Waahiphiya wanikisa wa mwakha 32 EC, nto saahivira iyaakha 3 nuumala Yesu obatiziwa. Okathi vakhaani Yesu ni awiixutti awe yaari oYerusalemu, oNiirani wa Maxaxa. Woonasa wene, nlelo aari muttetthe ole. (Luka 10:38; Yohani 11:1) Tthiri, Yesu aahiviriha myeeri 6 saahanle sa muteko awe woolaleerya oYudeya aahiiso mpantta mukina wa Muro Yordani, edistritu ya oPereya. Maana opuro ole waahaana olaleeriwa.

Nuumala Paasikha a 30 EC, Yesu aahiviriha myeeri sikina olaleeryaka oYudeya ni aahirowa oSamariya. Nuumala-vo, okathi wa Paasikha a 31 EC, aYuda a oYerusalemu yaaheererya omwiiva Yesu. Mwaakha mmosa nnimeya waattharelana, Yesu aahiixuttiha vanceene, mpantta onikela epheyo wa oGalileya. Okathi ole, atthu anceene yaahikhala atthareli a Yesu. Vano oGalileya, Yesu aahiwiixuttiha arummwa awe ni aahaavaha malakiheryo wira yalaleeryeke, oriki: “Virani mwettaka, mulaleyaka wira: ‘Omwene wa wirimu ori vakhiviru!’” (Matheyo 10:5-7) Nuumala-vo, Yesu aahilokiherya ekampaanya yoolaleerya oYudeya.

Wira epakiwe ekampaanya ele, Yesu aahaathanla awiixutti 70 ni aahaaruma orowa olaleerya anli-anli. Nto, saahikhala igrupu 35, saalaleya Omwene muttetthe ole, yoowo ‘solya saharere mmatta: vano alipa-òhepha yari vakhani’. (Luka 10:2) Vano awo yaahirowa mapuro yaawo muhoolo mwaya Yesu aarowa awe olaleerya. Awiixutti ale 70, yaanaapenuxa aretta ni yaanilaleya muhupi Yesu aalaleya awe.

Awiixutti ale khiyaarowa olaleeryaka musinagoga. Yesu aahaaleela wira yalaleeryeke mmawaani. Nto aahaavaha malakiheryo ala: “Khula etthoko enkelanyu omaka, mpajeryeke wira: ‘Murettele okhalé etthoko ela’. Akhalá weiwo mutthu omphwanela murettele, mwa yowo onokhala murettele anyu”. Nto muhupi xeeni yaalaleya aya? Yesu aahimmye so: “Mwalalèrye wira: ‘Omwene wa Muluku ori vakhiviru vanyu’”.​—Luka 10:5-9.

Malakiheryo Yesu aavanhe awe awiixutti ale 70, yaamulikana ni malakiheryo Yesu aavanhe awe arummwa 12, okathi aarumme awe orowa olaleerya, etthu yowiiraka mwaakha mmosa waavinre. Nave aahaalopola wira khiyaarowa waakheliwaka saana ni atthu otheene. Wiimananiha waya waarowa waakhaliherya atthu yaarowa weemererya masu a Yesu nuumala owo ophiya. Maana awo yaaniphavela okumana ni wiixuttihiwa ni Yesu.

Nuumala igrupu iye 35 olaleya Omwene, saahitthikela opuro aari awe Yesu. Moohakalala, awo yaahimuleela Yesu wira: “Pwiya, hatá malaikha òtakhala anninìwelela mwa nsina nanyu!”  Yesu aahihakalala vanceene, khuhimya wira: “Miyo komona Satana amoraka wirimu ntoko overunya. Mwiwé: kihovahani owerya w’onyakatta inowa n’iyalala”.​—Luka 10:17-19.

Yesu aahaalipiherya atthareli awe wira yanwerya ovilela oveehiwa, weiwo waalikanyihiwa ni inowa ni iyaalaala. Owo aahaaleela wira muhoolo mwaya Satana aarowa woomoliwa wiirimu. Nave Yesu aahaakhaliherya awiixutti ale 70 woona wira etthu yootepa otthuneya, tiile yaarowa wiiraneya muhoolo. Yesu aahimmye wira: “Vano, muhitteliwé murima mwaha wo wiweleliwa ni malaikha òtakhala: mutteliweke murima, okhala wira masin’anyu àlempwa wirimu”.​—Luka 10:20.

Otteeliwe ene murima, Yesu aahinvuwiha Tiithi awe mwaha woowi aahaarumeela atthu oowiiyeviha wira apakeke miteko sootikiniha. Aawehaka awiixutti awe, Yesu aahimmye so: “Àreriwa maitho anona itthu sinònanyu. Kinolèlani ti miyo, wira: maprofeta ni mamwene manjene yahiphavela wona itthu sinònanyu, khuhona; yahiphavela wiwa itthu sinìwanyu, khuhìwa”.​—Luka 10:23, 24.