I pes likôl i Hikôa Ôlivé, bebee le i kilôméta aa ni Yérusalem, nyen di nkoba mbai ba nsébél le Bétania. (Yôhanes 11:18) Nyoo nyen Yésu a nke jôp i ndap linyañ li bôda iba, Marta bo Maria. Bo ni manyañ wap Lasarô ba yé mawanda ma Yésu. Ba nleege nye ni liyômba.

Hala a yé nsima i bana Mésia kiki nkén. Marta a gwé ngôñ i leege Yésu loñge, jon a njôp i kishin inyu lamb. Kiki Marta a yé sal, manyañ Maria a yii i si makôô ma Yésu a ñemble nye. Ha nyen Marta a nkal Yésu le: “A Nwet, hala a ntééñga bé we le mankéé nu muda a nyigle me bôlô yosôna? Kal nye le a lo, a hôla me.”​—Lukas 10:40.

Iloole a kodol Maria, Yésu a nti Marta maéba le a mpagap inyu mam ma minsôn, a nkal nye le : “A Marta, a Marta, u ntôñ, u pégi ki ni ngandak mam. Ndék mam ndik yon i yé nseñ, tole jada ndigi. Maria nye a mpohol loñge ngaba; b’a yoñ bé nye yo.” (Lukas 10:41, 42) Ñ, Yésu a ñunda le i ta bé nseñ i lôôha tégbaha ngéda i lamb ngandak bijek. Ndék bijek i nkola.

Marta a gwé mahoñol malam. A gwé ngôñ i leege nkén loñge. Ndi mu kiki a ntôñ ngandak inyu bijek, a nimis biniigana bi mahee Man Djob a yé ti. Yésu a nyigye le Maria a mpohol njel pék, i i ga bane nye nseñ i mbus ngéda. Ngandak ikété yés i ga ôt biniigana bilam mu ndémbél yé.

Kel ipe, Yésu a nti biniigana bipe bi yak gwo bi gwé mahee. Nnigil wada a mbat nye le: “A Nwet, niiga bés lelaa ba nsoohe, kiki yak Yôhanes a bi niiga banigil bé.” (Lukas 11:1) Yésu a bi niiga bo jam li hala a yé nwii wada ni pes mu Nkwel wé i ngii Hikôa (Matéô 6:9-13) Ndi, nnigil nu a bé bé ha, jon Yésu a ntiimba matode makeñi ma nkwel u. I mbus, a nti hihéga hi ñunda inyuki i yé nseñ i téñbe ikété masoohe.

“Hégdana le wada ikété nan a gwé liwanda, ndi a ke i nyeni i kosi juu, a kal nye le: ‘A wanda, pôôs me bret baa, inyule liwanda jem jada li ntip lôl me liké, ndi me gwé bé me to yom i ti nye.’ Ndi nwet ndap a timbhe nye, a bak ikété ndap, a kal le: ‘Waa tééñga me. Nwemel u yé nkwéhék, me ni bon bem batitigi di niñi. Me nla bé telep inyu ti we yom yo ki yo.’ Me nkal bé le: A’ telep, a ti liwanda jé hiki jam li nkon nye ngôñ, ha inyu bé le a yé liwanda jé, ndi inyule li nai ni yagal nye.”​—Lukas 11:5-8.

Yésu a ta bé kal le Yéhôva a ntimbhe bé ngéda mut a ntjelel, kiki liwanda li bi boñ. Ndi a ñunda le ibale liwanda li ntjél emble minyemhe mi liwanda jé lipe, ibabé pééna, Tata wés nu ngii nu a ngwés bés a ga timbhe bagwélél bé ba ba ntéñbe i yemhe nye! Yésu a nke ni bisu i kal le: “Me nkal bé le: Ni bat ibabé waa, ndi n’a kôhna; ni yéñ ibabé waa, ndi n’a léba; ni koode ibabé waa, ndi b’a yible bé. Inyule hiki mut a mbat, a nkôhna; hiki mut a nyéñ, a nléba; hiki mut a nkoode, b’a yible nye.”​—Lukas 11:9, 10.

Inyu nit biniigana gwé, Yésu a nyoñ hihéga hi basañ mbai, a nkal le: “Numbe isañ ikété nan, ibale man wé a mbat nye hiobi, a’ ti nye nyoo iloole a ti nye hiobi? Tole ibale a mbat litjee, baa a’ ti nye hiéé hi nyoo? Jon, ibale bé ni nyi ti bon banan makébla malam to hala kiki ni yé baboñbéba, bôô ni ngélé yañen ni Isoñ nan nu a yé i ngii, ngo i bôt ba mbat nye mbuu mpubi, yak nye a’ ti bo wo!” (Lukas 11:11-13) Kinje maséé i yi le Isañ wés nu ngii a yé bebee i ti bés yom di gwé ngôñ!