KAPITE 75
Neʼe Fakaha e Sesu Pe ʼe Lava Maʼu Feafeaʼi Te Manuʼia
-
ʼE INA KAPU TE ʼU TEMONIO ʼAKI “TE TUHI ʼO TE ʼATUA”
-
ʼE LAVA MAʼU FEAFEAʼI TE MANUʼIA MOʼONI?
Neʼe hoki toe fakaha age pe e Sesu ki ʼana tisipulo pe ʼe tonu ke feafeaʼi hanatou faikole. Lolotoga tana minisitelio, neʼe toe ʼi ai mo te tahi ʼu faʼahi neʼe toe palalau ki ai ia Sesu. ʼI te temi ʼae neʼe nofo ai ʼi Kalilea pea neʼe ina fai ai he ʼu milakulo, neʼe tukugakoviʼi ia takua neʼe ina fai te ʼu milakulo ʼaki te malohi ʼo te pule ʼo te kau temonio. ʼI tana nofo leva ʼaia ʼi Sutea, neʼe toe fai age ki ai te tukugakovi hala ʼaeni.
ʼI te temi ʼae neʼe kapu ai e Sesu te temonio neʼe ulu sino ʼi te tagata ʼo tupu ai tona ʼalelo mate, neʼe punamaʼuli te hahaʼi kaugā malie. Kaʼe neʼe mole punamaʼuli natou ʼae neʼe natou valoki ia ia. Neʼe natou toe fai ʼo ʼuhiga mo ia te tukugakovi hala ʼaeni: “ ʼE ina kapu te kau temonio ʼaki ia Pelesepu, te pule ʼo te kau temonio.” (Luka 11:15) Pea neʼe loto ʼihi age ki he tahi ʼu fakamoʼoni ʼe fakaha ai pe ko ai ia Sesu. Neʼe natou kole ai kia te ia he fakailoga mai te lagi.
Neʼe mahino kia Sesu neʼe natou fia ʼahiʼahiʼi ia ia, koia neʼe ina tali age kia natou ohage pe ko tana tali ki te hahaʼi ʼae neʼe natou valoki ia ia ʼi Kalilea. Neʼe ina ui ʼe to anai he puleʼaga mo kapau ʼe fetauʼaki pe tana hahaʼi. Pea neʼe ina hoko atu fenei: “Kapau ʼe fakafeagai ia Satana kia ia totonu, ʼe lava tuʼu feafeaʼi anai tona puleʼaga?” Neʼe ui fakahagatonu fenei leva e Sesu kia natou: “Kapau ʼe au kapu te kau temonio ʼaki te tuhi ʼo te ʼAtua, kua kaku moʼoni atu ia te Puleʼaga ʼo te ʼAtua.”—Luka 11:18-20.
ʼI te talanoa ʼa Sesu ʼo ʼuhiga mo “te tuhi ʼo te ʼAtua,” neʼe tonu ia ke manatuʼi e te hahaʼi ʼae neʼe fagono te meʼa ʼae neʼe hoko ʼi muʼa atu ʼi te hisitolia ʼo Iselaele. Ko natou ʼae neʼe ʼi te fale hau ʼo Falaone pea neʼe natou sisio ki te milakulo ʼae neʼe fai e Moisese, neʼe natou ui fenei: “Ko te kauʼi tuhi ʼaeni ʼo te ʼAtua.” Pea neʼe ko “te tuhi ʼo te ʼAtua” ʼae neʼe ina tohi ʼaki te ʼu Folafola ʼe Hogofulu ʼi te ʼu lauʼi maka ʼe lua. (Ekesote 8:19; 31:18, MN) ʼO toe feia aipe, neʼe feala kia Sesu ke ina kapu te kau temonio pea mo fakamalolo te hahaʼi mahahaki ʼaki “te tuhi ʼo te ʼAtua,” ʼae ʼe fakaʼuhiga ki tona laumalie maʼoniʼoni peʼe ko tona malohi. Koia, neʼe kua kaku moʼoni te Puleʼaga ʼo te ʼAtua ki te kau fakafeagai ʼaia, he ʼe ko Sesu totonu, te Hau ʼo te Puleʼaga, ʼae neʼe ina fai te ʼu milakulo ʼi ʼonatou muʼa.
Ko te lava kapu e Sesu te kau temonio neʼe ko he fakamoʼoni neʼe malohi age ia ia Satana, ohage pe ko te fakaovi ʼa he tagata malohi ʼo puke he tagata ʼe ina leʼoleʼo lelei he fale hau ʼaki he ʼu mahafu tau. Neʼe toe fai e Sesu tana lea fakatata ʼo ʼuhiga mo he laumalie kovi neʼe mavae ʼi he tagata. Kapau ʼe mole fetogi e te tagata te laumalie kovi ʼaia ʼaki he ʼu meʼa ʼe lelei ia ia, pea ʼe toe liliu mai pe anai ki ai te laumalie kovi mo te tahi ʼu laumalie ʼe toko fitu. Pea ʼe kovi age anai te aluʼaga ʼo te tagata ʼi tona kamata. (Mateo 12:22, 25-29, 43-45) Pea neʼe toe feia pe mo te aluʼaga ʼo te hahaʼi ʼo Iselaele ʼi te temi ʼo Sesu.
Neʼe ʼi ai te fafine neʼe fagono kia Sesu pea neʼe kalaga fenei: “Manuʼia te fafine ʼae neʼe ina fuafatuʼi koe pea mo ina fafaga koe!” Neʼe fakaʼamu te hahaʼi fafine Sutea ke natou liliu ko te faʼe ʼa he polofeta, kaʼe tafito ʼa te Mesia. Koia neʼe lagi manatu ia te fafine neʼe fiafia ia Malia he neʼe ko ia te faʼe ʼa te tagata faiako lelei ʼaia. Kaʼe neʼe fakatonutonuʼi e Sesu te fafine, ʼo ina fakaha pe ʼe lava maʼu feafeaʼi te manuʼia moʼoni. Neʼe ina ui fenei: “Kailoa, kaʼe manuʼia ia natou ʼae ʼe natou logo ki te folafola ʼa te ʼAtua pea mo natou taupau!” (Luka 11:27, 28) Neʼe mole he temi neʼe ui ai e Sesu ke foaki kia Malia he fakaʼapaʼapa makehe. Kaʼe ʼe maʼu e he tagata peʼe ko he fafine te manuʼia moʼoni moka ʼe liliu ko he kaugana agatonu ʼa te ʼAtua, kaʼe mole ʼuhi ko he ʼu vahaʼa fakafamili peʼe ko he ʼu gaue neʼe ina fai.
Ohage ko tana fai ʼi Kalilea, neʼe pupulaʼi e Sesu te hahaʼi ʼae neʼe natou kole age kia te ia he fakailoga mai te lagi. Neʼe ina ui ʼe mole foaki age anai kia natou he fakailoga, gata pe ki “te fakailoga ʼo Sonasi.” Ko te fakailoga ʼo Sonasi neʼe ko tana nofo ʼaho tolu ʼi te loto fatu ʼo te ika pea mo tana faifakamafola ʼaki he lototoʼa, ʼo tupu ai te fakahemala ʼa te kau Ninive. Pea neʼe ui fenei e Sesu: “Kaʼe ʼe nofo ʼi heni he tahi ʼe maʼuhiga age ia Sonasi.” (Luka 11:29-32) Neʼe toe maʼuhiga age foki Sesu ia Salomone, ʼae neʼe alu ki ai te fineʼaliki ʼo Sepa ke fagono ki tona poto.
Neʼe toe ui fenei e Sesu: “ ʼI te ʼosi tutu e he tahi he malama, ʼe mole ina tuku ki he koga meʼa ʼe u peʼe ki he lalo kato, kaʼe ʼe ina hili ki he tuʼulaga malama.” Luka 11:33) Ko tona lagi fakaʼuhiga, ko te ʼu akonaki pea mo te ʼu milakulo ʼae neʼe fai e Sesu ʼi ʼonatou muʼa, neʼe hage ia ko he malama neʼe ugia. Neʼe mole natou mahino ki te tupuʼaga ʼo te ʼu gaue ʼae neʼe ina fai, koteʼuhi neʼe mole tokaga ʼonatou mata ki he faʼahi pe ʼe tahi, pe neʼe hage neʼe nenefu.
(Neʼe hoki ʼosi age pe te kapu e Sesu te temonio ʼae neʼe ulu sino ʼi te tagata ʼo tupu ai tona ʼalelo mate, ʼo feala ai hana toe palalau. Neʼe tonu ke uga ai te hahaʼi ke natou fakakololiaʼi te ʼAtua pea mo fakamatala te ʼu gaue ʼae neʼe fakahoko e Sehova. Koia neʼe fai e Sesu te fakatokaga ʼaeni kia natou ʼae neʼe natou valoki ia ia: “Tokaga naʼa fakapoʼuli te malama ʼae ʼe ia koe. Kapau ʼe malama tou sino katoa ʼo mole ʼi ai he faʼahi ʼe fakapoʼuli, pea ʼe malamagia anai ohage ko te mu ʼo he malama.”—Luka 11:35, 36.