Onakhumawo nsuwa omoko wa Mwaako Olivera, waacamela mastatiya meeli okhuma o Yerusalemu, wookhalawo muceche wa Petaniya. (Yohani 11:18) Yesu onnaya weiwo nave onnavolowa mpa mwa arokora eeli Marta ni Mariya. Awo ni muhima aya Lasaro, asinthamwene a Yesu nave annamwaakhela phaama.

Nla ncicimiho ntokweene okhala ni Mesiya ntoko muleco. Marta ori ooweiwa wi amvahe Yesu saphaama, mwawiihiiha owo onnaya olapa muteko wa orehererya yoolya yincipale. Vaavaa Marta onalapeiye, Mariya, okiraanthe o inaani sa Yesu nave onnanwiriyana Yesu. Mu elukuluku yeela, Marta onnaloca ni Yesu: “Pwiya, honapwatxha wi munnaka yowo okihiyerya mekhaka miteko? Omulèle wi arwe akikhaviherye.”—Luka 10:40.

Ohiya omuthoriha Mariya, Yesu onnamvaha ekano Marta ntakhara oweiwa wawe ni ichu soomwiilini: “Marta, Marta, weyano onnateteiwa ni onnukhuwa wa itxhu sintxipale. Nto etxhu yokhweleya eri emoharu. Maria, eparipari, othanla etxhu yaphamasa onereiye ahakhiwe.” (Luka 10:41, 42) Aai, moonelo wa Yesu onnooniherya vanlakani wi tahi yookhweleya omaliha elukuluku yincipale arehereryaka soolya osara ipiya sawaaca. Pahiru yoolya yookhweya waapeya ti yawaakhwanela.

Yoolakelela ya Marta ti yaphaama. Owo onachuna omwaakhela phaama muleco. Nyenya wuukhuwa wawe ntakhara yoolya enataphulela wi owo onnayeleela mahusiheryo asisapo a mwaana a Muluku! Yesu onnaceenyerya wi Mariya oopaka yoothanla ya miruku, yeeyo eni akhale yamphurelo wa yene hiiha tho wa hiyo nnaphwanela ohuseryavo echu wi nuupuweleleke.

Mu elukuluku ekina, Yesu onnavaha nihusiheryo noohiyana nyenya nimohamoha ti noochuneya. Amuhuserya annamukoha: “Pwiya onihusihe ovekela ntoko Yohani ahusin’heiyetho amuhuseryawe.” (Luka 11:1) Yesu iiha eenreno yeela muculi evinrevo eyaakha ni emeya va Mwaha awe wa Vamwaakoni. (Mateu 6:9-13) Mwawiihiiha, akhweya muhuserya yoola haarivo vaavaa Yesu aaloceiye mwaha yoola, mwawiihiiha Yesu onnuuluula miyaha mitokweene soohulela mwaha yoola. Voocharela owo onnavaha niphwanaphwaniho wi aceenyerye ochuneya waya otitelela ovekela.

“Mmoha wa nyuwo akhalano nthamwene awe ni arwà ohiyu oriyari, ariki: ‘Nthamwene, kipoleye iphau txharu, wona wi orwa muletxo aka, ni nkano etxhu yonvaha’; nave ole ari mpa akhulà: ‘Ohikùkhule, kòwalawo omilako, anamwane aka ni miyo nnamukona, nkinawerya ovinya wi kovahe iphau’, Miyo kinnolèlani ole anamwi ahivinnye wi amunnye iphau wa nthowa na onthamwene, onanvinya mano wa nthowa na nthìti wi anvahe sothene onakhweleiye.”—Luka 11:5-8.

Yesu hanataphulela wi Yehova hanachuna waakhula sooveka sahu, ntoko nthamwene ole. Moohiyana, Yesu onooniherya wi wakhala wi nthamwene ohinachuna onaakhula onnaneemererya natitelela omveka, hiihatho Tiithi ahu awirimu oosivela onahaala waakhula oveka woovinyerya vathi va murima wa alapeli awe! Yesu onnatitelela: “kinnolèlanitho; nvekeke ni muni munanvahiwa; mwasyeke ni munamphwanya; mmaneke nsele ni muni munamuhuleliwa. Ntakhara yole onaveka onnavahiwa, onasya onnaphwanya, ni onamana nsele onamuhuleliwa.”—Luka 11:9, 10.

Voocharela Yesu onnaceenyerya mwaha awe alikanyihaka ni asitiithi oomuchu: “Tani wa nyuwo, alipa òyara, mwanawe anveka ephau, anvaha nluku? Nari anvekaka ehopa, anvaha enowa?  Ni anvekaka notxe, anvaha eyalala? Vanonto nyuwo muri ònanara murima musuwela wavaha aninyu itxhu saphama, nka Tithinyu a wirimu havaha Munepa Wawela yawo ananveka?” (Luka 11:11-13) Ela ti yoororomeliha yoohakalaliha osuwela wi Atiithi ahu annachuna oniwiriyana ni onivaha seiho nnachunaahu!