KAPITE 72
Neʼe Fekauʼi e Sesu Te Toko 70 Tisipulo Ke Natou Olo ʼo Faifakamafola
-
ʼE FILIFILI E SESU HE KAU TISIPULO ʼE TOKO 70 PEA INA FEKAUʼI KE OLO ʼO FAIFAKAMAFOLA
Kua vave ʼosi pe te taʼu 32 H.T.S. Kua hili leva teitei taʼu ʼe tolu talu mai te ʼosi papitema ʼo Sesu. Neʼe heʼeki faʼa fualoa, ko ia mo ʼana tisipulo neʼe natou kau ki te ʼAho Lahi ʼo Te ʼu Tapenakulo ʼi Selusalemi. Neʼe lagi kei natou nonofo ʼi te ʼu tafaʼaki ʼo Selusalemi. (Luka 10:38; Soane 11:1) ʼI tona fakahagatonu, neʼe kei toe pe mahina ʼe ono moʼo fakahoko e Sesu tana minisitelio. Pea neʼe nofo ʼi Sutea pea neʼe fakalaka ʼi te Vai Tafe ʼo Solotane, ʼo alu ki te koga fenua ʼo Pele, ʼo faifakamafola ai. Neʼe toe ʼaoga foki ke faifakamafola ʼi te ʼu koga meʼa ʼaia.
ʼI muʼa atu, ʼi te ʼosi ʼo te Pasikate ʼo te taʼu 30 H.T.S., neʼe faifakamafola ia Sesu lolotoga ni mahina ʼi Sutea pea neʼe fakalaka ʼi Samalia. Pea ʼi te temi ʼo te Pasikate ʼo te taʼu 31 H.T.S., neʼe faigaʼi e ʼihi kau Sutea ʼi Selusalemi ke natou matehi ia ia. Pea ʼi te taʼu katoa vaelua leva ʼae neʼe hoa atu ki ai, neʼe faiakonaki tafito ia Sesu ʼi Kalilea, ʼi te potu noleto. Lolotoga te temi ʼaia, tokolahi te hahaʼi neʼe liliu ko ʼana tisipulo. ʼI Kalilea, neʼe akoako e Sesu ʼana apositolo pea neʼe ina fekauʼi natou ke natou olo, ʼo ina fakatotonu fenei age: “Kotou fakamafola fenei: ‘Kua ovi mai ia te Puleʼaga ʼo selo.’ ” (Mateo 10:5-7) ʼI te temi leva ʼaeni, ʼi Sutea, neʼe ina fakatuʼutuʼu he gaue faifakamafola lahi.
Moʼo kamata te gaue faifakamafola lahi ʼaia, neʼe filifili e Sesu he kau tisipulo ʼe toko 70 pea neʼe ina fekauʼi natou taki toko lua. Koia, neʼe olo ai te kau faifakamafola ʼaia ʼo te Puleʼaga ki te telituale, ʼae neʼe ‘lahi ai te taʼukai kaʼe neʼe tokosiʼi te kau gaue.’ (Luka 10:2) Neʼe tonu ke natou muʼamuʼa ki te ʼu koga meʼa ʼae ka alu anai ki ai ia Sesu. Pea neʼe tonu ki te toko 70 ke natou fakamalolo te kau mahahaki pea mo fakamafola te logo ʼae neʼe tala e Sesu.
Neʼe mole tonu ke tokakaga tafito te ʼu tisipulo ke natou faiakonaki ʼi te ʼu sinakoka. Kaʼe neʼe ui e Sesu kia natou ke natou olo ki te ʼu ʼapi. Neʼe ina fakatotonu fenei age: “ ʼI te potu fuli pe ʼe kotou hu ai ki he loto fale, kotou ui fenei age muʼa: ‘Ke nofo te tokalelei mo tokotou loto fale.’ . . . Kapau ʼe ʼi ai [he kaumeʼa ʼo te tokalelei], pea ʼe hifo anai tokotou tokalelei ki ai.” Pea kotea te logo ʼae neʼe tonu ke natou tala? Neʼe hoko atu fenei e Sesu: “Ui fenei age kia natou: ‘Kua fakaovi atu te Puleʼaga ʼo te ʼAtua.’ ”—Luka 10:5-9.
Ko te ʼu fakatotonu ʼae neʼe fai e Sesu ki te toko 70, neʼe tatau mo te ʼu fakatotonu ʼae neʼe ina fai ʼi te temi ʼae neʼe ina fekauʼi ai te toko 12 kau apositolo, ʼi te teitei taʼu katoa ki muʼa atu. Neʼe ina fakatokagaʼi age ki te toko 70 ʼe mole tali leleiʼi anai natou e te hahaʼi fuli. Kaʼe ko ʼanatou faiga, ʼe tokoni anai ki te hahaʼi ʼae ka natou tali lelei, ke natou teuteu ki te temi ʼae ka haʼu ai Sesu. Pea ʼi te temi ʼaia, tokolahi te hahaʼi ʼe natou fia felaveʼi anai mo te Pule, he ʼe natou loto anai ke ina akoʼi natou.
Ki muli age, neʼe toe liliu mai kia Sesu te kau faifakamafola ʼaia ʼo te Puleʼaga. Neʼe natou fiafia pea neʼe natou ui fenei age ki ai: “ ʼAliki, maʼia pe la mo te kau temonio ʼe natou fakalogo mai ʼi tamatou fakaʼaogaʼi tou huafa.” ʼE mahino ia neʼe toe fiafia lahi Luka 10:17-19.
ia Sesu ʼi tana logo ki ai, he neʼe ina ui fenei: “Kua au sio ki te to ifo ʼa Satana ohage ko he hila mai te lagi. Neʼe au foaki atu te pule moʼo molomoloki te ʼu gata mo te ʼu sekolopio.”—Koia, neʼe fakaha fakalelei e Sesu ki ʼana tisipulo neʼe feala ke natou puleʼi te ʼu meʼa ʼae ʼe kovi, peʼe ʼi hona aluʼaga fakata, ke natou molomoloki te ʼu gata pea mo te ʼu sekolopio. Tahi ʼae meʼa, neʼe feala ke natou tui papau, ʼi te temi ka haʼu, ʼe to ifo anai ia Satana mai te lagi. Neʼe toe tokoni foki ia Sesu ki te toko 70 ke natou mahino pe kotea ʼae neʼe maʼuhiga age. Neʼe ina ui fenei: “Tuku takotou fakafiafia ʼi te fakalogo atu ʼa te ʼu laumalie kovi, kaʼe kotou fakafiafia he ʼe kua tohi ʼokotou higoa ʼi selo.”—Luka 10:20.
Neʼe fiafia lahi ia Sesu pea neʼe fakavikiviki ki tana Tamai ia muʼa ʼo te hahaʼi, ʼi tana fakaʼaogaʼi ʼana kaugana agavaivai ke natou fai he ʼu gaue lalahi. Pea neʼe haga age ki ʼana tisipulo, ʼo ina ui fenei: “Manuʼia te ʼu mata ʼae ʼe sisio ki te ʼu meʼa ʼae ʼe kotou sisio ki ai. He ʼe au tala atu kia koutou, tokolahi te kau polofeta mo te ʼu hau neʼe natou fia sisio ki te ʼu meʼa ʼae ʼe kotou mamata ki ai kaʼe neʼe mole natou sisio ki ai, pea mo natou fia logo ki te ʼu meʼa ʼae ʼe kotou logo ki ai kaʼe neʼe mole natou logo ki ai.”—Luka 10:23, 24.