Zezi flannin ndɛ ng’ɔ kɛnnin i Ɲanmiɛn srɛlɛ’n su’n, ɔ nin ndɛ cinnjin wie’m be nun ekun. I nun ng’ɔ o Galile mɛn’n nun lɔ’n, ɔ yili atrɛ. Sanngɛ lɔfuɛ’m be tɔnnin i suɛn kɛ mmusu’m be su kpɛn’n i fanngan nun yɛ ɔ fuan mmusu mun-ɔn. Zide mɛn’n nun lɔ’n, sran’m be kannin ndɛ kunngba’n be tɔnnin Zezi i suɛn.

Zezi fuannin mmusu kun m’ɔ yoli maan bian kun kacili bobo’n. Nanwlɛ, i sɔ’n boli sran’m be nuan! Sanngɛ w’a yoman be nga be tɔnnin Zezi i suɛn’n be fɛ. Afin be seli kɛ: “Bɛlzebubu m’ɔ ti mmusu’m be su kpɛn’n i fanngan nun yɛ ɔ fuan mmusu mun-ɔn.” (Liki 11:15) Sran wie’m be liɛ’n, be kunndɛli kɛ Zezi yo abonuan sa kun m’ɔ fin ɲanmiɛn su’n, ɔ kle be. I liɛ’n, be lafi su kɛ ɔ ti Ɲanmiɛn Wa.

Zezi wunnin kɛ be waan bé sɛ́ i bé nían. Ɔ maan ndɛ ng’ɔ fa tɛli be nga be tɔnnin i suɛn Galile lɔ’n be su’n, i kunngba’n yɛ ɔ fa tɛli sran sɔ’m be su-ɔ. Ɔ seli be kɛ famiɛn diwlɛ kwlaa nga i nunfuɛ’m be bubu be wun nun’n, ɔ kaman lɛ. I sin’n, ɔ seli kɛ: “Sɛ Satan bu i wun nun’n, ɔ́ yó sɛ bɔɔ cɛ naan i famiɛn diwlɛ’n w’a ka lɛ?” Kpɛkun ɔ seli sran’m be kɛ: “Sɛ Ɲanmiɛn wawɛ’n i fanngan nun yɛ n fuan mmusu mun’n, nn Ɲanmiɛn i Famiɛn dilɛ’n w’a fu amun nun.”​—Liki 11:18-20.

Zezi kannin “Ɲanmiɛn wawɛ’n” i ndɛ. Ndɛ sɔ’n kwla yo naan i ndɛ tiefuɛ’m be wla w’a kpɛn sa kun m’ɔ juli laa’n i su. Yɛle kɛ, kɛ be nga be di junman Ezipti famiɛn i awlo lɔ’n be wunnin atrɛ nga Moizi yili’n, be seli kɛ: “Nyanmiɛn i tinmin’n yɛ ɔ su di junman ng’ɔ o lɛ’n niɔn.” Asa ekun’n, Ɲanmiɛn wawɛ’n i fanngan nun yɛ Ɲanmiɛn bɔbɔ klɛli mmla blu mun yɔbuɛ paplaapla nɲɔn’m be su-ɔ. (Ezipt Lɔ Tulɛ 8:15; 31:18) I kunngba’n, Ɲanmiɛn wawɛ’n i fanngan nun yɛ Zezi fuan mmusu mun-ɔn, yɛ ɔ yo sran’m be juejue-ɔ. Ɔ maan Ɲanmiɛn i Famiɛn dilɛ’n w’a fu i kpɔfuɛ’m be nun. Afin Zezi m’ɔ ti i su famiɛn’n wo lɛ. I yɛ ɔ yili atrɛ sɔ mun-ɔn.

Zezi kwla fuannin mmusu mun. I sɔ’n kle kɛ i tinmin’n tra Satan i liɛ’n lele. Zezi kannin ndɛ kun yiyili i sɔ liɛ’n nun. Ɔ kannin yasua kun m’ɔ le wunmiɛn kpa’n i ndɛ. Yasua sɔ’n ko kwlali sran kun m’ɔ le alɛ ninnge kpanngban kpa fa nian sua kun su’n. I sin’n, Zezi wa kannin sran nga mmusu fin i nun fite’n i ndɛ ekun. Kɛ mmusu’n ko fite’n, sɛ sran sɔ’n yoman sa kpakpa mun’n, mmusu sɔ’n ko fɛ i wiengu mmusu nso ekun naan be wa wlu i nun. Ɔ maan wafa nga sran sɔ’n kaci kasiɛn su’n, ɔ yo tɛ tra klikli liɛ’n. (Matie 12:22, 25-29, 43-45) Kɛ Izraɛli nvle’n i liɛ’n yoli sɔ-ɔ.

Zezi nuan nin-a tɔman, kpɛkun bla kun m’ɔ o sran’m be afiɛn lɛ’n, ɔ kpan seli i kɛ: “Bla nga a ti i ku sɛ nun ba’n, ɔ nin ɲɔnflɛn nga a nɔnnin’n, be liɛ su ti ye!” Blɛ sɔ’n nun’n, bla kwlaa kunndɛ kɛ ba nga ɔ́ wú i’n, ɔ kaci Ɲanmiɛn nuan ijɔfuɛ. I li sɛ ba sɔ’n yɛ ɔ kaci Mesi’n, bla’n sɔ’n i liɛ su ti ye. Ɔ maan bla m’ɔ o sran’m be afiɛn lɛ’n buli i kɛ, kɛ mɔ Mari yɛ ɔ ti like klefuɛ’n i nin’n ti’n, i liɛ su ti ye. Sanngɛ Zezi seli bla sɔ’n kɛ: “Cɛcɛ! Se kɛ be nga be ti Ɲanmiɛn ndɛ’n mɔ be fa su’n, be liɛ su ti ye!” (Liki 11:27, 28) Zezi w’a kunndɛman le kɛ be bu Mari i sran tra bla onga mun. I sɔ’n kle kɛ, sɛ e ti bla-o, sɛ e ti yasua-o, nán e osufuɛ kun annzɛ ninnge nga e yoli be mun’n be ti yɛ e liɛ yó ye-ɔ. Sanngɛ Ɲanmiɛn junman mɔ e tu e klun e di’n, i ti yɛ e liɛ yó ye-ɔ.

Sran wie’m be kunndɛli kɛ Zezi yo nzɔliɛ like m’ɔ fin ɲanmiɛn su’n kle be. Sanngɛ ɔ ijɔli be kɛ nga ɔ fa ijɔli sran mun Galile lɔ’n sa. Ɔ seli be kɛ sɛ w’a yoman “Zonasi i nzɔliɛ like” liɛ’n, be su yoman nzɔliɛ like uflɛ fi be kleman be. Zonasi i nzɔliɛ like sɔ’n yɛle cɛn nsan m’ɔ dili jue’n i klun lɔ’n, ɔ nin jasin m’ɔ ko boli i yakpa su kleli Ninivufuɛ mun’n. Jasin sɔ’n ti’n, be kacili be akunndan’n. Zezi kan guali su kɛ: “Sanngɛ amun nian! Sran kun o wa’n, i dan tra Zonasi.” (Liki 11:19-32) Asa ekun’n, Zezi i dan tra Salomɔn. Kusu nn ngwlɛlɛ mɔ Salomɔn si i dan’n ti’n, Seba famiɛn bla’n ko niɛnnin i osu kɛ ɔ́ tí i nuan ndɛ.

Zezi seli ekun kɛ: “Sran ng’ɔ sɔ kannin nuan’n, ɔ fa fiaman annzɛ ɔ fa wlɛmɛn i gbogbo bo. Sanngɛ ɔ fa sie i kannin siewlɛ’n su.” (Liki 11:33) Kɔlɛ’n, Zezi  i ndɛ’n i bo’n yɛle kɛ like m’ɔ kleli sran sɔ mun’n, ɔ nin atrɛ ng’ɔ yili be’n be ti kɛ kannin wie mɔ b’a kata su’n sa. Kɛ mɔ Ɲanmiɛn klun sa yolɛ’n timan sran sɔ’m be cinnjin’n ti’n, b’a wunman atrɛ sɔ’m be wlɛ.

Kɛ Zezi fuannin mmusu ng’ɔ o bobo bian’n nun’n, bian sɔ’n kwla ijɔli. Ɔ maan ɔ fata kɛ be nga be tɔnnin Zezi i suɛn’n, be manman Zoova. Yɛ ɔ fata kɛ be kan junman ng’ɔ di’n i ndɛ kle sran mun. Sanngɛ b’a yoman sɔ. I sɔ’n ti’n, Zezi seli be kɛ: ‘An nian amun wun su naan kannin m’ɔ o amun nun’n w’a yoman aosin. Sɛ amun wunnɛn wunmuan’n kpaja naan i lika fi timan aosin’n, ɔ́ kpája kɛ nga kannin fa kpaja amun ɲrun’n sa.’​—Liki 11:35, 36.