 70 qateqninkunatam ima mas precisaq kanqanta rikätsirnin kënö nirqan: “Ama kushikuyëtsu mana alli espïritukuna cäsuyäshunqëkipitaqa, sinöqa kushikuyë jutikikuna ciëluchö qellqashqa kanqampita” (Lücas 10:20).

Humildi nunakunata tsë rurëpaq Dios utilicëkaqta rikarmi, Jesusqa alläpa kushikurnin Teytanta alabarqan. Y qateqninkunatam kënö nirqan: “Kushishqam kayan qamkuna rikëkäyanqëkikunata rikaq kaqkunaqa. Porqui këtam niyaq, Diospa mëtsikaq willakoqninkuna y reykunam qamkuna rikëkäyanqëkikunata rikëta munayarqan, peru manam rikäyarqantsu, y wiyëkäyanqëkikunatam wiyëta munayarqan, peru manam wiyayarqantsu” (Lücas 10:23, 24).