Jesús aku xlichuwinankgonita xlakata la tlawakan oración, pero uma ni kajwatiya tuku makglhuwa masiya akxni lichuwinama Dios. Anta kʼGalilea limawakaka pi xtlawa milagros xlakata xlitliwakga xmapakgsina demonios. La uku, kJudea, nachuna limawakamaka.

Akxni Jesús tamakxtu demonio nema xtlawa pi chixku xkgokgolh, latamanin kaks lilakawankgo. Pero ni putum chuna lakpuwankgo. Makgapitsi limawakaparakgo tuku nixlikana: «Kalitamakxtu demonios xlitliwakga Belcebú, xmapakgsinakan demonios» (Lucas 11:15). Chu amakgapitsin skinikgo pi wi tuku katlawalh xlakata nalimasiya pi xlikana tuku wan.

Xlakata Jesús katsi pi kaj liʼakxilhputunkgo, kakgalhti la kakgalhtilh tiku nitlan xlichuwinamakgo kʼGalilea. Kawani pi putum tamapakgsin nema tapitsinit nalakxla chu kawani: «Komo Satanás xʼakstu tapapitsinit, ¿la tlan tliwakga natawila xtamapakgsin?». Alistalh, Jesús liwana kawani: «Komo akit [xmakan] Dios kkalitamakxtu demonios, xTamapakgsin Dios xlikana kalakgchinitana» (Lucas 11:18-20).

Akxni Jesús lichuwinan «xmakan Dios» max kamalakapastaka tuku lalh makgasa kxkachikin Israel. Kskujnin Faraón nema akxilhkgolh xmilagro Moisés, wankgolh: «¡Wa xmakan Dios!». Nachuna, wa «xmakan Dios» tsokgli Akgkaw Limapakgsin kmaktiy chiwix (Éxodo 8:19; 31:18). Chu wa «xmakan Dios» (espíritu santo o xlitliwakga) nema makgtaya Jesús xlakata nakatamakxtu demonios chu nakamapaksa tatatlanin. Wa xlakata, xTamapakgsin Dios kaj xalan kalakgchinit umakgolh xtalamakgasitsin xlakata xMapakgsina uma Tamapakgsin, Jesús, tlawama milagros kxlakatinkan.

Xlakata Jesús katamakxtu demonios limasiya pi tlakg tliwakga nixawa Satanás, xtachuna la chatum tliwakga chixku talachipa xtalatlawana chu tlaja. Jesús lichuwinampara xliʼakxilhtit chatum demonio nema laktaxtu chatum chixku. Komo chixku ni nawili kxtalakapastakni tuku tlan, uma nixatlan espíritu nakatataspita kgalhtujun espíritus, wa xlakata uma chixku tlakg nitlan katikitaxtunilh nixawa xapulana (Mateo 12:22, 25-29, 43-45). Chuna akgspulama kachikin Israel.

Alistalh chatum puskat tiku kgaxmatnima Jesús pixlanka wan: «Paxuwa ama puskat tiku lin kxpan chu matsikin». Putum lakpuskatin xalak Judea xtse palakachuwina xlitaxtuputunkgo, liwaka xtse Mesías. Max uma puskat lakpuwan pi María lu paxuwa xlakata xtse chatum makgalhtawakgena la Jesús. Pero xla wani pi nichuna chu litachuwinan tuku xlikana makgapaxuwanan: «Ni, wata, ¡paxuwakgo tiku kgaxmatkgo xtachuwin Dios chu makgantaxtikgo!» (Lucas 11:27, 28). Jesús nikxni kawaninit pi xlitamalankit María. Wata, xaxlikana tapaxuwan min akxni skujnanikan Dios chu ni wa xlakata tapakgsikan kʼakgtum familia o xlakata wi tuku tlan tlawakanit.

Alistalh, chuna la tlawalh kʼGalilea, Jesús kawani pi nitlan tuku skinimakgo akxni wanikgo pi wi tuku kalimasiyalh pi xlikana tuku wan. Kawani pi nitu katikamasiyanilh kajwatiya xlimasiyatkan Jonás. Uma palakachuwina litaxtulh akgtum xlimasiyatkan xlakata akgtutu kilhtamaku tawilalh kxpan skiti chu xlakata ni pekualh akxni lichuwinalh Dios, chu uma tlawalh pi ninivitas xlakgpalikgolh xlatamatkan. Jesús kawani: «Pero, ¡kaʼakxilhtit!, unu wi tiku tlakg xlakaskinka nixawa Jonás» (Lucas 11:29-32). Jesús na tlakg xlakaskinka nixawa Salomón nema mapakgsina xalak Seba alh lakgapaxialhnan xlakata nakgaxmata xliskgalala.

Jesús wampara: «Akxni wi tiku mapasinita akgtum makgskgot, ni kaj tsekg wili chu ni liʼakgtala canasta, wata wili niku talhman xlakata putum tiku natanukgo naʼakxilhkgo xkgakganat» (Lucas 11:33). Max wamputun pi akxni tlawa chu masiya uma milagros kxlakatin latamanin xtachuna la matsekgkan  akgtum makgskgot. Xlakata lhuwa tuku lakpuwankgo nila akgatekgskgo tuku xlakata Jesús tlawama milagros.

Jesús tamakxtunit chatum demonio chu mapaksanit kgokgo. Uma xlitlawat pi latamanin namalankiputunkgo Dios chu nakalitachuwinankgo amakgapitsin tuku Jehová tlawama. Wa xlakata, Jesús kawani uma tachuwin tiku wi tuku limawakakgo: «Kuentajkatlawa pi xkgakganat nema kgalhiya ni kapukswa nawan. Wa xlakata, komo putum mimakni makgaxkgakganan chu nitu kgalhi tuku kapukswa, putum makni lu namakaxkgakgenan xtachuna la makgskgot makaxkgakgenaniyan» (Lucas 11:35, 36).