Kwapela Mutumba wa Maolivi ku musela ko kwaikejile muzhi wa Betani, palepele makilomita asatu kufuma ku Yelusalema. (Yoano 11:18) Yesu wayile mu uno muzhi kabiji watwelele mu nzubo ya bankasa ne kolo babiji babakazhi, ba Mata ne Maliya. Bano bonse babiji ne mulongo wabo aye Lazalasa bajinga balunda ba kwa Yesu, kabiji bamutambwijile bingi bulongo.

Baumvwine bingi bulongo pa kwibafwakesha kwi Mesiasa. Mata wakebeshe bingi kunengezhezha Yesu kajo kawama. Onkao mambo, Mata wapayankene bingi na kunengezha kajo kavula bingi kawama. Mata byo aingijilenga, nkasanji aye Maliya waikele ku maulu a kwa Yesu saka ateleka ku byo aambilenga. Byo papichile kimye, Mata waishile ne kwambila Yesu amba: “Nkambo, nanchi kechi mwatako muchima nkasami byo andekatu na kwingila mingilo bunke nenyi? Mwambilai eye ankwasheko.”—Luka 10:40.

Pano bino, kafwako kintu Yesu kyo aambijile Maliya ne, bino wafunjileko Mata na mambo a kukizhamo kutesha muchima ku bintu bya ku mubiji. Wamwambijile’mba: “Mata, Mata obewa wabambisha muchima ne kutabakana na bintu byavula. Bintutu bicheche byo bibena kukebewa, nangwatu kintu kimo. Aye Maliya wasala kintu kyawama kabiji kechi bakamwangatakyo ne.” (Luka 10:41, 42) Yesu waambile’mba kechi kikebewa kutaya kimye kyabaya na kunengezha kajo kavula ne. Kajo kaesakanatu ko kakebewenga.

Byaubilenga Mata kechi byatamine ne. Wakebele kumwesha’mba watambwijile Yesu bulongo. Pano bino, byo akizhizhemo kutesha muchima ku bya kuja, washajilepo kutambula mikambizho yafunjishenga Mwana Lesa. Onkao mambo, Yesu waambile’mba Maliya wasajilepo kintu kyawama kikamulengela kumwenamo myaka ne myaka, kabiji ne atweba bonse ke lufunjisho lo twafwainwa kuvulukanga.

Pa kimye kikwabo, Yesu waambile pa kintu kyapusanako, pano bino, muji lufunjisho lwanema bingi. Mwana wa bwanga umo waambijile Yesu amba: “Nkambo, tufunjishai bya kulomba, byonkatu Yoano byo afunjishe baana banji ba bwanga.” (Luka 11:1) Mwaka umo ne kichika wafumineko, Yesu wafunjishe bya kulomba mu Jashi janji ja pa Mutumba. (Mateo 6:9-13) Nangwa byonkabyo, kyamweka uno mwana wa bwanga kechi wajingapo pa kyokya kimye ne, onkao mambo, Yesu wabwezhezhepo bishinka byo aambile. Kepo ebelele kishimpi kyamwesheshenga buneme bwa kulomba na mukoyo.

Yesu waambile’mba: “Twambe’mba mwi anweba umo uji na mulunda nanji kabiji byo aya kwi aye pakachi ka bufuku wamwambila’mba, ‘Mbai, mpepo bashinkwa basatu, mambo mulunda nami mukwabo po po aiyatu kufuma pa lwendo kabiji mfwabyo bya kumupa.’ Bino mulunda nanji uji mu nzubo wamukumbula’mba: ‘Kunkatazhanga ne. Nashinka kala kinzhilo ne baana bami balaala. Kechi nakonsha kubuuka ne kukupa kintu ne.’ Nemwambila namba, nangwa kya kuba kechi ukabuuka ne kumupa kintu na mambo a kuba mulunda nanji ne, bino na mambo a lupata lwanji ukabuuka ne kumupa kyonse kyo abena kukeba.”—Luka 11:5-8.

Yesu kechi walumbulwilenga’mba Yehoba kechi ukumbula misashijilo byonka byaubile mulunda ye aambilepo mu jishimikila ne. Bino walumbulwilenga’mba umvwe kya kuba awa mulunda wakatezhe waswile kupana bintu byakebelenga mukwabo na mambo a mukoyo, ko kuba’mba Shetu wa mwiulu uji na butemwe ukakumbula misashijilo ya bakalume banji ba kishinka. Onkao mambo, Yesu watwajijile kwamba’mba: “Byonkabyo, nemwambila namba, Lombainga, bakemupa; kebainga, mukekitaana; konkonshainga, bakemushinkwilako. Mambo yense ulomba utambula, ne yense ukeba wikitaana, ne yense ukonkonsha bamushinkwilako.”—Luka 11:9, 10.

Kepo Yesu alumbulwile bulongo kino kishinka kupichila mu kwesakanya Lesa ku byuba bashetu bambulwakulumbuluka. Waambile’mba: “Ñanyi shetu mwi anweba, uba umvwe mwananji wamulomba jisabi, wamupa muloolo mu kifulo kya jisabi? Nangwa umvwe wamulomba jike, wamupa kaminye? Onkao mambo, nangwa kya kuba mwi babi, mwayuka kupana byawama ku baana benu, ko kuba’mba Shenu wa mwiulu ukakilapo kupana mupashi wazhila ku boba bamulomba!” (Luka 11:11-13) Kine kitutekenesha bingi pa kuyuka kuba’mba Shetu umvwa milombelo yetu ne kwitubila byo tukeba.