32 kaq wataqa tukunanpaq hinañam kachkarqa, Jesuspa bautizakusqanmantapas kimsa watañam karurqa. Chay watapas Jesusqa qatiqninkunawanmi ramada fiestapi karqaku, ichaqa tukuruptinpas yaqachusmi Jerusalenpa waqtan llaqtakunallapiña karqaku (Lucas 10:38; Juan 11:1). Jesusqa wañukunanpaq suqta killallaña kaptinmi Judea lawpi hinaspa Perea lawpi Diosmanta yachachirqa chaykunapipas willakunan kasqanrayku. Perea lawqa Jordan mayu lawpim karqa.

Jesusqa 30 kaq watapiraqmi pascua fiesta tukuyta Judea lawkunapiqa Diosmanta unay willakurqa, hinaspam Samaria lawninta Galileaman kutirqa. Chaymantam qatiqnin watapi hina pascua fiestapi Jesus Jerusalenpi kaptin judiokunaqa wañurachiyta munarqaku. Jesusñataqmi Galilea lawman kutikuspan chay lawkunallapi yaqa wata masnin Diosmanta willakurqa. Chaypim achkaq qatiqninkuna rikurirurqa. Hina chaypitaqmi qatiqninkunamanpas tukuymanta yachachirqa hinaspa Diosmanta willakunankupaq nirqa: “‘Hanaq pacha Diospa munaychakuyninmi hichparamunña’, nispayá willakuychik”, nispa (Mateo 10:5-7). 32 kaq watapiñataqmi Judea lawpiña willakunankupaq kacharqa.

Chaypaqqa qatiqninkunamantam qanchis chunkata sapaqchaspan iska-iskaytakama kacharqa. Chaynapim paykunaqa iska-iskay rispanku Diosmanta willakurqaku tukuy Judea lawpi, chaypiqa ‘cosechanapaqmi achkallaña karqa, cosechaqkunam ichaqa aslla karqa’ (Lucas 10:2). Qatiqninkunaqa Jesuspa rinan llaqtakunamanmi ñawpachkarqaku, hinaspam unquqkunata hampinanku karqa chaynataq lliwman willakunanku karqa.

Ichaqa manam Jesusqa yupaychana wasikunapi willakunankupaqchu kacharqa, aswanqa wasin-wasin willakunankupaqmi. Hinaspam nirqa: “Maypipas wasiman yaykuspaykichikqa puntataraqyá niychik: ‘Kay wasipiyá hawkayay kachun’, nispa. Chay wasipi hawka kay munaq runa kaptinqa hawkayaynikichikmi paypi kanqa. Mana chayqa hawkayaynikichikmi qamkunawan kanqa”, nispa (Lucas 10:5-9).

Hina chaynallatam wata masnin ñawpaqtapas 12 apostolninkunaman nirqa Diosmanta willakunankupaq kachaspan, hinaspapas nirqam mana lliw chaskinankumanta. Chaywanpas hinalla willakuspaqa runakunapa sunquntam llampuyachinanku karqa, chaynapi Jesus chayaptin tukuy sunquwan yachachisqanta chaskinankupaq.

Chaymantam 70 Diosmanta willakuqkunaqa kusisqallaña Jesusman kutispanku nirqaku: “Señor, sutikita servichikuptiykum demoniokunapas  kasuwanku”, nispa. Jesusñataqmi willasqankuwan kusikuspa nirqa: “Satanastam rikuchkani hanaq pachamanta rayo hina wichimuqta. Ñuqamiki atiyta qurqaykichik culebrakunatawan atuq-atuq urukunata sarupanaykichikpaq”, nispa (Lucas 10:17-19).

Chaynata nispanmi Jesusqa qawachichkarqa ‘culebrakunatawan atuq-atuq urukunata sarupachkaq’ hina ima sasachakuywanpas mana hukmanyarunankumanta. Nirqataqmi satanasqa hamuq punchawkunapi hanaq pachamanta wischumusqa kanantapas. Chaymantapas ima ruway aswan allin kasqanmantam 70 qatiqninkunaman nirqa: “Amayá demoniokuna kasususqaykichikmantachu kusikuychikqa. Kusikuychikqa hanaq pachapi sutikichik qillqasqa kasqanmantayá”, nispa (Lucas 10:20).

Jesusqa kusisqa kaspanmi lliwpa qayllanpi taytanta hatuncharqa llampu sunqu runakunata servichikusqanmanta, chaymi qatiqninkunata nirqa: “Mayna kusisqam qawasqaykichikkunata qawaq runakunaqa. Nikichikmi: Diosmanta achka willakuqkunawan kamachiqkunam qawasqaykichikta rikuyta munarqaku ichaqa manam rikurqakuchu, uyarisqaykichiktapas uyariytam munarqaku, ichaqa manam uyarirqakuchu”, nispa (Lucas 10:23, 24).