Ni tiko voli mai Jutia o Jisu, a sureti koya e dua na Farisi me rairai lai kana ena nona vale. (Luke 11:37, 38; vakatauvatana Luke 14:12.) Nodra ivakarau na Farisi mera vuluvulu me yaco sara ina duruduru ni ligadra ra qai kana. E sega ni cakava qori o Jisu. (Maciu 15:1, 2) Ena sega ni beci na Lawa ni Kalou ke muri na ivakarau ni vuluvulu qori, ia e sega tale ga ni vakarota na Kalou me caka.

E siqema rawa o Jisu ni kurabuitaka na Farisi nona sega ni muria na ivakarau ya, mani kaya: “O kemuni na Farisi oni dau savata na dago ni bilo kei na veleti, ia na lomamuni e sinai ena kocokoco kei na veika ca. Ni yavu tamata sesewa! O koya ga e bulia na loma ni bilo e bulia tale ga na dagona, se cava?”—Luke 11:39, 40.

E vakabibitaki tiko eke na veivakaisini ni lotu, sega ni vuluvulu ni se bera na kana. Era muria na Farisi kei na so tale na nodra ivakarau ni vuluvulu, ia era sega ni vakasavasavataka na lomadra mai na ivakarau ca. E veivakasalataki kina o Jisu: “O koya gona, ni solia vakailoloma na veika e tu e lomamuni, oni na qai savasava ena ka kece.” (Luke 11:41) Io, na soli ka e dodonu me vu mai lomada, sega ni noda viavia yalododonu meda qoroi kina.

Era dau soli ka na Farisi, ia e kaya o Jisu: “Oni na rarawa na Farisi ni oni solia na ikatini ni midi, na ivakaboi ni kakana, kei na itei va ya, ia oni sega ni kauaitaka na lewadodonu kei na loloma ni Kalou! E bibi moni vakaitovotaka na veika qo, ia me kua ni guilecavi na veika tale eso.” (Luke 11:42) E vakaroti ena Lawa ni Kalou me soli na ikatini ni itei mai na were. (Vakarua 14:22) Qori e wili kina na midi, ivakaboi ni kakana kei na itei e vakaisaluakitaki kina na kakana. Era muria vinaka sara na Farisi na lawa e vauca na ikatini ni veika qori, ia vakacava na veika e bibi cake ena Lawa me vaka na caka dodonu kei na yalomalumalumu vua na Kalou?—Maika 6:8.

E tomana o Jisu: “Oni na kalouca na Farisi ni oni dau via dabe ena idabedabe e liu ena valenilotu, moni kidavaki tale ga ena vanua ni veivoli. Oni na kalouca ni oni vaka na ibulubulu e sega ni laurai, ni butuki, e sega ni kilai.” (Luke 11:43, 44) E rawa nira dukadukali na lewenivanua ke ra lutu ina ibulubulu va ya. E cavuta qori o Jisu me vakavotuya kina ni sega ni laurai levu nodra veivakaisini na Farisi.—Maciu 23:27.

E kudruvaka e dua na tagane e kila vinaka na Lawa ni Kalou: “Qasenivuli, oni sa beci keimami sara ga ena nomuni vosa.” E dodonu ga mera kila o ira va qori nira sega ni vukei ira tiko na lewenivanua. Sa qai kaya o Jisu: “Oni na rarawa tale ga o kemuni na kila vinaka na Lawa, ni oni vakacolati ira na lewenivanua ena icolacola bibi sara, ia oni sega ni via tara na icolacola qori ena dua mada ga na iqaqaloniligamuni! Oni na kalouca ni oni tara na nodra ibulubulu na parofita, ni o ira ga qo era a vakamatea na tukamuni!”—Luke 11:45-47.

E tukuna tiko o Jisu ni vaka na icolacola na nodra ivakavuvuli vakatamata na Farisi kei na nodra ivakamacala ni Lawa. Era veivakaocai ena veika era surevaka mera muria kece na lewenivanua. O ira na tukadra era vakamatei ira na parofita me tekivu sara mai vei Epeli. Era nanuma mera tara nodra ibulubulu na parofita mera rokovi ira kina, ia era vakatotomuria tiko ga nodra rai kei na nodra ivalavala na tukadra. Era via vakamatea mada ga na Parofita levu duadua ni Kalou. E tukuna o Jisu nira na saumitaro vua na Kalou na itabatamata qo. Oti e 38 na yabaki, a yaco dina qori ena 70 G.V.

E kaya tale o Jisu: “Oni na kalouca o kemuni na kila vinaka na Lawa, ni oni kauta tani na ki  ni kilaka. O kemuni mada ga oni sega ni curu kina, oni qai tarovi ira na curu tiko kina!” (Luke 11:52) Nira sega ni sereka o ira qori na ibalebale ni Vosa ni Kalou, era lecaika kina na lewenivanua.

Na cava era cakava na Farisi kei na vunivola? Era cudru, era saqati Jisu qai veitaravitaka vua na taro. E sega ni kena inaki qori mera kila kina e levu tale na ka, era via vakatovolei koya ga me rawa ni tukuna e dua na ka me vesu kina.