Ke ini Jesus odude ke Judea, Pharisee kiet okot enye udia, enye onyụn̄ aka. Etie nte ẹkekot enye udia uwemeyo, idịghe udia mbubreyo. (Luke 11:37, 38; men Luke 14:12 domo.) Mme Pharisee ẹsiyet ubọk ẹsịm ekụn̄ubọk mbemiso ẹdiade udia. Jesus inamke utọ n̄kpọ emi. (Matthew 15:1, 2) Owo emi eyetde ubọk esịm ekụn̄ubọk ibiatke Ibet Abasi, edi Abasi idọhọke ke se anade ẹnam edi emi.

Idem akpa Pharisee oro nte Jesus mîyetke ubọk ntre. Jesus ọdiọn̄ọ ke idem akpa enye, onyụn̄ ọdọhọ enye ete: “Ke emi mbufo mme Pharisee ẹnanam edem cup ye usan ẹsana, edi esịt mbufo ẹyọhọ ye n̄kpọ n̄wo ye idiọkido. Mbufo mme anana-ibuot owo! Nte idịghe enye emi akanamde edem anam esịt n̄ko?”—Luke 11:39, 40.

Mfịna idịghe owo ndiyet ubọk asana mbemiso adiade udia; mbubịk emi mme owo ẹnamde ke Ikọ Abasi edi mfịna. Mme Pharisee ye mbon en̄wen emi ẹsiyetde ubọk ẹsịm ekụn̄ubọk inamke esịt mmọ asana. Emi anam Jesus ọnọ mmọ item emi: “Ẹda mme n̄kpọ eke ẹdude ke esịt ẹnọ mme ubuene, ndien, sese! kpukpru n̄kpọ eken ẹban̄ade mbufo ẹyesana.” (Luke 11:41) Akpanikọ ke Jesus etịn̄ emi. Ẹkpesinọ owo n̄kpọ ke ntak ima, idịghe man ẹdi eti owo ke enyịn mbon en̄wen.

Idịghe nte ke mbon emi Jesus ọnọde item emi isinọhọ owo n̄kpọ. Jesus ọdọhọ ete: “Mbufo [ẹmesisio] ubak ikọn̄ mint ye ikọn̄ rue ye kpukpru ikọn̄udia kiet ke itie duop ẹnọ, edi mbufo ẹfụmi unenikpe ye ima Abasi! Edi mbiomo mbufo ndinam mme n̄kpọ emi, edi ẹkûnyụn̄ ẹtre ndinam mmọ eken.” (Luke 11:42) Ibet Abasi ọkọdọhọ ẹsinọ mbak duop ke kpukpru se ẹtọde. Emi n̄ko ke ẹsikot tithe. (Deuteronomy 14:22) Ẹma ẹsinọ n̄ko utọ ikọn̄ nte mint ye rue emi ẹkesidade ẹnam udia ọfuọn̄. Mme Pharisee ẹma ẹsinọ n̄kpri n̄kpri n̄kpọ emi, edi mmọ ikesinamke mme akpan n̄kpọ emi Ibet ọdọhọde ẹnam, utọ nte ndinam se inende nnyụn̄ nsụk idem nsan̄a ye Abasi.—Micah 6:8.

Jesus aka iso ọdọhọ ete: “Mbọm mbufo mme Pharisee, koro mbufo ẹmade n̄kpọitie iso ke mme synagogue ye ekọm ke an̄waurua! Mbọm mbufo, koro mbufo ẹbietde mme udi eke ẹdịbede, eke mme owo ẹdọkde ẹsan̄a mînyụn̄ idiọn̄ọke!” (Luke 11:43, 44) Mme owo emi mîdiọn̄ọke ke utọ udi oro odu do ẹkeme ndidọk nsan̄a ẹnyụn̄ ẹdehe. Ntem Jesus owụt ke idịghe kpukpru owo ẹdiọn̄ọ nte mme Pharisee emi ẹdiọkde ẹketre.—Matthew 23:27.

Ete kiet emi enen̄erede ọdiọn̄ọ Ibet Abasi ọdọhọ Jesus ete: “Andikpep, ke editịn̄ n̄kpọ emi, afo ọmọsọn̄ọ nnyịn enyịn n̄ko.” Edi ana Jesus anam mme owo nte ete emi ẹdiọn̄ọ ke mmimọ in̄wamke mme owo. Jesus ọdọhọ mmọ ete: “Mbọm mbufo n̄ko emi ẹfiọkde Ibet, koro mbufo ẹbọpde mbiomo eke ọsọn̄de ndibiom ẹdori owo ke idem, edi mbufo ke idem mbufo idaha nnuenubọk kiet itụk mbiomo oro! Mbọm mbufo, koro mbufo ẹbotde udi mme prọfet, edi mme ete ete mbufo ẹkewot mmọ!”—Luke 11:45-47.

Mbiomo emi Jesus etịn̄de aban̄a mi edi ibet enye emi mme Pharisee ẹkekpepde mme owo, emi owo mîkewetke-wet, ye nsio nsio usụn̄ eken emi mmọ ẹsinamde Ibet an̄wan̄a. Mmọ iyakke mme owo ẹkop inem uwem. Utu ke oro, mmọ ẹkam ẹsụk ẹyom mme owo ẹnịm n̄kpọsọn̄ ibet mmọ emi ẹtiede nte ndodobi mbiomo. Mme ete ete mmọ ẹkewot mme prọfet Abasi ọtọn̄ọde ke eyo Abel. Idahaemi nditọ mmọ emi ẹbotde udi ẹnọ mme prọfet mi, man mme owo ẹkere ke mmọ ẹkpono mme prọfet, ẹnam ukem ubọkutom mme ete ete mmọ. Kpa mmọ ẹyom ndiwot akakan Prọfet Abasi emi. Jesus ọdọhọ ke Abasi oyobụp mmọ iyịp mme prọfet oro. Se ikonyụn̄ itịbede edi oro ke isua 70 eyo Christ, oro edi, ke n̄kpọ nte isua 38 ama ekebe.

Jesus aka iso ete: “Mbọm mbufo emi ẹfiọkde Ibet, koro mbufo ẹmemen ukpọhọde ifiọk ẹfep;  mbufo ke idem mbufo ibehe idụk, ẹmenyụn̄ ẹbiọn̄ọ mmọ eke ẹyomde ndibe ndụk!” (Luke 11:52) Mbon emi ẹkpesikpep mme owo Ikọ Abasi, edi mmọ inamke oro. Utu ke oro mmọ iyakke mme owo ẹdiọn̄ọ Ikọ Abasi inyụn̄ iyakke se Ikọ Abasi etịn̄de an̄wan̄a mmọ.

Mme Pharisee ye mme scribe ẹnam n̄kpọ didie ke ini ẹkopde ikọ emi? Ke ini Jesus oyomde ndidaha n̄kpọn̄ mmọ, mmọ ẹtọn̄ọ mfịna ye enye ẹnyụn̄ ẹtọn̄ọ ndifak enye mbụme. Mmọ ibụpke mme mbụme emi man ẹkpep n̄kpọ, edi ẹbụp man Jesus etịn̄ ikọ emi mmọ ẹdidade ẹmụm enye.