32 wata tukuypaqqa kinsa wata jinañan pasaran Jesuspa bautizakusqanmantaqa. Jesusqa Jerusalén llaqta cercakunallapin kashanman karan ch’ujlla ruway fiesta pasaytaqa (Lucas 10:38; Juan 11:1). Soqta killa jinallañan kasharan kay pachapi llank’ayninta tukunanpaqqa. Chaymi payqa astawan predicayta qallariran Judea ladopi Jordán mayuq kasqan ladokunapi ima. Chay ladokunapin payqa astawanraq predicanan karan.

30 watapi Pascua fiesta pasaytaqa askha killan Jesusqa Judea ladopi predicaran, pasaranmi Samaria ladontapas. Juj kutinmi 31 watapi Pascua fiesta p’unchaykunapi wakin judiokuna Jesusta wañuchiyta munaranku. Chay qhepamantaq Jesusqa wata kuskanta jina Galileapi yachachiran, chaypin askha runakuna discipulonkuna kapuranku. Chaypin apostolninkunatapas predicaqta kacharan: “Rispaqa khaynatan ninkichis: ‘Janaq pacha gobiernon qayllaykamunña’”, nispa (Mateo 10:5-7). Kay kutipin ichaqa aswan askha discipulonkunata juñuran Judeapi predicanankupaq.

70 discipulokunata ajllaspan iskay-iskaymanta kacharan. 35 parejaña karanku chaypas, predicananku llaqtakunaqa askhapunin kasharan (Lucas 10:2). Jesuspa rinan llaqtakunamanmi paykunaqa ñaupananku karan. Chaypin onqosqakunata qhaliyachinanku karan, Jesuspa willasqan willakuytapas willananku karan.

Paykunaqa wasin-wasinta rispan runakunataqa maskhananku karan, manan sinagogakunallapichu. Chaymi Jesusqa niran: ‘Maypipas juj wasiman jaykuspaykichisqa ñaupaqtan ninkichis: “Thaj kay kachun kay wasipaq”, nispa. Chay wasipi thaj kayta munakuq runa kanqa chayqa, thaj kayniykichis paywan qhepakunqa. Chaymantapas ninkichismi: “Diospa gobiernonmi qankunaman qayllaykamunña”’, nispa (Lucas 10:5-9).

70 discipulonkunaman imachus nisqanqa 12 apostolkunaman juj wata ñaupaqta nisqan jinan karan. Jesusqa allintan paykunaman willaran mana llapan runachu sumaqta uyarikunankuta. Ichaqa imachus willasqankuwanmi paykunaqa runakunata preparananku karan Jesusta sumaqta chaskinankupaq.

Chay 70 discipulonkunan kutimuspanku kusisqa niranku: “Señor, sutiykipi kamachiqtiykuqa supaykunaraqmi kasukuwanku”, nispa. Jinan Jesusqa ancha kusisqa niran: ‘Noqaqa Satanastan rikusharaniña urmaykamushaqta, imaynan rayopas cielomanta urmaykamun jinataraq. Noqan qankunaman atiyta qoykichis mach’aqwaykunata, alacrán kurukunatawan sarukachanaykichispaq’, nispa (Lucas 10:17-19).

 Chay mach’aqwaykunamanta alacrán kurukunamantawan rimaspan Jesusqa discipulonkunata entiendechisharan imapas mana allin kaqtaqa atipananku kasqanta. Chaymantapas willaranmi jamuq tiempopi Satanás janaq pachamanta wijch’uykamusqa kananta. Chaymantan Jesusqa chay 70 discipulonkunata niran: “Ama espiritukunaq kasukusqasuykichisraykuchu kusikuychis, aswanpas kusikuychis sutiykichis janaq pachapi qelqasqa kasqanrayku”, nispa (Lucas 10:20). Chaywanmi entiendechisharan imatas paykunaqa aswan allinpaq qhawananku karan chayta.

Chaymantan Jesusqa ancha kusikuywan Yayanta jatuncharan jatun ruwaykunata discipulonkunawan ruwachisqanmanta. Jinaspa paykunaman kutirispa niran: “Kusisqa kachunku rikusqaykichista rikuq ñawikunaqa. Cheqaqtan niykichis: Askha profetakuna reykuna iman imakunachus rikusqaykichista rikuyta munaranku, ichaqa manan rikurankuchu; imakunachus uyarisqaykichistapas uyariytan munaranku, ichaqa manallataqmi uyarirankuchu”, nispa (Lucas 10:23, 24).