Yezu udi ufuma ku diambulula mibelu yende bua disambila, kadi tshiena-bualu etshi tshidi patshi mu biena-bualu bivua Yezu muambe misangu mipite pa umue mu mudimu wende wa diyisha. Pavua Yezu wenza bishima mu Galela, bakamushiminyina bamba ne: uvua wenza bishima ku diambuluisha dia bukole bua mfumu wa bademon. Kadi mpindieu mu Yudaya badi kabidi bamushiminyina bualu ebu.

Pavua Yezu mumbushe demon uvua upangisha muntu kampanda bua kuakula, musumba wa bantu wakakema bikole. Kadi kabiakakemesha bamubandi to. Badi bamushiminyina kabidi bamba ne: “Udi wipata bademon ku diambuluisha dia Belezebula, mfumu wa bademon.” (Luka 11:15) Bakuabu badi bakeba tshijadiki tshikuabu tshidi tshifumina mu diulu bua bobu kushisha kumanya bumuntu buende.

Kadi bu muvua Yezu mujingulule ne: bavua bakeba kumuteta, wakabapesha diandamuna dia muomumue ne divuaye mupeshe bantu bavua bamubande mu Galela. Udi uleja mudi bukalenge buonso budi butapuluke nkayabu ne bua kukuluka wamba ne: “Bikala Satana mupanduluke yeye nkayende, mmunyi muashindama bukalenge buende?” Pashishe Yezu udi ubambila diakamue ne: “Kadi bingikala ngipata bademon ku diambuluisha dia munu wa Nzambi, Bukalenge bua Nzambi mbumane kufika bushuwa kunudi.”​—Luka 11:18-20.

Mêyi a Yezu a ne: “munu wa Nzambi” avua ne bua kueleshisha bamuteleji meji bua tshivua tshifikile bena Isalele ba kale. Bantu bavua mu lubanza lua Palô bakamona muvua Mose muenze bishima bakakema ne: “Eu mmunu wa Nzambi!” “Munu wa Nzambi” ke uvua mufundishe kabidi Mêyi Dikumi pa mabue abidi. (Ekesode 8:19; 31:18) Bia muomumue “munu wa Nzambi,” mmumue ne: nyuma wende muimpe anyi bukole buende buenzeji ke buvua buambuluishe Yezu bua kuipata bademon ne bua kuondopa babedi. Nunku Bukalenge bua Nzambi buvua bushuwa bufike kudi baluishi aba, bualu Yezu Mukalenge wa Bukalenge bua Nzambi uvua munkatshi muabu wenza bishima ebi.

Bukole bua Yezu bua kuipata nabu bademon ntshijadiki tshia muvuaye mupite Satana bukole, bienze anu bu padi muntu wa makanda usemena ne utshimuna muntu kampanda udi ulama nzubu muikale ne bia mvita. Yezu wakambulula kabidi tshilejilu tshiende tshia nyuma wa bukoya uvua mupatuke munda mua muntu. Muntu eu yeye kayi muwuje muaba udi mushale mutupu ne bintu bimpe, nyuma au neapingane ne nyuma mikuabu muanda mutekete, yenza bua nsombelu wende anyanguke bikole kupita kumpala. (Matayi 12:22, 25-29, 43-45) Ke muvuabi bienzekele tshisamba tshia Isalele.

Muntu mukaji kampanda uvua uteleja Yezu wakakema bikole wamba ne: “Difu divua dikuambule ne mabele avua makuamushe mbia diakalenga!” Muntu mukaji yonso muena Yuda uvua mutekemene bua kuikala mamuende wa muprofete, nangananga wa Masiya. Nunku muntu mukaji au uvua mua kuikala muele meji ne: Mariya uvua ne bua kuikala ne disanka dia bungi bu muvuaye mamuende wa mulongeshi. Kadi Yezu wakabela muntu mukaji eu umuleja tshivua tshifila diakalenga dilelela wamba ne: “Tòo, kadi, bantu badi bateleja dîyi dia Nzambi ne badilama ke ba diakalenga!” (Luka 11:27, 28) Yezu kavua muleje musangu nansha umue ne: bavua ne bua kupesha Mariya bunême bua pa buabu to. Kadi bua muntu yonso ni mulume anyi mukaji, disanka dilelela didi difumina ku dikala muena mudimu wa lulamatu wa Nzambi, ki nku malanda a ku mubidi anyi bua malu kampanda adiye muenze to.

Anu muvua Yezu muenze mu Galela, wakabela bantu bavua balomba tshimanyinu tshia mu diulu ne dîsu dikole. Wakamba ne: kabakubapesha tshimanyinu nansha tshimue to, anu “tshimanyinu tshia Yona.” Yona uvua muenze bu tshimanyinu pavuaye muenze matuku asatu munda mua mushipa ne pavuaye uyisha ne dikima, malu avua masake bena Niniwe bua kunyingalala. Yezu wakamba ne: “Kadi monayi! tshidi tshipite Yona tshidi muaba eu.” (Luka 11:29-32) Yezu uvua kabidi mupite Solomo uvua ne meji avua mukalenge mukaji wa mu Sheba mumvue bualu buawu.

Yezu wakasakidila ne: “Muntu yeye mumane kutemesha muendu, kena uwuteka muaba musokome anyi muinshi mua tshibondo to, kadi udi uwuteka pa tshitekelu tshia muendu.” (Luka 11:33) Uvua  usua kuamba ne: kulongesha ne kuenza bishima kumpala kua bantu aba kuvua bu kusokoka butoke bua muendu. Bu muvuabu kabayi batuishile mêsu ku bualu ebu, bakapangila tshipatshila tshia bishima bia Yezu.

Yezu uvua ufuma ku dipata demon ne ku diambuluisha muntu uvua kayi wakula bua kuakula. Bualu ebu buvua ne bua kuikala busake bantu bua kutumbisha Nzambi ne kuambila bantu bakuabu malu akavua Yehowa muenze. Nunku Yezu wakadimuija bamubandi ne mêyi aa: ‘Ikalayi badimuke bua butoke budi munda muenu kabuikadi mîdima. Nunku, bikala mubidi wenu mujima ukenka kawuyi ne katupa nansha kamue kadi mîdima, newikale wonso ukenka bu padi muendu utokesha ne nsese yawu.’ (Luka 11:35, 36)