Tingki di Judea, ditogihon sahalak Parise ma Jesus mangan di jabuna. Ra arian do tingki i. (Lukas 11:37, 38) Mangihuthon hasomalan ni halak Parise, diburi nasida do tanganna sahat tu siku ni tanganna andorang so mangan. Alai ndang diulahon Jesus i. (Mateus 15:1, 2) Ndang maralo hasomalan i tu Patik ni Debata, alai ndang adong disuru Debata ingkon ulahonon.

Tarsonggot do halak Parise ala ndang diihuthon Jesus hasomalan ni nasida. Didok Jesus ma, “Hamu halak Parise, dipaias hamu do mangkuk dohot piringmuna sian luar, alai di bagasan gok do angka na binuatmuna marhite mangarampok dohot hajahaton. Hamu halak na so marroha! Ai na mambahen na di luar, ndang laos i na mambahen na di bagasan?”​—Lukas 11:39, 40.

Ndang taringot na manunsi tangan maksud ni Jesus, alai ala na munafik do nasida. Disunsi nasida do tangan ni nasida alai ndang dipaias rohana sian hajahaton. Alani i didok Jesus ma, “Molo dilehon hamu silehon-lehon tu na pogos sian nasa roha, gabe ias ma hamu.” (Lukas 11:41) Tutu ma, ingkon sian ias ni roha do hita mangalehon, ndang asa diida halak.

Ndang na so boi hita mangalehon. Alai didok Jesus ma, “Dilehon hamu do saparsampulu sian suan-suanan mint, inggu dohot ganup sian suan-suanan na asing. Alai tading do dibahen hamu na sintong dohot holong ni Debata! Ringkot do mangalehon saparsampulu, alai unang ma alani i gabe tading na asing.” (Lukas 11:42) Mangihuthon Patik, ingkon dilehon do saparsampulu ni suan-suanan ni nasida. (5 Musa 14:22) Dohot ma i sian suan-suanan mint, suan-suanan inggu, dohot suan-suanan na dipangke laho mangalompa. Marsitutu do halak Parise mangulahon on. Alai ndang diulahon nasida na rumingkot, i ma mangulahon na sintong jala marserep ni roha.​—Mika 6:8.

Didok Jesus ma muse, “Marjea ma hamu halak Parise, ai lomo do rohamuna hundul di jolo di angka sinagoga jala dipangkulingi di pasar! Marjea ma hamu, ai songon kuburan na so martanda do hamu, gabe mardalan ma halak di ginjangna di na so pamotoanna!” (Lukas 11:43, 44) Boi do gabe tartuktuk halak alani kuburan na so martanda, jala gabe ramun. Dipangke Jesus do hatorangan on laho patuduhon holan di luar do idaon ias halak Parise.​—Mateus 23:27.

Dung i didok sahalak siboto patik ma tu Jesus, “Guru, dohot do hami dileai ho di hatami.” Ndang diurupi nasida halak saleleng on. Alani i, didok Jesus ma, “Marjea ma nang hamu siboto patik, ai dibahen hamu do boban na borat siboanon ni halak, hape hamu sandiri ndang olo mandaishon nanggo sada jari-jarimuna tusi! Marjea ma hamu, ai dibahen hamu do kuburan ni angka panurirang hape angka ompumuna do na mambunu nasida!”​—Lukas 11:45-47.

Boban na nidok ni Jesus, i ma angka adat dohot aturan na dibahen halak Parise. Susa do parngoluan ni halak dibahen nasida. Dipaksa nasida do halak mangulahon angka aturan i, na songon boban na borat. Dibunu ompu ni nasida do angka panurirang mulai sian si Abel. Asa songon na pasangaphon angka panurirang, dipajongjong nasida ma kuburan ni panurirang i, hape na maniru parange dohot parniulaon ni ompuna do nasida. Gariada naeng dibunu nasida do Jesus, i ma Panurirang ni Debata  na umbalga. Jesus mandok laho uhumon ni Debata ma nasida. Masa ma i taon 70 M, hira-hira 38 taon dungkon i.

Dung i didok Jesus ma, “Marjea ma hamu siboto patik, ai dibuat hamu do kunci ni parbinotoan. Hamu sandiri ndang masuk tusi jala diambati hamu do halak na naeng masuk tusi!” (Lukas 11:52) Sasintongna, nasida do na ingkon mangurupi halak mangantusi hata ni Debata, alai gabe nasida do na mangambati halak mangantusi i.

Songon dia do pangkilalaan ni halak Parise dohot siboto surat mambege i? Gabe muruk ma nasida jala sahata ma laho manjorat Jesus marhite sungkun-sungkun.