Now a de a kaba fu a yari 32. Sowan dri yari na fesi Yesus ben teki dopu. No so langa pasa, Yesus nanga den disipel fu en ben de na a Kampufesa na ini Yerusalem. Den de krosibei fu a foto ete (Lukas 10:38; Yohanes 11:1). Fu taki en leti, na ini den siksi mun di tan abra, Yesus e gebroiki furu fu en ten fu preiki na ini Yudea noso na abrasei fu Yordan-liba na ini a distrikt Perea. A de fanowdu taki den preiki na ini den kontren disi tu.

Wan pisi ten na fesi, Yesus ben preiki wan tu mun na ini Yudea èn a ben go na difrenti presi na ini Samaria. Dati ben de baka a Paskafesa fu a yari 30. Na a ten fu a Paskafesa fu a yari 31, son Dyu na ini Yerusalem pruberi fu kiri en. Na ini den wán nanga afu yari baka dati, Yesus preiki moro furu na ini Galilea di de na noordsei. Na ini a pisi ten dati furu sma tron bakaman fu en. Na ini Galilea, Yesus leri den apostel fa fu du a preikiwroko èn a seni den fu „go preiki”. Den ben musu taki: „A Kownukondre fu hemel kon krosibei kaba” (Mateyus 10:5-7). Now a e seti sani, so taki den disipel fu en kan go preiki na ini heri Yudea.

Yesus e teki 70 disipel fu bigin nanga a preikiwroko èn a e seni den gowe tu na tu. Sobun, 35 grupu fu Kownukondre preikiman de na ini a kontren. „A kotiwroko bigi, ma furu wrokoman no de” (Lukas 10:2). Kande den disipel musu go na presi pe Yesus o go bakaten. Den 70 disipel musu dresi den sikiwan èn den musu panya a srefi boskopu di Yesus ben tyari gi sma.

Den disipel disi no musu go na den snoga fu gi leri. Yesus e taigi den fu go na sma oso. A e taigi den: „Efu unu e go na ini wan oso, taki fosi: ’Meki ala sani waka bun na ini na oso disi.’ Efu wan sma di lobi freide de drape, dan a freide fu unu o kon na en tapu.” San den musu taigi den sma? Yesus e taki: „Taigi den: ’A Kownukondre fu Gado de krosibei fu unu.’”​—Lukas 10:5-9.

Den sani di Yesus e taigi den 70 disipel fu du, na den srefi sani di a ben taigi den 12 apostel pikinmoro wán yari na fesi. A e warskow den taki a no ala sma o wani teki den na ini oso. Ma a preikiwroko di den o du, o sreka na ati fu den sma di wani arki a boskopu. Na so furu sma o wani miti Masra Yesus èn den o wani teki leri fu en te a o kon syatu baka dati.

Baka wan pisi ten, den 35 grupu fu Kownukondre preikiman e drai kon baka na Yesus. Nanga prisiri den e taigi en: „Masra, srefi den ogri yeye e du san wi e taki, fu di wi e gebroiki yu nen.” Wi kan de seiker taki Yesus breiti te a yere disi, fu di a e taki: „Mi si fa Satan fadon kaba neleki faya di e koti na hemel. Luku, mi gi unu a  makti fu masi sneki nanga kruktutere nanga un futu.”​—Lukas 10:17-19.

Na so Yesus e gi den bakaman fu en a dyaranti taki den o abi bun bakapisi awansi sortu ogri miti den. A o de neleki den e masi sneki nanga kruktutere nanga den futu. Boiti dati, den kan de seiker taki na ini a ten di e kon, Satan o fadon komoto na hemel. Yesus e yepi den 70 disipel fu si tu san na a moro prenspari sani. A e taki: „Un no musu prisiri fu di den ogri yeye e du san unu e taki. Na presi fu dati un musu prisiri fu di un nen skrifi na ini hemel.”​—Lukas 10:20.

Yesus breiti srefisrefi. Na fesi ala sma a e prèise en Tata fu di en Tata meki den futuboi fu en di abi sakafasi, du bigi sani. Yesus e drai luku den disipel èn a e taigi den: „Koloku fu den ai di si den sani disi di unu e si. Bika mi e taigi unu: Furu profeiti nanga kownu ben wani si den sani di unu e si, ma den no si den, èn den ben wani yere den sani di unu e yere, ma den no yere den.”​—Lukas 10:23, 24.