Judeankkasajja, Jesusajj mä fariseon utaparuw manqʼer saräna. Ukarojj uruw sarpachäna (Lucas 11:37, 38; igualtʼayañataki Lucas 14:12). Janïr manqʼaskasajja, fariseonakajj mujllikamaw ampar jareqasipjjäna. Jesusasti janiw uk lurkänti (Mateo 15:1, 2). Ukham jareqasisajj janis Diosan Leyip pʼakintapkchïnjja, janiw Diosajj ukham lurapjjañap maykänti.

Costumbrerjam Jesusan jan jareqasitap uñjasajja, uka fariseojj wal musparäna. Jesusajj uk amuyasajj akham sänwa: “Fariseonaka, jumanakajj vasonaksa platonaksa wali sum patjjat qʼomachapjjtajja, manqhatjja lunthatasiñanakampi jan wali luräwinakampi phoqantatäpjjtawa. ¡Jan amuytʼasir jaqenaka! Khititejj anqäjj lurki ukajj manqhäki uksa lurarakiwa, ¿janich ukhamäki?” sasa (Lucas 11:39, 40).

Ampar jareqasiñajj walikïskänwa, ukampis Dios chuymäpkaspas ukham tukupjjatapaw jan walïkänti. Fariseonakasa jupanakjam jareqasirinakasa janiw chuymanakapjja jan walinakat qʼomachasipkänti. Ukatwa Jesusajj akham sas ewjjtʼäna: “Khuyapayasiñat pobrenakar kuns churañ munapjjäta ukhajja, kunanakatejj manqhan utjki ukanak churapjjam, taqe kunansa jumanakajj qʼomäpjjätawa” sasa (Lucas 11:41). ¡Ukajj cheqäskapunïnwa! Kun churañ munasasa, munasiñatwa churañasa, janiw suma jaqet uñjayasiñ laykojj churapjjañasäkiti.

Uka chachanakajj churapjjarakirïnwa, Jesusajj sänwa: “¡Fariseonaka, [...] yerbabuenatsa, rudatsa, huertankir yaqha chʼojjña alinakatsa diezmo churapjjtawa. Ukampis cheqapar sarnaqañsa Diosar munasiñsa apanukupjjtawa! Cheqansa taqe ukanakat diezmo churañajj wakisïnwa, ukampis janiw mayninak apanukuñajj wakiskänti” sasa (Lucas 11:42). Diosan Leyipanwa diezmo churañ mayïna, mä arunjja sapa tunkat maya churapjjañapäna (Deuteronomio 14:22). Ukhamajj yerbabuena, ruda, ukhamarak manqʼar condimentañatak yaqha chʼojjña alinakat churañajj wakisïnwa. Fariseonakajj uka Leyir sum phoqapjjäna, ukampis ¿kunjamsa jukʼampi wakiskiri leyinakarojj uñjapjjäna? ¿Dios nayraqatan cheqaparuti sarnaqapjjäna, humilde chuymanipjjarakïnti? (Miqueas 6:8).

Jesusajj saskakïnwa: “¡Fariseonaka, ay jumanakajj kamachapkakïta, sinagoganakansa nayraqatarupuniw qontʼasiñ munapjjtajja, qhatunakansa wal aruntayasiñ munapjjaraktajja! ¡Ay jumanakajj kamachapkakïta, jan qhana uñjkañ sepulturanakar uñtatäpjjtawa, jaqenakajj ukanak patjja sarnaqkasas janiw amuyapkiti!” sasa (Lucas 11:43, 44). Jïsa, jaqenakajj uka sepulturanakar takjjatasajj leyirjamajj qʼañuchataw uñjasipjjaspäna. Ukham sasinjja, fariseonakan qʼañüpjjatapajj janiw uñjaskiti sañwa Jesusajj munaskäna (Mateo 23:27).

Diosan Leyip sum uñtʼir mä jaqejj Jesusar sänwa: “Yatichiri, ukanak parlasajj nanakamppacharuw jiskʼachapjjestajja” sasa. Jupanakasa janiw jaqenakarojj yanaptʼapkänti, uk amuyasipjjañapaw wakisïna. Jesusajj sänwa: “¡Ley sum uñtʼir jaqenaka, ay jumanakas kamachapkakïta, jan aptañjam qʼepinakampiw jaqenakar apjjatapjjtajja, jumanakasti janiw ni mä lukʼanampikis uka qʼepinak llamktʼañ munapktati! ¡Ay jumanakajj kamachapkakïta, profetanakan sepulturanakapsa lurapjjtawa, ukampis nayra awkinakamajj jupanakar jiwayapjjänwa!” sasa (Lucas 11:45-47).

“Qʼepinak” sasinjja, nayra awkinakapan uñstayat leyinakapata, fariseonakan qʼewjayat leyinakapatwa Jesusajj parlaskäna. Jupanakajj janiw jaqenakarojj yanaptʼapkänti. Antisas jachʼa qʼepinakar uñtasitäki uka mayitanakwa  phoqayañ munapjjäna. Ukhamarusa nayra awkinakapajj Diosan profetanakaparuw jiwayapjjäna, Abel chachat qalltasina. Jichhajj uka profetanakan sepulturanakapwa lurapjjäna, ukhamatwa jupanakar jachʼañchapkaspas ukham tukupjjäna. Ukampis nayra awkinakapjamaw sarnaqasipkäna amuyasipkarakïna. Diosan khitanit jachʼa profetarus jiwayañ munasipkäna. ‘Diosajj aka tiempon jakir jaqenakatjja cuenta mayini’ sasaw Jesusajj säna. 38 mara pasatatwa ukajj phoqasïna, 70 marana.

Jesusajj saskakïnwa: “¡Ley sum uñtʼir jaqenaka, ay jumanakajj kamachapkakïta, yatiñan llavepsa jaqenakat apaqapjjtawa, janiw jumanakas mantapktati, ni mantaskirinakarus mantayapktati!” sasa (Lucas 11:52). Jupanakaw Diosan arunakap amuytʼayapjjañapäna, ukampis jukʼampikiw Diosan arunakap uñtʼañatsa amuytʼañatsa jaqenakar jarkʼapjjäna.

Ukham satajja ¿fariseonakampi escribanakampejj kamachapjjänsa? Jesusajj sarjjañampïskäna ukhajja, wali colerataw jupa contra parlapjjäna, wal jiskhintapjjarakïna. Jupanakajj janiw yateqañ laykojj jiskhipkänti, jan ukasti Jesusajj arunakapan pantjasispa ukwa munapjjäna, ukhamat jupar katuntañataki.