Yapa, ndipu Yesu wawerezapu ŵaka kukamba ulongozgi wa mo ŵanthu angapemphere. Kweni yenga nkhani ya pempheru pe cha yo Yesu wanguyikamba mwakuwerezawereza wachichita uteŵeti waki. Pa nyengu yo Yesu wanguchita vakuziziswa ku Galileya, ŵanthu angumumba mulandu kuti wachitanga vakuziziswa munthazi ya mura wa viŵanda. Sonu wati wafika ku Yudeya, ŵanthu angumumba so mulandu wenuwu.

Ŵanthu anguzizwa ukongwa Yesu wati watuzga chiŵanda cho chatondekesanga munthu munyaki kulongoro. Kweni ŵanthu wo amususkanga anguzizwa cha ndi venivi. Yiwu angumumba so mulandu waboza wakuti: “Watuzga viŵanda mu nthazi yaku Belezebule, mura wa viŵanda.” (Luka 11:15) Ŵanthu anyaki akhumbanga kuti Yesu waŵalongo chisimikizu chakutuliya kuchanya kuti aziŵi kuti iyu ndiyani.

Yesu wati waziŵa kuti ŵanthu ŵenaŵa akhumbanga kumuyesa, wanguŵamuka mwakuyanana ndi mo wangumukiya ŵanthu wo amususkanga ku Galileya. Iyu wangukamba kuti ufumu wewosi wakugaŵikana ukho cha kweni utuwa. Iyu wanguŵakonkhoske kuti: “Asani Satana nayu wagaŵikana, ufumu waki ungakho wuli?” Pavuli paki Yesu wanguŵakambiya mwambula kubisa kuti: “Asani ndituzga viŵanda ndi chikumbu chaku Chiuta, ndikuti Ufumu waku Chiuta wakubuchizgani nadi.”—Luka 11:18-20, mazu nga mumphata.

Mazu ngakuti “chikumbu chaku Chiuta” ngo Yesu wangukamba ngangukumbusa ŵanthu wo amuvwisiyanga vo vinguchitika mu nyengu ya Ayisirayeli. Ŵanthu wo anguwona Mozesi mubwalu laku Farawo wachichita chakuziziswa, angudaniriza kuti: “Ntchikumbu chaku Chiuta!” Kusazgapu pa fundu yeniyi, “chikumbu chaku Chiuta” ndichu so chingulemba Marangu 10 pa mya yiŵi. (Chituwa 8:19; 31:18) Mwakuyanana waka, “chikumbu chaku Chiuta” cho chimiya mzimu wakupaturika pamwenga kuti nthazi yo Chiuta wagwiriskiya ntchitu, ndichu chawovyanga Yesu kuti watuzgengi viŵanda kweniso kuti wachizgengi ŵanthu wo atamanga. Mwaviyo, Ufumu waku Chiuta unguŵabuchizga nadi ŵanthu wo asuskanga Yesu. Tikamba viyo chifukwa chakuti Yesu yo ndi Fumu ya Ufumu wenuwu wenga nawu limoza ndipu ndiyu yo wachitanga vakuziziswa venivi.

Chifukwa chakuti Yesu watuzganga viŵanda, wangulongo kuti we ndi nthazi kuphara Satana. Venivi vingayanana ŵaka ndi vo vingachitika asani munthu wanthazi ukongwa wathereska mulinda wa panyumba yachifumu yo wenga ndi vidya vosi vakukwana vakujivikiriya. Yesu wanguwerezapu so ntharika yaki yakukwaskana ndi munthu yo wangutuzgika mzimu uheni. Asani munthu uyu wanguleka kuŵikamu vinthu vamampha mumtima waki, mzimu uheni wo ungutuwamu watingi uweriyengi so mwaku iyu ndi mizimu yinyaki yiheni 7 yo yatingi yimusuzgengi ukongwa kuluska pakwamba. (Mateyu 12:22, 25-29, 43-45) Venivi ndivu vinguchitika ndi mtundu wa Ayisirayeli.

Munthukazi munyaki wati wavwa vo Yesu wangukamba, wangudaniriza kuti: “Ngwakutumbikika munthukazi yo nthumbu yaki yingukupingani ndipuso yo munguwonkha maŵe ngaki!” Munthukazi munyaki wachiyuda ndiyu wenga anyina aku Mesiya. Mwaviyo, munthukazi uyu waŵanaŵananga kuti Mariya ndiyu watenere kukondwa ukongwa chifukwa wenga anyina a msambizi wamampha mwenuyu. Kweni Yesu wangukambiya munthukazi mwenuyu vo vichitiska kuti munthu wakondwengi. Iyu wanguti: “Ndi viyo cha, kweni mbakutumbikika wo atuvwa mazu ngaku Chiuta ndi kungasunga!” (Luka 11:27, 28) Yesu wangukambapu cha kuti ŵanthu atenere kumutumbika mwapade Mariya. Iyu, wangukambapu cha kuti munthu wangaja walikondwa chifukwa cha ubali wo we nawu ndi munthu munyaki pamwenga vinthu vo wafiska kuchita. M’malu mwaki, wanguti munthu wangaja ndi likondwa asani ndi mteŵeti wakugomezgeka waku Chiuta.

Yesu wanguchenya so ŵanthu a ku Yudeya nge po wanguchitiya ndi ŵanthu a ku Galileya chifukwa chakuti akambanga kuti waŵalongo chisimikizu chakutuliya kuchanya. Iyu wangukamba kuti ŵanthu ŵenaŵa apaskikengi chisimikizu chinyaki cha kupatuwaku “chisimikizu chaku Yona.” Yona wangupereka chisimikizu munthowa ziŵi. Yakwamba, wanguja mumoyu mwa chisomba mazuŵa ngatatu. Ndipu yachiŵi wangupharazga mwachiganga vo vinguchitiska kuti ŵanthu a ku Nineve alapi. Yesu wangukamba kuti: “Kweni awonani! munthu munyaki wakuluska Yona we panu.” (Luka 11:29-32) Yesu waluskanga so Solomoni yo Fumukazi ya ku Sheba yinguza kuzivwa zeru zaki.

Yesu wangukamba so kuti: “Asani munthu wabusa nyali, watiyibisa cha pamwenga kuyibenekere ndi sokola, kweni watiyiŵika pachakuŵikapu nyali.” (Luka 11:33) Panyaki  Yesu wang’anamuwanga kuti kusambiza kweniso kuchita vakuziziswa pamasu pa ŵanthu ŵenaŵa kwayanananga ŵaka ndi kubenekere ukweru wa nyali. Tikamba viyo chifukwa chakuti yiwu akhumbanga cha kuwona ukweru wenuwu vo vinguchitiska kuti aleki kuziŵa chifukwa cho Yesu wachitiyanga vakuziziswa.

Pa nyengu iyi, ndipu Yesu watuzga ŵaka chiŵanda kweniso wanguchitiska kuti munthu yo wenga wambula kuŵereŵeta wayambi kulongoro. Venivi vatingi vichitiskengi ŵanthu kuti athamiki Chiuta ndipuso akambiyeku ŵanthu anyaki vinthu vamampha vo Yehova wachitanga. Kweni ŵanthu wo amususkanga anguchita cha venivi. Ndichu chifukwa chaki Yesu wanguŵatcheŵesa kuti: “Mwaviyo, phwere kuti ukweru wo we mwaku yiwi ungaŵanga mdima cha. Sonu asani liŵavu laku losi ndikweru kwambula chigaŵa chinyaki cha mdima, ndikuti losi lazamuŵala ukongwa nge mo nyali yitikupaskiya ukweru waki.”—Luka 11:35, 36.