Mutundhu wo Bhetania unowanika kudivi ro kumabvazuva ko Dundhu ro Maorivhe, makirometro matatu kubva Jerusarema. (Johani 11:18) Jesu anoenda kondhoyo, zve anonghwina mu nyumba ya yaya no munukuna, Marta na Maria. Ivona i shamwari ja Jesu na nyavanji wavo, Razaro zve vanomuashira ngo mwoyo wese.

I rukujo hukuru kuashira Mesiya pamuzi pavo. Marta ano cidaka-daka co kuitira Jesu zvaushoni, ngokudaro, anoshanda ngo simba pa kunasirira zvokuha zvinonaka ushoni. Marta paanoshanda, Maria munukunake anogara phedo no soka ja Jesu acimupurukira. Pa kufamba ko mukuvo, Marta anobvunja Jesu kudari: “Tenji, amutaji kuti hama yangu indirege ndega ndecibata basa? Ibvunjenyi, kuti ize kondibesa.”—Luka 10:40.

Kusiapo kuvereketera Maria, Jesu anopangira Marta ngo kuva kwake anokaya-kaya maningi ngo zviro zvo kunyama, aciti: “Marta, Marta, unocamwa ngenyi no kuneseka ngo bziro bzizinji? Ciro cimwe basi cinodikana. Maria wasana mbzakadi divi rauxoni raacingazotorehwi.” (Luka 10:41, 42) Jesu anonanga kuti azvidikani kupeja nguva yakawanda kuri kunasirira zvokuha zvakawanda. Zvishoma basi zvinokwana.

Marta aazivi kushaisha ngokuti ari kuda kutatija kuashira vafambi. Asi kukaya-kaya kwake maningi ngo zvokuha kuri kumuitisa kuti aruze ndhungamiriro jinobva ku Mwana wa Mwari. Ngokudaro, Jesu anokohomejera kuti Maria wanasa kusana. Izvo zvinozomubesera kuenda no kuenda zve i cijijo cinodikana kurangarihwa ndisu tese.

Pa mukuvo umweni, Jesu anojijisa cijijo cimweni cinosisira. Mujiji umweni anoti: “Tenji, tijijisenyi kunamata, inga Johani wakajijisa vajiji vake.” (Luka 11:1) Jesu wakazviita kare pa gore no meya rakapera, paaiita Hurukuro yo pa Dundhu. (Mateu 6:9-13) Asi kangaije mujiji uu acaengepopi, ngokudaro, Jesu anophinda mafundo makuru. Perepo anoita mufananijo unokohomejera dikano yo kugara kuri kuita mukumbiro.

“Kudari umwe wenyu ano xamwari, woenda kanyi kwayo, no mahungu, woibvunja kuti: ‘Xamwari, ndipovo mukate mutatu; ngokuti ndagumihwa, sambi wari, ngo xamwari yangu, kaveta, andina ciro cokuipa.’ Kudari yona ikamupingura ngo mumba kuti: ‘Ucandinyangaja; musuvo wakafungwa; inini no vana vangu, tapera kuvata, andikwanisi kumuka kuti ndikupe mikateyo.’ Ndinomubvunja kuti: Pikija icikadi kumuka komupa mukate ngokuti i xamwari yake, inozomuka, yomupa bzese bzoinoda, ngo ndava yo kuvangirira kwayo.”—Luka 11:5-8.

Jesu aaripi kunanga kuti Jehovha aadi kudavira mukumbiro, inga shamwari iyi. Mukusiyana, ari kukhombija kuti kudari shamwari icikadi inozodavira mundhu anovangirira kukumbira caari kuda, Baba vo kudenga vano rudo vanozodaviravo zvikumbiro zvo mwoyo wese, zvo vashandiri vavo vakagondeka. Jesu anoenderera mberi aciti: “Ndinomubvunja kuti: ‘Kumbiranyi, munozopuwa. Psanganyi, munozowana. Gugujanyi, munozozaurihwa. Ngokuti ndiani anokumbira anopuwa, anopsanga anowana, anoguguja anozaurihwa.’”—Luka 11:9, 10.

Perepo Jesu anocindira fundo rake iri ngo kuezanisa no majibaba o vandhu, eciti: “Ndiani wenyu, kudari mwana wake . . . akakumbira hove [anomupa] nyoka? Nokutibze akakumbira zanda womupa cinyavada? Imwimwi, muri vakaxata, munoziva kupa bzauxoni vana venyu, Baba wo mugore avazopi here mujimu mucena kwa vaya vanoukumbira”? (Luka 11:11-13) Izvo zvinotithembesa kamare kuti Baba wedu vano cido co kutizwa no kutipa zvotinokumbira.