Beoraaʼ taʼaytak u jóokʼol u jaʼabil 32, Jesuseʼ tsʼoʼok óoliʼ tres años okjaʼanak. Maʼ úucheʼ tiaʼan Jerusalén tu kʼiinbesajil le Tabernaculoʼob yéetel u disipuloʼoboʼ. Maʼ xaaneʼ letiʼobeʼ maʼ náach tiʼ Jerusalén yanoʼobiʼ (Lucas 10:38; Juan 11:1). Jesuseʼ tu máansaj kex seis meses táan u kʼaʼaytaj Judea wa tu jáal u kʼáaʼnáabil Jordán, tu luʼumil Perea. Tumen tak tiʼ unaj xan u kʼaʼaytajiʼ.

Le ka tsʼoʼok le Pascua tiʼ u jaʼabil 30, máan wa jaypʼéel meses táan u kʼaʼaytaj tu luʼumil Judea yéetel Samaria. Óoliʼ tu kʼiiniloʼob le Pascua tiʼ u jaʼabil 31, taakchaj u kíimsaʼal tumen le judíoʼoboʼ. Tu yáamil junpʼéel jaʼab yéetel táanchumukeʼ kʼaʼaytajnaj tu luʼumil Galilea. Teʼ kʼiinoʼob jeʼeloʼ yaʼab máakoʼob joʼopʼ u tsaypachtikoʼob. Jesuseʼ tu kaʼansaj u apostoloʼob tu luʼumil Galilea yéetel tu yaʼalajtiʼob: «Kʼaʼayteʼex lelaʼ: ‹U Reinoil kaʼaneʼ tsʼoʼok u náatsʼal›» (Mateo 10:5-7). Beoraaʼ joʼopʼ u tuklik u binoʼob kʼaʼaytaj tu luʼumil Judea.

Utiaʼal u káajsik le kʼaʼaytajaʼ, tu yéeyaj 70 disipuloʼob utiaʼal u túuxtoʼob kaʼakaʼatúulil. Beyoʼ 35 parejaʼob binoʼob u kʼaʼaytoʼob le Reino tuʼux «jach yaʼab le baʼax kun jochbiloʼ, baʼaleʼ le máaxoʼob kun joochoʼoboʼ junpʼíitoʼob» (Lucas 10:2). Letiʼob binoʼob táanil teʼ tuʼuxoʼob kun bin Jesusoʼ. Tu setentailoʼobeʼ tu tsʼakoʼob kʼojaʼanoʼob yéetel tu kʼaʼaytoʼob le maʼalob péektsil ku kʼaʼaytik xan Jesusoʼ.

Le disipuloʼobaʼ maʼ kaʼansajnajoʼob teʼ sinagogaʼoboʼ. Jesuseʼ tu yaʼalajtiʼob ka xiʼikoʼob tu yotoch le máakoʼoboʼ. Tu yaʼalajtiʼob: «Jeʼel tuʼuxak ka ookkeʼex ichil junpʼéel najeʼ, yáax aʼaleʼex: ‹Yanak jeetsʼelil tiʼ le najaʼ›. Teʼ túunoʼ wa yaan juntúul máak u yaabiltmaj le jeetsʼeliloʼ, le jeetsʼelil yaan tiʼ teʼexoʼ yaan u pʼáatal tu yóokʼol». ¿Baʼax túun unaj u kʼaʼaytikoʼob? Jesuseʼ tu yaʼalaj: «Maʼ u xuʼulul a waʼalikeʼextiʼob: ‹U Reino Dioseʼ tsʼoʼok u náatsʼal ta wiknaleʼex›» (Lucas 10:5-9).

Le baʼaxoʼob tu yaʼalaj Jesús tiʼ le 70 disipuloʼoboʼ láayliʼ jeʼex le tu yaʼalaj tiʼ le 12 apostoloʼob ka tu túuxtoʼob kʼaʼaytaj kex junpʼéel jaʼab paachiloʼ. Letiʼeʼ tu yaʼalajtiʼob maʼ tuláakal máak kun kʼamkoʼob maʼalobiʼ. Baʼaleʼ le baʼax ken u kaʼansoʼoboʼ yaan u yáantik yaʼab tiʼ le máakoʼob u kʼamoʼob u Yuumil le kool utiaʼal ka kaanbalnakoʼob tiʼoʼ.

Maʼ jach xáanchajeʼ le 35 parejaʼob j-kʼaʼaytajoʼoboʼ suunajoʼob yiknal Jesús. Letiʼobeʼ tu yaʼaloʼob yéetel kiʼimak óolal: «Yuumtsil, tak le demonioʼob beetik baʼax k-aʼalik ken meyajnaktoʼon a kʼaabaʼoʼ». Le baʼaxoʼob tu yaʼaloʼoboʼ tu beetaj u kiʼimaktal u yóol Jesús, le oʼolal tu yaʼalaj: «Teneʼ tin wilaj lubaʼan Satanás jeʼex u léembal cháak teʼ kaʼanoʼ. ¡Ileʼex! Teneʼ tsʼoʼok in tsʼáaikteʼex autoridad utiaʼal a peʼchaʼatikeʼex kaanoʼob yéetel síinaʼanoʼob» (Lucas 10:17-19).

Jesuseʼ tu yaʼalaj tiʼ u disipuloʼobeʼ jeʼel u  páajtal u aktáantkoʼob ken aʼalaʼak baʼaloʼob maʼ jaajtak tu contraʼobeʼ, bey ka u pepeʼchaʼatoʼob kaanoʼob yéetel síinaʼanoʼobeʼ. Tsʼoʼoleʼ letiʼobeʼ jach u yojloʼob Satanaseʼ yaan u píikchʼintaʼal teʼ kaʼanoʼ. Baʼaleʼ Jesuseʼ tu yáantaj xan le 70 disipuloʼob ka tuukulnakoʼob tiʼ junpʼéel baʼax maas kʼaʼanaʼanoʼ. Tu yaʼalajtiʼob: «Maʼ u kiʼimaktal a wóoleʼex ikil u beetaʼal baʼax ka waʼalikeʼex tumen le demonioʼoboʼ, baʼaxeʼ kiʼimakchajak a wóoleʼex tumen tsʼoʼok u tsʼíibtaʼal a kʼaabaʼex teʼ kaʼanoʼ» (Lucas 10:20).

Jesuseʼ jach kiʼimak u yóol, ka tu tsʼáaj nojbeʼenil tiʼ u Taata tu táan u disipuloʼob ikil u meyajtiʼ le máaxoʼob kabal u yóoloʼob utiaʼal u beetik le meyajoʼobaʼ. Ka tu sutubaeʼ tu yaʼalaj tiʼ u disipuloʼob: «Kiʼimak u yóol le ichoʼob ku paktikoʼob le baʼaxoʼob ka wilkeʼexoʼ. Tumen kin waʼalikteʼex: Yaʼab profetaʼob yéetel reyoʼobeʼ tu tsʼíiboltoʼob u yilkoʼob le baʼaxoʼob ka wilkeʼexoʼ, baʼaleʼ maʼ tu yiloʼobiʼ; bey xan u yuʼubikoʼob le baʼaxoʼob ka wuʼuyikeʼexoʼ, baʼaleʼ maʼ tu yuʼuboʼobiʼ» (Lucas 10:23, 24).