Imayna mañakuymanta wajmanta yachachisqanmantapas Jesusqa juj temakunamantapas wajmantan rimaran Judeapi kashaspaqa. Chaypin wakin runakuna payta juchacharanku Galileapi wakin umallikuna jina. Chay umallikunan paymanta niranku: ‘Supaykunata kamachiqpa atiyninwanmi milagrokunata ruwan’, nispa.

Chhaynatan Judea ladopipas wakin runakuna Jesusmanta rimaranku juj runamanta upayachiq supayta qarqoqtin. Runakunaqa ancha admirasqan chaywan kasharanku, paykunan ichaqa niranku: “Kay runaqa supaykunata kamachiq Beelzebubpa atiyninwanmi supaykunata qarqon”, nispa (Lucas 11:15). Wakintaq mañakuranku cielomanta juj señalta rikuchinanpaq.

Jinan Jesusqa pruebaman churayta munasqankuta reparaspa Galileapi juchachaqninkunaman nisqanta jina paykunatapas niran: ‘Mayqen nacionpas t’aqanasqa kaspaqa tukukapunmanmi. Chhaynaqa Satanaschus pay kikillantaq contranpi sayarinman chayqa, ¿imaynapitaq gobiernonri allin sayasqa kanman? Diospa atiyninwanchus supaykunata qarqoni chayqa, Diospa gobiernonmi qonqaylla qankunaman chayaramun’, nispa (Lucas 11:18-20).

Jesuspa ‘Diospa atiyninwan’ nisqanqa ‘Diospa dedonwan’ ninmi griego rimaypiqa. Chay nisqanmi runakunata yuyarichinman karan ñaupa tiempopi rey faraonpa serviqninkunaq nisqanta. Paykunan Moisespa milagro ruwasqanmanta niranku: “Kayqa Diospa dedonwan ruwasqan”, nispa. Chay ‘Diospa dedonmi’ chunka kamachikuy simikunatapas qelqaran (Éxodo 8:19, NM; 31:18). Chay ‘Diospa dedonqa’ Diospa santo espiritunmi karan. Chaywanmi Diospa churasqan rey Jesusqa supaykunata qarqoran, onqosqakunatapas qhaliyachiran. Chayraykun payqa niran: “Diospa gobiernonmi qonqaylla qankunaman chayaramun”, nispa.

Chaymantan Jesusqa willaran wasinta cuidaq allin armasqa runata juj kallpasapa runa atipasqanmanta, chaywanmi payqa rikuchiran Satanasmanta aswan atiyniyoq kasqanta, chaymi payqa supaykunatapas qarqoran. Chaymantapas Jesusqa wajmantan willaran imas pasan juj runamanta supay lloqsipuqtin chayta. Chay runa allin kaqkunata mana ruwaqtinqa kutimpullansi chay supayqa qanchis supaykunatawan pusarikuspa, chhaynapis chay runaqa aswan mana allinpiraq rikukapun (Mateo 12:22, 25-29, 43-45). Chay jinan pasaran Israel llaqtawanpas.

Chaymantan juj warmi Jesusta niran: “Kusisqa kachun onqokuqniyki, ñuñuqniyki warmiqa”, nispa. Chay tiempopi judía warmikunaqa anchatan munaqku pi profetapas otaq Mesiaspas paykunamanta nacenanta. Chaymi chay warmiqa Jesuspa maman Mariata ancha kusisqa kananpaq piensaran. Jesusmi ichaqa mana jayk’aqpas niranchu maman Mariata ancha allinpaq qhawarinapaqqa, chaymi niran: “Manan, aswanpas Diospa siminta uyarispa waqaychaqkuna kusisqaqa kachunku”, nispa (Lucas 11:27, 28). Chhaynaqa Diosta tukuy sonqo serviypin cheqaq kusikuyqa kan, manan piqpa familian kaypichu nitaq ima ruwaypipaschu.

Chaymantan Jesusqa señal ruwananta mañakuqninkunata anyaran, jinaspa willaran profeta Jonás challwaq wijsanpi kinsa p’unchay kasqan, imayna predicasqanpiwan juj señal jina paykunapaq kananta. Chay profetaq predicasqanwan askha runakuna juchankuta saqepusqankumanta rimaspataq niran: “Qhawariychis, Jonasmantapas aswan jatun profetan kaypiqa kashan”, nispa (Lucas 11:29-32). Chaymantataq  rikuchiran payqa Salomonmantapas aswan yachayniyoq kasqanta.

Jesusqa nillarantaqmi: “Pipas mecherota jap’ichispaqa manan paka k’uchumanchu churan, nitaq canastawanchu pakaykun ¿riki?”, nispa (Lucas 11:33). Chaywanmi payqa nishanman karan paykunata yachachiyqa mecherota pakay jina kasqanta. Manataq imatapas entiendeyta munarankuchu chayqa, yanqañan karan paykunata yachachiyqa.

Paykunaqa manan Jehová Diosta jatuncharankuchu Jesús upa runamanta supayta qarqoqtinqa, chaymi Jesusqa paykunata niran: ‘Allinta qhawarikuychis, qankunapi kaq k’anchaytaq tutayaq kashanman. Chhaynaqa, llapan cuerpoykichischus k’ancharishan, manataq imachallanpas tutapichu kashan chayqa, cuerpoykichismi mechero jinaraq allinta k’ancharinqa’, nispa (Lucas 11:35, 36).