Betanin klɔ’n wo Olivie oka’n i wia afiliɛ lɔ lika’n nun. Ɔ nin Zerizalɛmun klɔ’n be afiɛn ti nun kilo kɔe nsan. (Zan 11:18) Zezi ɔli klɔ sɔ’n su lɔ. Kɛ ɔ juli lɔ’n, ɔ ko sikeli bla nɲɔn be awlo. Be ti niaan. Be flɛ be nun kun kɛ Mati, yɛ be flɛ kun ekun kɛ Mari. Be nin be niaan bian Lazaa be tran lika kunngba. Be ti Zezi i janvuɛ. Ɔ maan kɛ Zezi toli be’n, be sɔli i nun klanman.

Nanwlɛ, sran nga Mesi’n ko sike i awlo’n, i liɛ su ti ye! I sɔ’n ti’n, Mati kunndɛli kɛ ɔ́ nían Zezi lika kpa. Ɔ maan ɔ siesieli i wun naan w’a tɔn aliɛ kpa w’a mɛn i. Kɛ ɔ́ yó sɔ’n, i niaan bla Mari ti Zezi i ja wun lɛ ɔ su tie ndɛ ng’ɔ kan’n. I sin’n, Mati seli Zezi kɛ: “E Min, min niaan bla w’a yaci junman’n i kwlaa min sa nun. ?I sɔ’n yoman ɔ like fi? Se i naan ɔ wa uka min.”​—Liki 10:40.

Zezi w’a ijɔman Mari. Sanngɛ ɔ seli Mati kɛ i ɲin o ninnge kpanngban su. I waan: “Mati, Mati, a koko, yɛ ɔ ɲin o ninnge kpanngban su. Like kaan sa yɛ ɔ ti cinnjin-ɔn, annzɛ like kunngba bɔbɔ. Mari liɛ’n, ɔ fɛli i nun kpafuɛ’n. Be su kwlá demɛn i sa nun.” (Liki 10:41, 42) Zezi kleli kɛ ɔ timan cinnjin kɛ Mati tɔn aliɛ kpanngban naan ɔ saci i blɛ’n ngbɛn. Aliɛ kan bɔbɔ ju be.

Like nga Mati kunndɛli kɛ ɔ́ yó’n timan tɛ. Afin i waan ɔ́ sɔ́ Zezi nun klanman. Sanngɛ aliɛ tɔnlɛ ti’n, ndɛ nga Ɲanmiɛn i Wa’n kannin’n, ɔ sinnin i sin. Zezi seli kɛ Mali liɛ’n, ɔ yoli like kpa. Like ng’ɔ yoli’n, ɔ́ yó i ye titi. Ndɛ cinnjin sɔ’n ti e liɛ wie. Ɔ fataman kɛ e wla fi su.

Blɛ uflɛ nun’n, Zezi mannin i sɔnnzɔnfuɛ’m be afɔtuɛ cinnjin kpa kun ekun. I sɔnnzɔnfuɛ kun usɛli i kɛ: “E Min, kle e Ɲanmiɛn srɛlɛ, kɛ nga Zan kleli i sɔnnzɔnfuɛ mun’n sa.” (Liki 11:1) I nun nga Zezi íjɔ oka’n su lɔ’n, ɔ yiyili ndɛ sɔ’n nun. Ɔ yoli sɔ w’a di afuɛ kun nin sin. (Matie 6:9-13) Sanngɛ blɛ sɔ’n nun’n, nn i sɔnnzɔnfuɛ ng’ɔ usɛli i ndɛ’n, ɔ nunman lɛ wie. I sɔ’n ti’n, Zezi flannin ndɛ cinnjin ng’ɔ kannin be ndɛ blɛ sɔ’n nun’n be nun. Kpɛkun ɔ fali sunnzun ase kun naan i sɔnnzɔnfuɛ’m be wun i wlɛ kɛ ɔ fata kɛ be srɛ Ɲanmiɛn titi.

Zezi seli kɛ: “Wienun-ɔn amun nun kun le i janvuɛ kun. Cɛn kun’n, ɔ ɔli i sin kɔnguɛ afiɛn ko seli i kɛ, ‘Janvuɛ, man min kpanwun nsan, afin min janvuɛ kun fin lika w’a ba icra’n. N leman like fi naan m’an fa mɛn i.’ Sanngɛ ɔ kali sua’n nun lɔ tɛli i su kɛ: ‘Yaci min yalɛ klelɛ. M’an to anuan’n nun w’a wie. Min nin min mma kanngan mun y’a la. N kwlá jasoman n manman wɔ like.’ Ń kán klé amun kɛ ɔ́ jáso fá like ng’ɔ miɛn i janvuɛ’n i sa’n ɔ́ mɛ́n i. Nán kɛ ɔ ti i janvuɛ’n ti-ɔ, sanngɛ i yalɛ m’ɔ kle i dan’n ti-ɔ.”​—Liki 11:5-8.

Ndɛ nga Zezi kannin’n, ɔ kleman kɛ Zoova ti kɛ bian nga w’a kunndɛman kɛ ɔ́ úkɛ i janvuɛ’n sa. I waan kɛ be boboli bian’n i anuan’n, kasiɛn su’n ɔ ko tikeli, afin i janvuɛ’n w’a yaciman anuan’n i bobolɛ. Sɛ ɔ ti sɔ’n, nán Ɲanmiɛn m’ɔ klo e’n yɛ kɛ e tu e klun e srɛ i’n yɛ ɔ su tɛman e su-ɔ. Zezi kɛnnin i ekun kɛ: “I sɔ’n ti’n, ń kán klé amun kɛ maan amun srɛ like titi, yɛ bé fá mán amun. Amun kunndɛ like titi, yɛ amún wún i. Amun bobo anuan titi, yɛ bé tíke mán amun. Afin sran kwlaa ng’ɔ srɛ like’n, ɔ ɲɛn i, yɛ sran kwlaa ng’ɔ kunndɛ like’n, ɔ wun i, yɛ sran kwlaa ng’ɔ bobo anuan’n, bé tíke mɛ́n i.”​—Liki 11:9, 10.

Zezi kannin ndɛ kun ekun kleli kɛ ndɛ sɔ’n ti cinnjin kpa. Ɔ kannin siɛ’m be ndɛ. Ɔ seli kɛ: “?Amun nun onin yɛ sɛ i wa’n srɛ i jue’n, ɔ su mɛnmɛn i jue, sanngɛ ɔ́ mɛ́n i wuo-ɔ? ?Annzɛ kusu sɛ ɔ srɛ i klenzua’n, ɔ́ mɛ́n i ɲannglan-ɔn? Ɔ maan amun mɔ amun ti klunwifuɛ’n, amun fa ninnge nga be ti kpa’n man amun mma mun. ?Yɛ Siɛ m’ɔ o ɲanmiɛn su lɔ’n nin? ?Ɔ su fɛmɛn i wawɛ’n manman be nga be srɛ i’n lele?” (Liki 11:11-13) Ndɛ nga Zezi kannin’n, ɔ wla e fanngan dan! Ɔ kle e kɛ e Si Ɲanmiɛn klo kɛ ɔ́ síe i su tíe srɛlɛ mɔ e srɛ i’n, naan ɔ́ tɛ́ e su.