Jésus alondo ti kiri ti mû awango na ndo ti tënë ti sambela, me a yeke gi oko tënë so lo kiri lo tingbi na ni na yâ ti kua ti lo ti fango tënë la ape. Lani, na ngoi so lo sara amiracle na Galilée, azo atene so lo yeke sara amiracle ni na lege ti ngangu ti mokonzi ti asioni yingo. Fadeso, na Judée, lo kiri lo tingbi na tënë ni so.

Na ngoi so Jésus atomba mbeni sioni yingo so asara si mbeni koli ayeke sara tënë ape, li ti azo mingi akpe, me awato ti lo ape. Ala kiri atene ngbene tënë so ala tene lani, ala tene: “Lo tomba asioni yingo na ngangu ti Béelzéboub, mokonzi ti asioni yingo.” (Luc 11:15). Ambeni ahunda na lo ti sara mbeni fä so alondo na yayu, ti hinga wala lo yeke zo wa?

Teti so lo bâ so ala ye gi ti tara lo, Jésus akiri atene même tënë so lo tene lani na awato ti lo so atene a-oko tënë ti ala ni so na Galilée. Lo tene so, royaume kue so akangbi ayeke tï, na lo tene: “Tongana yâ ti Satan akangbi, royaume ti lo ayeke ngbâ na nduzu tongana nyen?” Na pekoni, Jésus atene na ala polele atene: “Tongana a yeke na lege ti li ti maboko ti Nzapa si mbi yeke tomba asioni yingo, andâ Royaume ti Nzapa asi na ala awe si ala hinga ape so.”—Luc 11:18-20.

Tongana ala mä Jésus na sarango tënë ti “li ti maboko ti Nzapa”, azo so ayeke mä lani lo adoit ti rappelé na aye so asi ândö na yâ ti mbaï ti azo ti Israël. Tongana azo so ayeke na yangbo ti Pharaon abâ amiracle so Moïse asara lani, ala tene: ‘So ye ti maboko ti Nzapa la!’ A yeke nga “li ti maboko ti Nzapa” la asara aCommandement Bale-oko na ndo ti atableau ti tênë use (Exode 8:19; 31:18). Legeoko nga, a yeke nga “li ti maboko ti Nzapa”, wala yingo vulu ti lo, la amû lege na Jésus ti tomba asioni yingo na yâ ti azo nga ti sava akobela ti azo ni. Tongaso, Royaume ti Nzapa asi na awato ti Jésus sân ti tene ala hinga ni, ngbanga ti so Gbia ti Royaume ni, Jésus, ayeke na tere ti ala ge na lo la lo yeke sara amiracle so.

So Jésus apeut ti tomba asioni yingo na yâ ti azo, afa polele so lo yeke na ngangu na ndo ti Satan. Jésus akiri amû mbeni tapande so lo mû lani kozo awe na ndo ti mbeni sioni yingo so asigi na yâ ti mbeni koli. Tongana koli ni azia anzoni ye na place ni ape, fade sioni yingo ni ayeke kiri na lo yeke ga na ambeni mba ti lo mbasambala, ye so ayeke sara si pasi ti koli ni akiri ahon ti kozo (Matthieu 12:22, 25-29, 43-45). Na lege ti fä, a yeke ye so asi na mara ti Israël lani la.

Mbeni wali amä Jésus ngbii na lo tene: “Ngia ayeke na yâ so lani ayô mo nga na me so mo nyon!” Ândö, awali Juif aye lani ti duti mama ti mbeni prophète, mbilimbili ti Messie. Tongaso, peut-être wali so apensé so Marie adoit ti duti na ngia ndali ti so lo yeke mama ti mbeni zo so ahinga ti fa ye nzoni. Ye oko, Jésus aleke bango ndo ti wali ni, lo tene: “Ên-ën. Ngia ayeke na ala so amä tënë ti Nzapa na abata ni!” (Luc 11:27, 28). Jésus ahunda lâ oko ape ti tene a mû gonda mingi na Marie. Me, tâ ye so ayeke ga na ngia na mbeni koli wala na mbeni wali ayeke ti duti mbeni wakua be-ta-zo ti Nzapa, me pëpe ti duti fami ti mbeni zo wala ndali ti so zo asara mbeni kpengba ye.

Tongana ti so lo sara na Galilée, Jésus asuku na azo so ahunda na lo ti sara mbeni fä so alondo na yayu. Lo tene na ala so a yeke sara na ala mbeni fä oko ape nde na “fä ti Jonas.” Jonas asara fä ni na lege so lo sara lango ota na yâ ti susu nga na lege ti fango tënë ti lo, na ye so asara si azo ti Ninive achangé bê ti ala. Jésus atene: “Me bâ, mbeni zo ayeke ge so ayeke kota ahon Jonas.” (Luc 11:29-32). Jésus ayeke nga kota ahon Salomon, so gbia-wali ti Séba aga ti mä ndara ti lo.

Jésus akiri atene: “Tongana mbeni zo azia wâ na lampe awe, lo yeke zia ni pëpe na mbeni ndo ti honde ni wala lo yeke zia ni na gbe ti sakpa pëpe, me lo yeke zia ni na ndo ti ye ti yongo lampe.” (Luc 11:33). Lo ye ti fa so afango ye ti lo nga na amiracle so lo sara na lê ti ala, azo ni so, ayeke tongana hondengo lumière ti mbeni lampe la. Azo ni ahinga nga ngbanga ti nyen la lo yeke sara aye ni so kue ape, ngbanga ti so ala bâ ndo nzoni ape.

Jésus atomba sioni yingo nga lo sara si koli ni akomanse ti sara tënë. Ye so adoit ti pusu azo ti mû gonda na Nzapa nga ti sara tënë ti aye so Jéhovah asara so na ambeni zo. Ni la, Jésus atene tënë so na awato ti lo: “Tongaso, sara hange si lumière so ayeke na yâ ti mo aduti bingo ape. Ni la, tongana tere ti mo kue aza lumière, na mbeni mbage ni ayeke na yâ ti bingo ape, tere ti mo kue ayeke za tongana ti so lampe ayeke za lumière ti lo na mo.”—Luc 11:35, 36.