Jesu akorũo o hĩndĩ acokera ũrĩa aarutanĩte igũrũ rĩgiĩ kũhoya, no ũcio toguo ũndũ ũrĩa anabatara gũcokera makĩria ma riita rĩmwe hĩndĩ ya ũtungata wake. Rĩrĩa aaringaga ciama Galili, Jesu eerirũo atĩ eekaga ũguo akĩhũthĩra hinya umĩte kũrĩ mũnene wa ndaimono. Ũndũ ũcio rĩu ũkoimĩra rĩngĩ arĩ Judea.

Thutha wa Jesu kũruta mũndũ ndaimono ĩrĩa yatũmaga aremwo kwaria, kĩrĩndĩ gĩkagega. No andũ arĩa maramũkararia makoimĩria ũndũ ta ũrĩa eerĩtwo hau kabere makoiga: “Aingataga ndaimono na hinya wa Beelizebuli, ũrĩa mũnene wa ndaimono.” (Luka 11:15) Angĩ nao makĩenda kũmenya Jesu makĩria makamwĩra amaringĩre kĩama kiumĩte igũrũ.

Jesu akamenya atĩ marenda kũmũgeria, kwoguo akameera ta ũrĩa eerĩte andũ angĩ ta acio rĩrĩa aarĩ Galili. Akoiga atĩ ũthamaki o wothe ũngĩkorũo ũgayũkanĩte ndũngĩrũgama, na akongerera atĩ: “Angĩkorũo Shaitani nĩ agayũkanĩte-rĩ, ũthamaki wake ũngĩkĩrũgama atĩa?” Agacoka akameera ũũ atekũmahitha: “Angĩkorũo nyingataga ndaimono kũgerera kĩara kĩa Ngai, Ũthamaki wa Ngai nĩ ũmũhĩtũkĩte mũtekũmenya.”​—Luka 11:​18-20.

Ciugo “kĩara kĩa Ngai” iria Jesu agweta ibatiĩ kũririkania arĩa maramũthikĩrĩria ũndũ wekĩkire kĩambĩrĩria-inĩ kĩa historĩ ya Aisiraeli. Arĩa moonire Musa akĩringa kĩama nyũmba-inĩ ya Firauni moigire: “Ũndũ ũyũ nĩ wa kĩara kĩa Ngai.” Ningĩ “kĩara kĩa Ngai” nĩkĩo kĩandĩkire Maathani Ikũmi ihengere-inĩ iria igĩrĩ cia mahiga. (Thama 8:19; 31:18) ‘Kĩara kĩu kĩa Ngai,’ nĩkĩo roho mũtheru kana hinya ũrĩa Ngai ahũthagĩra, nokĩo kĩrahotithia Jesu kũingata ndaimono na kũhonia arĩa arwaru. Kwoguo, Ũthamaki wa Ngai nĩ ũhĩtũkĩte andũ acio maramũũkĩrĩra, tondũ Jesu, o we Mũthamaki ũrĩa ũthurĩtwo, arĩ hau gatagatĩ-inĩ kao akĩringa ciama icio.

Ũhoti wa Jesu wa kũingata ndaimono nĩ ũronania atĩ nĩ arĩ hinya gũkĩra Shaitani. Jesu ningĩ agacokera ngerekano ĩgiĩ rĩrĩa roho mũru woima thĩinĩ wa mũndũ. Mũndũ ũcio angĩaga kũihũria ithenya rĩu na maũndũ mega, roho ũcio ũgũcoka na maroho mangĩ mũgwanja, matũme akorũo arĩ mũru makĩria ma ũrĩa aarĩ mbere. (Mathayo 12:​22, 25-29, 43-45) Ũguo nĩguo rũrĩrĩ rwa Isiraeli rũhaana.

Mũtumia ũmwe ũrathikĩrĩria Jesu akahutio ngoro akoiga: “Gũkena nĩ nda ĩrĩa yagũkuuire na nyondo iria woongire!” Atumia aingĩ Ayahudi nĩ meeriragĩria gũciara mũnabii, na makĩria Mesia. Kwoguo no kũhoteke mũtumia ũcio areciria atĩ Mariamu nĩwe mũndũ ũrĩa mũkenu mũno, nĩ ũndũ wa gũkorũo arĩ nyina wa mũrutani mũũgĩ ũguo. No Jesu akarũnga mũtumia ũcio akonania ũrĩa gĩkeno kĩa ma kĩngĩoneka akoiga: “Aca, gũkena-rĩ, nĩ arĩa maiguaga kiugo kĩa Ngai na magakĩrũmia!” (Luka 11:​27, 28) Gũtirĩ hĩndĩ Jesu arĩ oiga atĩ Mariamu nĩ abatiĩ gũtũgĩrio. Kwoguo gĩkeno kĩa ma harĩ mũndũ o wothe, mũthuri kana mũtumia, kiumanaga na gũkorũo arĩ mwĩhokeku harĩ Ngai, no ti gũkorũo metainwo na mũndũ mũna kana maũndũ marĩa ahingĩtie.

O ta ũrĩa eekire thĩinĩ wa Galili, Jesu akarũnga andũ nĩ ũndũ wa kũmwĩra amaringĩre kĩama kiumĩte igũrũ. Akoiga atĩ gũtirĩ kĩama mekuona tiga o “kĩrĩa kĩa Jona.” Jona aatuĩkire kĩama na njĩra ya atĩ aaikarire thĩinĩ wa nda ya thamaki thikũ ithatũ, na ningĩ akĩhunjia arĩ na ũmĩrĩru nginya agĩtũma andũ a Nineve merire. Jesu agacoka akoiga: “No rĩrĩ, haha harĩ na mũndũ ũkĩrĩte Jona.” (Luka 11:​29-32) Jesu ningĩ nĩ mũnene gũkĩra Suleimani ũrĩa warĩ na ũũgĩ mũingĩ nginya mũthamaki wa Sheba agĩthiĩ kwĩiguĩra.

Jesu agacoka akoiga: “Thutha wa gwakia tawa mũndũ ndaũigagĩrĩra handũ hehithĩte kana akaũkunĩkĩria na gĩkabu, ĩndĩ aũigagĩrĩra handũ igũrũ.”  (Luka 11:33) No gũkorũo arenda kuonania atĩ kũruta andũ acio na kũmaringĩra ciama nĩ ta kũhitha ũtheri wa tawa. Tondũ maitho mao matikoragwo marũngĩrĩirie, matirataũkĩrũo nĩ kĩrĩa gĩtũmaga eke maũndũ marĩa ekaga.

Jesu akorũo o hĩndĩ aingata ndaimono na atũma mũndũ ũtahotaga kwaria arie. Ũndũ ũcio ũbatiĩ gũtũma andũ acio magooce Ngai, na meere arĩa angĩ maũndũ marĩa Jehova arahingia. Nĩkĩo Jesu ararũnga arĩa maramũũkĩrĩra akameera: “Nĩ ũndũ ũcio wĩmenyagĩrĩre, nĩ getha ũtheri ũrĩa ũrĩ thĩinĩ waku ndũgakorũo ũrĩ nduma. Gũkĩrĩ ũguo-rĩ, angĩkorũo mwĩrĩ waku wothe ũrĩ na ũtheri na ndũrĩ handũ ũrĩ na nduma, ũrĩkengaga o ta ũrĩa tawa ũkũmũrĩkagĩra na mĩrũri ya ũtheri.”​—Luka 11:​35, 36.